(ខេត្តកែប)÷ ប្រជាពលរដ្ឋចំនួន១៩គ្រួសារដែលធ្លាប់អាស្រ័យផលក្នុងបរិវេណអាងទំនប់ទឹកក្នុងភូមិសាស្ត្រឃុំពងទឹក ស្រុកដំណាក់ចង្អើរ ខេត្តកែប បាននាំគ្នាមកកាន់សាលាស្រុក កាលពីព្រឹកថ្ងៃទី០៦ ខែតុលា ឆ្នាំ២០២០ ដើម្បីសុំអន្តរាគមន៍ដល់អាជ្ញាធរនិងមន្ត្រីជំនាញ ឲ្យជួយដោះស្រាយចេញប័ណ្ណកម្មសិទ្ធិស្របច្បាប់ជូនដល់ពួកគាត់។
រាល់ការស្នើសុំដូចខាងលើ បានធ្វើឡើងស្របពេលដែលប្រមុខរាជរដ្ឋាភិបាលកម្ពុជា មានគោលការណ៍ឆ្វៀលដីជូនប្រជាពលរដ្ឋដែលពួកគាត់ធ្លាប់បានអាស្រ័យផលជាក់ស្តែងជាច្រើនឆ្នាំកន្លងមក ទើបលោក អ៊ុក ថា អភិបាលរងខេត្តកែប ដឹកនាំមន្ត្រីជំនាញមកធ្វើការសម្របសម្រួលតែម្តង។
ក្នុងដំណោះស្រាយនេះ លោក អ៊ុក ថា អភិបាលរងខេត្តកែប បានលើកឡើងថា ដីដែលពលរដ្ឋស្នើសុំធ្វើប័ណ្ណស្ថិតក្នុងបរិវេណអាងទំនប់នេះមានទឹកជ្រៅហួសពីការស្មាន ដោយកន្លែងខ្លះមានជម្រៅជាងមួយម៉ែត្រឬជិត២ម៉ែត្រ ម្លោះហើយលោកមិនហ៊ានសម្រេចកិច្ចការនេះជូនបានឡើយ ប៉ុន្តែបើប្រជាពលរដ្ឋដែលធ្លាប់កាន់កាប់អាស្រ័យផលកន្លងនឹងអនុញ្ញាតឲ្យធ្វើការងារបង្កបង្កើនផលបន្តដូចមុនៗដដែល ហើយអាជ្ញាធរក៏មិនដកហូតនោះឡើយ។
ដោយឡែកបើតាមការបញ្ជាក់ពីមន្ត្រីជំនាញផ្សេងទៀត ក៏បានអះអាងដូចគ្នាដែរថា ដីចំណុចអាងស្តុកទឹក(ទំនប់)ពិតជាមានទឹកជ្រៅនៅក្នុងរដូវវស្សា លុះឈានចូលដល់រដូវប្រាំងទើបទឹកស្រកចុះវិញ។បានន័យថា ត្រង់ចំណុចបរិវេណអាងទំនប់ដែលប្រជាពលរដ្ឋស្នើសុំចេញប័ណ្ណកម្មសិទ្ធិនេះអាស្រ័យផលបានតែនៅរដូវប្រាំងប៉ុណ្ណោះ លុះចូលដល់រដូវវស្សាមានទឹកជ្រៅបែបនេះដាំបានតែឈូកឬព្រលឹតប៉ុណ្ណោះ។
ជាមួយនឹងការលើកឡើងក៏ដូចជាការស្នើសុំធ្វើប័ណ្ណកម្មសិទ្ធិរបស់ប្រជាពលរដ្ឋដូចខាងលើ ក្រោយពីអាជ្ញាធរនិងស្ថាប័នជំនាញចុះពិនិត្យជាក់ស្តែងនៅទីតាំងស្នើសុំត្រង់ចំណុចបរិវេណអាងទំនប់ដែលមានទឹកជ្រៅ ចាប់ពីជាង១ម៉ែត្ររហូត ទៅ២ម៉ែត្របែបនេះ អាជ្ញាធរនិងមន្ត្រីគ្រប់ជំនាញមិនទាន់ហ៊ានអនុម័តជាផ្លូវការណាមួយទេ ដោយគ្រាន់តែធ្វើរបាយការណ៍ដើម្បីរង់ចាំការសម្រេចពីសំណាក់ ឯកឧត្តមអភិបាលខេត្តកែបនៅពេលក្រោយ៕ សេង ណារិទ្ធ
