(ភ្នំពេញ) ÷ថ្ងៃទី០៥៥ ខែតុលា ឆ្នាំ២០២០ នៅទីស្តីការអាជ្ញាធរមីន ឯកឧត្តម ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងឯកឧត្តម នាយឧត្ដមសេនីយ៍ សែម សុវណ្ណនី អនុប្រធានទី២ អាជ្ញាធរមីន ដឹកនាំកិច្ចប្រជុំ ស្តីពីវឌ្ឍនភាពការងាររបស់អាជ្ញាធរមីនប្រចាំត្រីមាសទី៣ ឆ្នាំ២០២០។
ឯកឧត្តម នាយឧត្ដមសេនីយ៍ សែម សុវណ្ណនី បានមានប្រសាសន៍កោតសរសើរចំពោះថ្នាក់ដឹកនាំមន្ត្រីបុគ្គលិកអាជ្ញាធរមីនចំពោះលទ្ធផលការងារដែលបានសម្រេចនាពេលកន្លងមក។ នាយឧត្ដមសេនីយ៍ បានណែនាំឲ្យថ្នាក់ដឹកនាំ មន្ត្រី បុគ្គលិក អាជ្ញាធរមីន ដូចជាខាងក្រោម៖
– បន្តរក្សាសាមគ្គីភាព ឯកភាពផ្ទៃក្នុង ការពារសុខសន្តិភាព និងការពារសម្តេចតេជោ ដែលជាស្ថាបនិក និងបិតាសន្តិភាព
– រួមគ្នាតម្កល់ផលប្រយោជន៍ជាតិជាធំ និងធ្វើឲ្យស្ថាប័នអាជ្ញាធរមីនមានទំនេីបនីយកម្ម
– ធ្វើការដោយអនុវត្តន៍តាមតួអង្គចំនួន ៥ រួមមាន ៖ រាជរដ្ឋាភិបាល អាជ្ញាធរមីន អគ្គលេខាធិការ នាយកដ្ឋាន និងមន្ត្រីបុគ្គលិក
– ប្រមូលផ្ដុំគ្នាដេីម្បីបញ្ចប់ការងារដែលនៅសេសសល់នៅឆ្នាំ២០២០
– ត្រៀមរៀបចំរបាយការណ៍ប្រចាំឆ្នាំ និងរបាយការណ៍ ៥ឆ្នាំ
– បន្តយកចិត្តទុកដាក់លេីបុគ្គលិកចាស់ជារៀមច្បង
– ធ្វេីការកែលម្អការងារមួយចំនួន
ឆ្លៀតក្នុងឱកាសនោះ ឯកឧត្តម ទេសរដ្ឋមន្ត្រី លី ធុជ បានជម្រុញឲ្យថ្នាក់ដឹកនាំ មន្ត្រី បុគ្គលិកអាជ្ញាធរមីនទាំងអស់ ត្រូវបន្តយកចិត្តទុកដាក់ខ្ពស់ និងលេីកកម្ពស់ប្រសិទ្ធភាពការងារ ដោយត្រូវកំណត់ឲ្យបានច្បាស់នូវការងារណាជាការងារអាទិភាព និងស្នូលរបស់នាយកដ្ឋាននីមួយៗ។ លោកបានបន្តជម្រុញឲ្យមានការលើកកម្ពស់ភាពជាដៃគូ និងកិច្ចសហប្រតិបត្តិការរវាងថ្នាក់ជាតិ ក្រោមជាតិ ដៃគូ ប្រតិបត្តិករជាតិ-អន្តរជាតិ និងស្ថាប័នជាតិ-អន្តរជាតិ ផងដែរ។
ទេសរដ្ឋមន្ត្រី បានណែនាំឲ្យថ្នាក់ដឹកនាំ មន្ត្រីបុគ្គលិកអាជ្ញាធរមីនទាំងអស់ ត្រូវប្រកាន់យកគោលការណ៍ ៥ ចំណុច ដេីម្បីពង្រឹងប្រសិទ្ធភាពការងារនៅក្នុងស្ថាប័ន ៖
– យកចិត្តទុកដាក់ខ្ពស់ពោរពេញដោយក្តីគោរពស្រឡាញ់
– ផ្តល់ភាពជឿទុកចិត្តបាន
– មានការប្តេជ្ញាចិត្តខ្ពស់ ចំពោះគុណតម្លៃ គោលដៅ និងស្តង់ដាររបស់យើង
– ធ្វើការជាប្រចាំ
– ឲ្យមានភាពក្លាហាន ចំពោះអ្វីដែលបានធ្វើ ផែនការរបស់យេីង និងជំនះនូវអ្វីដែលយើងមិនចង់ធ្វើ៕
