ខេត្តកណ្តាល ៖ ទូលព្រះបង្គំ ខ្ញុំព្រះករុណា ខ្ញុំបាទ និង ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្ត អមដំណើរដោយ ឯកឧត្តម លោកជំទាវ សមាជិកក្រុមប្រឹក្សាខេត្ត ឯកឧត្តម លោកជំទាវអភិបាលរងខេត្ត មានមហាកិត្តិយសដ៏ឧត្តុង្គឧត្តមយ៉ាងក្រៃលែងជាទីបំផុត ដោយបានដឹកនាំ លោក លោកស្រីថ្នាក់ដឹកនាំមន្ទីរ អង្គភាពជំនាញជុំវិញខេត្ត ថ្នាក់ដឹកនាំមន្ត្រីរាជការអាជ្ញាធរក្រុង-ស្រុកទាំង១១ នៃរដ្ឋបាលខេត្តកណ្តាល ចូលរួមក្នុងព្រះរាជពិធីសម្ពោធដាក់ឱ្យប្រើប្រាស់ជាផ្លូវការប៉ុស្តិ៍សុខភាព សម្តេចព្រះមហាសង្ឃរាជ បួរ គ្រី-ព្រះករុណាព្រះមហាក្សត្រ សីហមុនី ដែលបានប្រារព្ធធ្វើឡើងនៅវត្តព្រះឥន្ទសាមគ្គីធម៌ ស្ថិតនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ក្រោមព្រះរាជាធិបតីភាពដ៏ខ្ពង់ខ្ពស់បំផុត របស់ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុតរបស់ប្រជារាស្ត្រខ្មែរ នាព្រឹកថ្ងៃសៅរ៍ ១រោជ ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី០៣ ខែតុលា ឆ្នាំ២០២០។
ក្នុងព្រះរាជពិធីដ៏វិសេសវិសាលឧត្តុងឧត្តមថ្លៃថ្លាជាប្រវត្តិសាស្ត្រសម្រាប់ខេត្តកណ្តាលនាថ្ងៃនេះ មានការ និមន្ត យាង និងអញ្ជើញចូលរួម ដ៏ខ្ពង់ខ្ពស់បំផុតពី សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ជាទីសក្ការៈ សម្តេចព្រះរាជគណៈព្រះគ្រូឋានា ព្រះថេរានុត្ថរៈជាទីសក្ការៈគ្រប់ព្រះអង្គ សម្តេចវិបុលសេនាភក្ដី សាយ ឈុំ ប្រធានព្រឹទ្ធសភាជាតិ នៃព្រះរាជាណាចក្រកម្ពុជា សម្តេចចៅហ្វាវាំងវរវៀងជ័យអធិបតីស្រឹង្គារ គង់ សំអុល ឧបនាយករដ្ឋមន្ដ្រី រដ្ឋមន្ដ្រីក្រសួងព្រះបរមរាជវាំង សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ សម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ ឯកឧត្តមកិតិ្តនីតិកោសលបណ្ឌិត អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល និង ឯកឧត្ដម លោកជំទាវ ឯកអគ្គរាជទូត ឯកអគ្គរដ្ឋទូតនានាប្រចាំនៅព្រះរាជាណាចក្រកម្ពុជា ឯកឧត្តម លោកជំទាវគណៈប្រតិភូជាន់ខ្ពស់ លោកឧកញ៉ា លោក-លោកស្រី សប្បុរសជន ព្រះមន្ត្រីសង្ឃ មន្ត្រីរាជការគ្រប់លំដាប់ថ្នាក់ ព្រមទាំងប្រជាពលរដ្ឋទូទាំងខេត្តកណ្តាលជាច្រើនអង្គ/នាក់។
ស្ថិតក្នុងឱកាសដ៏មហានក្ខត្តឫក្សឧត្តុង្គឧត្តមថ្លៃថ្លានាពេលនេះ ទូលព្រះបង្គំ ខ្ញុំព្រះករុណា ខ្ញុំបាទតាងនាម ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ ព្រះសង្ឃ និងប្រជារាស្ដ្រទូទាំងខេត្តកណ្ដាល មានសេចក្ដីសោមនស្សរីករាយយ៉ាងក្រៃលែងបំផុត ដោយបានទទួលព្រះរាជបដិសណ្ឋារកិច្ចស្វាគមន៍ ព្រះរាជ ដំណើរយាងរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាងជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធី សម្ពោធដាក់ឱ្យ ប្រើប្រាស់ជាផ្លូវការ ប៉ុស្ដិ៍សុខភាព ដ៏មានសារៈសំខាន់បំផុតនាថ្ងៃនេះ។
