(ភ្នំពេញ) ÷មានកូនកញ្ជ្រែងឆ្នោតវៀតណាមប្រមូលឱ្យមេធំឈ្មោះលោក ខ្នា ជាឧកញ៉ា អតតីឈ្មួញឈើដ៏ល្បីមួយរូប បន្ទាប់ពីសមត្ថកិច្ចចាប់បានមួយចំអិនកំពឹសក៏លែងមកវិញបើកលេងធំជាងមុន។
សូមរំលឹកថា កាលពីរសៀលថ្ងៃទី១២ ខែសីហា ឆ្នាំ២០២០ ដោយកម្លាំងនគរបាលនៃអធិការខណ្ឌឬស្សីកែវ សហការជាមួយនគរបាលរដ្ឋបាលប៉ុស្តិ៍ទួលសង្កែទី០១ ចុះចាប់កន្លែងកត់ឆ្នោតវៀតណាមរបស់លោកស្រី ចរិយា ឃាត់ខ្លួនទាំងអ្នកកត់ និងអ្នកចាក់ជិត១០នាក់ នៅក្នុងអតីតតូបលក់ចានឆ្នាំងមួយកន្លែងខាងលិចផ្សារធំថ្មីទួលសង្កែ ហៅ (ផ្សារសាំហាន់) ជាប់នឹងផ្លូវលេខ១០៥ ស្ថិតនៅក្នុងភូមិបាក់ទូក សង្កាត់ទួលសង្កែទី១ ខណ្ឌឬស្សីកែវ។
ទាក់ទងករណីនេះលោក ហ៊ាង ថារ៉េត អធិការខណ្ឌឬស្សីកែវ បានឱ្យដឹងនៅល្ងាចថ្ងៃចាប់នោះថា កំពុងសុំគោលការណ៍ថ្នាក់លើបន្តទៀត។ តែក្រោយមកក៏បានលែងវិញអស់ហើយនៅយប់ថ្ងៃដដែល។
តាមប្រភពព័ត៌មានដែលយើងខ្ញុំទទួលបានន្ថែមឱ្យដឹងទៀតថា ទីតាំងកត់ឆ្នោតខ្មែរ បង្កប់ឆ្នោតវៀតណាមខាងលើ សមត្ថកិច្ចត្រឹមខណ្ឌ ឬប៉ុស្ដិ៍ មិនហ៊ានប៉ះនោះទេ ទាល់តែកម្រិតធំជាងនេះ។ មិនដឹងថាមានអ្វីនៅពីក្រោយវាំងននខ្មៅនៃល្បែងខុសច្បាប់នេះ ទើបគេនៅតែបើកលេងបានវិញជាញឹកញាប់ ទោះជាឃើញរូបភាពសមត្ថកិច្ចចុះមកបង្ក្រាបច្រើនដងក្ដី ពោលគឺមុខសញ្ញាដដែលៗ ចាប់ហើយលែងមិនតិចជាង២ដងនោះទេ ក្រោយមកបានមួយចំអិនកំពឹសក៏បើកវិញយ៉ាងរំភើយ។
ក្នុងនោះត្រូវគេបង្ហើបឱ្យដឹងថា មានមេធំជាចាំជួយរត់ការគឺលោក ខ្នាជាមេឈ្មួញឈើ និងលោក ព្រីង ដែលអ្នកទាំងពីរជាអ្នកសហការរីករាយនឹងគ្នា(លាក់មុខ) តើការពិតយ៉ាងណាសូមអ្នកដែលពាក់ព័ន្ធជួយបញ្ជាក់ផង?
ទាក់ទងករណីខាងលើលោក សាន សីហា អ្នកនាំពាក្យស្នងការរាជធានីភ្នំពេញ មិនទាន់សូមការបញ្ជាក់បាននៅឡើយនៅព្រឹកថ្ងៃទី០១ ខែតុលា ឆ្នាំ២០២០ ដោយលោកមិនទាន់ឆ្លើយតបសំណួរដែលក្រុមការងារយើងបានផ្ញើជូន៕
