(ខេត្តកំពត)÷ គ្រួសារប្រជាពលរដ្ឋរងគ្រោះ ដោយខ្យល់កន្ត្រាក់បង្កឲ្យខូចខាត និងរលំផ្ទះសំបែង ចំនួន២២គ្រួសារ នៅក្នុងឃុំកូនសត្វ ស្រុកទឹកឈូ ខេត្តកំពត បានទទួលអំណោយមនុស្សធម៌កាកបាទក្រហមកម្ពុជា។ ស្របពេលជាមួយគ្នានេះដែរស្ពានបេតុងមួយកន្លែងទៀត ត្រូវបានក្រុមការងារស្រុកទឹកឈូ ឧបត្ថម្ភថវិកាសាងសង់ជូនពលរដ្ឋប្រើប្រាស់ផងដែរ កាលពីថ្ងៃថ្ងៃទី២២ ខែកញ្ញា ឆ្នាំ២០២០។
ពិធីនេះស្ថិតក្រោមវត្តមាន លោក អុឹង ឆាយ អភិបាលរងខេត្ត តតំណាងលោក ជាវ តាយ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពត ព្រមទាំងមានការចូលរួមពីសមាជិកសាខា អនុសាខា និងមន្ត្រីស្ម័គ្រចិត្តកាកបាទក្រហមថ្នាក់មូលដ្ឋាន ដោយបាននាំយកនូវអំណោយមនុស្សធម៌កាកបាទក្រហមកម្ពុជាផ្តល់ជូនដល់ គ្រួសារប្រជាពលរដ្ឋរងគ្រោះដោយខ្យល់កន្ត្រាក់ រលំផ្ទះ និងប៉ើងដំបូល ចំនួន២២គ្រួសារ នៅក្នុងភូមិចំនួន៣ គឺនៅភូមិកំពង់នង់ចំនួន១៩ គ្រួសារ ភូមិកំពង់ត្នោត១គ្រួសារ និងភូមិកូនសត្វចំនួន២គ្រួសារ (រលំផ្ទះទាំងស្រុង១គ្រួសារ)។
លោក អ៊ឹង ឆាយ បានសំដែងការចូលរួមសោកស្ដាយ ជាមួយគ្រួសារប្រជាពលរដ្ឋរងគ្រោះព្រមទាំងបានពាំនាំការសួរសុខទុក្ខរបស់ឯកឧត្តម ជាវ តាយ ប្រធានគណៈកម្មាធិការសាខា និងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែគិតគូរពីសុខទុក្ខរបស់បងប្អូនប្រជាពលរដ្ឋជួបការលំបាក ជនងាយរងគ្រោះ និងរងគ្រោះដោយគ្រោះមហន្តរាយផ្សេងៗ និងជនចាស់ជរាគ្មានទីពឹង ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ។
ក្នុងឱកាសនោះលោកបានលើកទឹកចិត្តដល់ពលរដ្ឋរងគ្រោះ សូមកុំអស់សង្ឃឹម ត្រូវខិតខំបង្កបង្កើនផលកសិកម្ម ដើម្បីបង្កើនជីវភាពគ្រួសារ ហើយយើងត្រូវខិតខំយកចិត្តទុកដាក់ ប្រកាន់យកនូវ អនាម័យល្អ រស់នៅស្អាត ហូបស្អាត ផឹកស្អាត ពិសេសអនុវត្តនូវវិធានការបង្ការទប់ស្កាត់ជំងឺកូវីដ១៩កុំឲ្យរីករាលដាល។
ចំពោះអំណោយកាកបាទក្រហម ផ្ដល់ជូនគ្រួសាររងគ្រោះទាំង ២២គ្រួសារនៅពេលនេះ ក្នុងមួយគ្រួសារអង្ករ២៥គីឡូ មី១កេះ ទឹកស៊ីអ៊ីវ១យួរ និងថវិកាចំនួន៩ ម៉ឺនរៀល សម្រាប់២១គ្រួសារ និងមួយគ្រួសារដែលរលំផ្ទះចំនួន១៥ម៉ឺនរៀល។ដោយឡែក លោក អុឹង ឆាយ បានជួយកសាងផ្ទះដល់ស្ត្រីរងគ្រោះរលំផ្ទះទាំងស្រុងនោះឡើងវិញផងដែរ។
ក្រោយប្រគល់ជូនអំណោយកាកបាទក្រហម លោក អ៊ឹង ឆាយ បានបន្តដំណើរ ទៅពិនិត្យស្ពាន និងបានឧបត្ថម្ភថវិកាសម្រាប់ជួយការសាងសង់ស្ពានបេតុងមួយកន្លែង សម្រាប់ឆ្លើយតបតាមការស្នើសុំរបស់ប្រជាពលរដ្ឋក្នុងមូលដ្ឋាន ដែលស្ពាននេះមានប្រវែង១២ ម៉ែត្រ ទទឹង៤ម៉ែត ដើម្បីបង្កភាពងាយស្រួលក្នុងធ្វើដំណើរឆ្លងកាត់និងដឹកកសិផលពលរដ្ឋនៅតំបន់នោះ៕ សេង ណារិទ្ធ