ក្នុងមនោសញ្ចេតនាប្រកបដោយសេចក្តីសោមនស្សរីករាយ ដ៏ក្រៃលែងនេះ តាងនាម ទូលព្រះបង្គំ ខ្ញុំព្រះករុណា ខ្ញុំបាទ ជាថ្នាក់ដឹកនាំ មន្ត្រីរាជការគ្រប់លំដាប់ថ្នាក់ កងកម្លាំងប្រដាប់អាវុធ ព្រះសង្ឃ និងប្រជារាស្ដ្រទូទាំងខេត្តកណ្ដាល សូមក្រាបថ្វាយបង្គំ និងគោរពថ្លែងអំណរគុណជាអនេកអនន្តបំផុត ចំពោះសម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ដែលបានយកព្រះទ័យទុកដាក់ ដឹកនាំ និងបានបរិច្ចាគព្រះរាជទ្រព្យផ្ទាល់ព្រះអង្គដើម្បីទ្រទ្រង់ដំណើរការវិស័យសុខាភិបាល រហូតសម្រេចបាននូវសមិទ្ធិផលជាផ្លែផ្កាដូចបានឃើញនាពេលនេះ ប្រកបដោយភាពជោគជ័យគួរជាទីមោទនះ។
ក្នុងឱកាសដ៏វិសេសវិសាលជាប្រវត្តិសាស្ត្រ ដែលព្រះអង្គបានផ្តល់ព្រះរាជកិត្តិយសយាងគង់ប្រថាប់ជាព្រះរាជាធិបតីភាពដ៏ខ្ពង់ខ្ពស់បំផុត ក្នុងព្រះរាជពិធី សម្ពោធដាក់ឱ្យប្រើប្រាស់ជាផ្លូវការ ប៉ុស្ដិ៍សុខភាព ដ៏ប្រពៃនេះ ទូលព្រះបង្គំ ខ្ញុំព្រះករុណា សូមព្រះបរមរាជានុញ្ញាតលើកហត្ថប្រណមបួងសួងដល់គុណបុណ្យ ព្រះរតនត្រ័យកែវទាំងបី វត្ថុស័កិ្តសិទ្ធិទាំងឡាយក្នុងលោក ឫទ្ធិបារមីទេវតាថែរក្សាព្រះមហាស្វេតឆត្រ ព្រមទាំងបុណ្យបារមី នៃដួងព្រះវិញ្ញាណក្ខន្ធអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ ជាពិសេសឫទ្ធិបារមី នៃដួងវិញ្ញាណក្ខន្ធ ព្រះករុណាព្រះបាទសម្ដេចព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ សូមព្រះអង្គតាមជួយបីបាច់ថែរក្សាអភិបាល ប្រោះព្រំនូវសព្វសារធុការពរបវរមហាប្រសើរ ថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និង សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល សូមព្រះអង្គទ្រង់សមប្រកបដោយព្រះរាជសុខុមាលភាពល្អបរិបូរណ៍ ព្រះកាយពលមាំមួន ព្រះជន្មាយុយឺនយូរជាងរយព្រះវស្សា ទ្រង់គង់ជាព្រះបរមសុខ ក្រោមព្រះមហាស្វេតឆត្រសិរីរាជសម្បត្តិ ជាមហាម្លប់ដ៏ត្រជាក់ត្រជុំ និងសុខក្សេមក្សាន្ត ដល់ប្រជារាស្ដ្រ ខ្មែរ ដែលជាកូន ចៅ ចៅទួត ជានិច្ចនិរន្តរ៍ តរៀងទៅ ។
សូមគោរពជូនពរដល់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងក្រុមគ្រួសារ បានសមប្រកបនូវ សុខភាពល្អបរិបូរណ៍ អាយុយឺនយូរ កម្លាំងខ្លាំងក្លា ប្រាជ្ញាឈ្លាសវៃ និងទទួលបានជោគជ័យធំធេងថ្មីៗបន្ថែមទៀត និងសូមគោរពជូនពរ សម្តេច ឯកឧត្ដម លោកជំទាវ លោកឧកញ៉ា លោក លោកស្រី ជាភ្ញៀវកិត្ដិយស ទាំងអស់ សូមសមប្រកបនឹងពុទ្ធពរបួនប្រការ គឺអាយុ វណ្ណៈ សុខៈ និង ពលៈ កុំបីឃ្លៀងឃ្លាតឡើយ៕
