(ខេត្តកំពត)៖ ពិធីប្រកាសតែងតាំងប្រធានសង្ឃ(ព្រះចៅអធិការ)វត្តប្រភ្នំ ស្ថិតក្នុងភូមិប្រភ្នំ ឃុំប្រភ្នំ ស្រុកអង្គរជ័យ ខេត្តកំពត កាលពីរសៀលថ្ងៃទី០៦ ខែតុលា ឆ្នាំ២០២០ ត្រូវបានផ្អាកយ៉ាងតក់ក្រហល់ ខណៈប្រជាពលរដ្ឋដែលជាពុទ្ធបរិស័ទចំណុះជើងវត្តប្រមាណជិត៣០០នាក់នាំគ្នាតវ៉ា ព្រោះតែមិនពេញចិត្តព្រះចៅអធិការវត្តថ្មី។
ការកាសតែងតាំងប្រធានសង្ឍនៅវត្តប្រភ្នំនេះបន្ទាប់ពីព្រះចៅអធិការវត្តចាស់ បានសុគតរយៈពេល៤ខែ ទើបរសៀលនេះ មានការតែងតាំងជាព្រះចៅអធិការវត្តថ្មីវិញ ដែលមានការចូលរួមពី ឯកឧត្តម ថាង ពៅ អនុរដ្ឋលេខាធិការក្រសួងមហាផ្ទៃ និងលោក នាក់ យិតថូ ប្រធានមន្ទីរធម្មការនិងសាសនាខេត្តកំពត លោកកឹម បូណា អភិបាលស្រុកអង្គរជ័យ លោក យ៉ាត យ៉ា ប្រធានក្រុមប្រឹក្សាស្រុក ព្រមទាំងគណៈកម្មការ ពុទ្ធបរិស័ទចំណុះជើងវត្តប្រភ្នំផងដែរ។
ចំពោះការផ្អាកតែងតាំងព្រះចៅអធិការវត្តប្រភ្នំនេះក្រោយពីមានការប្រតិកម្មរវាងប្រជាពលរដ្ឋដែលជាពុទ្ធបរិស័ទចំណុះជើងវត្តប្រភ្នំ ដែលពួកគាត់រាប់រយនាក់ ធ្វើការជំទាស់មិនឲ្យលោកគ្រូសូត្រស្តាំ ព្រះនាម ព្រះអង្គម្ចាស់ ហួច នាង ឡើងធ្វើជាព្រះចៅអធិការវត្តប្រភ្នំ ដោយសំអាងហេតុផលថា លោកគ្រូសូត្រស្តាំនេះ ជាសង្ឍដែលរាប់អានតែអ្នកធំឬអ្នកមាន និងមានភាពខ្ចិលច្រអូស ហើយលោកគ្រូសូត្រស្តាំមិនរាប់អានពលរដ្ឋក្រីក្រឡើយ ។
ចំពោះហេតុផលដែលពុទ្ធបរិស័ទចង់បានក្នុងការតែងតាំងគឺសុំប្តូរតំណែងព្រះចៅអធិការវត្តប្រភ្នំឲ្យទៅលោកគ្រូសូត្រឆ្វេង ព្រះនាមព្រះអង្គម្ចាស់ ពេជ សុភឿន វិញទើបប្រជាពលរដ្ឋនិងពុទ្ធបរិស័ទយល់ស្រប ព្រោះពួកគាត់សំអាងថា គ្រូសូត្រឆ្វេងជាសង្ឃប្រកបដោយគន្លងធម៌ ចិត្តល្អចេះជួយយកអាសារអ្នកស្រុកភូមិ និងឧស្សាហ៍ព្យាយាម ខុសពីលោកគ្រូសូត្រស្តាំដែលជាសង្ឃសម្លឹងឃើញតែលាភសក្ការៈ។
ទាក់ទិននឹងការផ្អាកប្រកាសតែងតាំងព្រះចៅអធិការវត្តប្រភ្នំ លោក នាក់ យិតថូ ប្រធានមន្ទីរធម្មការនិងសាសនា ខេត្តកំពត បានកត់សម្គាល់ថា បើពុទ្ធបរិស័ទចំណុះជើងវត្តសម្តែងក្តីមិនពេញចិត្តចំពោះការឡើងតំណែងគ្រូសូត្រស្តាំព្រះនាម ហួច នាង ជាប្រធានសង្ឃក្នុងវត្តប្រភ្នំទេ លោកក៏យល់ស្របដែរ ប៉ុន្តែតំណែងនេះនឹងត្រូវកំណត់លើកពេលទៅថ្ងៃក្រោយវិញ ដោយតម្រូវជ្រើសរើសយកព្រះសង្ឃផ្សេងដែលមិនមែនជាសង្ឃក្នុងវត្តប្រភ្នំដើម្បីតែងតាំងជាព្រះចៅអធិការវត្តប្រភ្នំ ធ្វើបែបនេះទើបគ្មានប្រតិកម្មពីប្រជាពលរដ្ឋទាណងសងខាង៕ សេង ណារិទ្ធ
