(បាត់ដំបង)-នៅព្រឹកថ្ងៃ អាទិត្យ ១០កើត ខែអស្សុជឆ្នាំជូតទោស័កព.ស.២៥៦៤ត្រូវនឹងថ្ងៃទី២៧ខែ កញ្ញាឆ្នាំ២០២០ អនុវត្តតាមលក្ខន្តិកៈសមាគមមិត្តនគរបាលជាតិកម្ពុជា លោកឧត្តមសេនីយ៍ត្រី សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងនិងជាប្រធានគណៈកម្មាធិការមូលដ្ឋានសមាគមមិត្តនគរបាលជាតិកម្ពុជានៃស្នងការដ្ឋាននគរបាលខេត្តបាត់ដំបង បានប្រគល់ថវិកាសមាគមមិត្តនគរបាលជាតិ កម្ពុជាជូនដល់ក្រុមគ្រួសារសពលោក ជិន លី ជានិវត្តជន៍ អតីតអធិការរងនៃអធិការដ្ឋាននគរបាលស្រុកបាណន់ ដែលលោកបានទទួលមរណៈភាពកាលពីយប់ថ្ងៃទី ២៥ ខែ កញ្ញា ឆ្នាំ២០២០វេលាម៉ោង ១៩និង០២នាទីក្នុងអាយុ ៦៦ឆ្នាំ ដោយរោគាពាធ ហើយសពកំពុងតំកល់ធ្វើបុណ្យក្នុងលំនៅដ្ឋានស្ថិតនៅភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ។
ក្នុងពេលជាមួយគ្នានេះក្រុមការងារសមាគមអតីតយុទ្ធជនកម្ពុជាក្រុងបាត់ដំបងដែលមានលោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបងនិងជាប្រធានសមាគមបានដឹកនាំក្រុមការងារទៅចូលរួមប្រគល់ថវិកាសមាគមនាពេលនោះដែរ។
ថវិកាសមាគមមិត្តនគរបាលជាតិកម្ពុជាចំនួន៦,០០០,០០០រៀល(ប្រាំមួយលានរៀល) ថវិការបស់សមាគមអតីតយុទ្ធជនកម្ពុជាចំនួន៤,០០០,០០០រៀល(បួនលានរៀល) ថវិកាផ្ទាល់របស់លោកស្នងការចំនួន២០០ដុល្លា អង្ករចំនួន៥០គីឡូក្រាម ភេសជ្ជៈចំនួន០៤កេស ទឹកបរិសុទ្ធចំនួន០៤កេស បានប្រគល់ជូនក្រុមគ្រួសារសពដើម្បីបានចាត់ចែងប្រើប្រាស់ក្នុងពិធីបុណ្យនេះ ។
ក្នុងនាមសមាគមមិត្តនគរបាលជាតិកម្ពុជាខេត្តលោកឧត្តមសេនីយ៍ត្រី សាត គឹមសាន បានពាំនាំនូវការផ្តាំផ្ញើចូលរួមរំលែកទុក្ខពីសំណាក់ថ្នាក់ដឹកនាំក្រសួងមហាផ្ទៃដែលមានសម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃនិងជាប្រធានកិត្តិយសសមាគមមិត្តនគរបាលជាតិកម្ពុជា ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិនិងជាប្រធាសមាគមមិត្តនគរបាលជាតិកម្ពុជាព្រមទាំងឯកឧត្តមនាយឧត្តមសេនីយ៍ ប៉ែន វិបុល អគ្គស្នងការរងនគរបាលជាតិប្រធាននាយកដ្ឋានបុគ្គលិកនិងជាអគ្គលេខាធិការសមាគមមិត្តនគរបាលជាតិកម្ពុជានិងថ្នាក់ដឹកនាំស្នងការដ្ឋាននគរបាលខេត្តបាត់ដំបងចំពោះក្រុមគ្រួសារសព។
ជាមួយនេះដែរ ថ្នាក់ដឹកនាំសមាគមអតីតយុទ្ធជនកម្ពុជាលោកបានយកចិត្តទុកដាក់បំផុតចំពោះសមាជិកនិងក្រុមគ្រួសារសមាជិកសមាគម ជាក់ស្តែងក្នុងឱកាសនេះក្នុងនាមថ្នាក់ដឹកនាំសមាគមលោកបាននាំយកនូវវិកាសមាគមមកប្រគល់ជូនក្រុមគ្រួសារសពដើម្បីបានចាត់ចែងនិងប្រើប្រាស់ក្នុងកម្មវិធីបុណ្យផងដែរ។
ក្នុងឱកាសនេះដែរ ក្រុមគ្រួសារសពបានសម្តែងនូវអំ ណរគុណយ៉ាងជ្រាលជ្រៅចំពោះការយកចិត្តទុកដាក់គឹតគូរពីសុខទុក្ខនិងការលំបាករបស់ក្រុមគ្រួសារសមាជិកសមាគមមិត្តនគរបាលជាតិកម្ពុជា ក៏ដូចក្រុមគ្រួសារសមាជិកសមាគមអតីតយុទ្ធជនកម្ពុជាពីសំណាក់ថ្នាក់ដឹកនាំគ្រប់ថ្នាក់នៃសមាគមមិត្តនគរបាលជាតិកម្ពុជារួមទាំងថ្នាក់ដឹកនាំសមាគមអតីតយុទ្ធជនកម្ពុជាផង ៕
