ព្រះវិហារ ៖ បន្ទាប់ពីគណៈកម្មាធិការជាតិដើម្បីទប់ស្កាត់និងបង្ក្រាបបទល្មើសព្រៃឈើនិងធនធានធម្មជាតិបានចុះបង្ក្រាបដោយចាប់បានឧកញ៉ា២នាក់ក្នុងនោះមានឧកញ៉ាគង់ក្រឹងនិងឧកញ៉ាស៊ឹងសំអុលនិងអ្នកពាក់ព័ន្ធមួយចំនួនទៀតផងនោះបច្ចុប្បន្ននេះឈ្មួញ៤នាក់គឺឈ្មួញឈ្មោះ ឃឿន, ឈ្មួញឈ្មោះ ឆាត, ឈ្មួញឈ្មោះ បញ្ញានិងឈ្មួញឈ្មោះធី ចាប់ផ្តើមធ្វើសកម្មភាពដឹកជញ្ជូនឈើពីខេត្តព្រះវិហារឆ្លងកាត់ផ្លូវជាតិលេខ៦២ចូលទៅខេត្តកំពង់ធំឡើងកក្រើក បានធ្វើការរិះគន់ចំៗមកថា បច្ចុប្បន្ននេះ បទល្មើសព្រៃឈើបានកំពុងតែសម្រុកកើតមានយ៉ាងពេញបន្ទុកគួរឲ្យបារម្ភ ឈ្មួញដឹងពីខេត្តព្រះវិហារចូលមកខេត្តកំពង់ធំនិងបង្ហួសទៅកាន់បណ្ដាខេត្តនានាជាប់ព្រំប្រទល់ប្រទេសវៀតណាម។
ចំណែកលោក ពឹង ទ្រីដា ប្រធានមន្ទីរកសិកម្មខេត្តព្រះវិហារ និងលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារមិនចាត់វិធានការបង្ក្រាបក្រុមឈ្មួញដឹកជញ្ជូនឈើខុសច្បាប់ទាំង៤នាក់នោះឡើយ ។
សេចក្តីរាយការណ៍ពីប្រជាពលរដ្ឋក្នុងស្រុករវៀងខេត្តព្រះវិហារបានឲ្យដឹងថា ឈ្មួញឈ្មោះ ឃឿន, ឈ្មួញឈ្មោះ ឆាត, ឈ្មួញឈ្មោះ បញ្ញា និងឈ្មួញឈ្មោះ ធី ដឹកជញ្ជូនឈើពីតំបន់ព្រៃព្រះរកា និងព្រៃឡង់ ឆ្លងកាត់មុខស្នាក់ការផ្នែករដ្ឋបាលព្រៃឈើរវៀង ផ្លូវជាតិលេខ៦២ស្រុករវៀង ខេត្តព្រះវិហារ ចូលទៅខេត្តកំពង់ធំ យ៉ាងពេញបន្ទុក។
ប្រភពខ្លះបានឲ្យដឹងថា ប្រសិនបើគ្មានការឃុបឃិតបើកដៃពីសំណាក់ លោកស៊ុំ ស៊ីវុត្ថាហៅតាវ៉ែនតានាយផ្នែករដ្ឋបាលព្រៃឈើរវៀង ទេនោះគឺឈ្មួញឈ្មោះ ឃឿន, ឈ្មួញឈ្មោះ ឆាត, ឈ្មួញឈ្មោះ បញ្ញា និងឈ្មួញឈ្មោះ ធី មិនអាចដឹកជញ្ជូនឈើឆ្លងកាត់មុខស្នាក់ការផ្នែករដ្ឋបាលព្រៃឈើរវៀងបានឡើយ ។
ប្រភពស្និទ្ធនឹងលោកស៊ុំ ស៊ីវុត្ថា នាយផ្នែករដ្ឋបាលព្រៃឈើរវៀងបានឲ្យដឹងថា ទាល់តែមានការសម្របសម្រួលពីសំណាក់លោកពឹង ទ្រីដា ប្រធានមន្ទីរកសិកម្មខេត្តព្រះវិហារនិងលោកនួន សុខុមនាយខណ្ឌរដ្ឋបាលព្រៃឈើខេត្តព្រះវិហារទើបលោកស៊ុំ ស៊ីវុត្ថាហ៊ានបើកដៃឲ្យឈ្មួញឈ្មោះ ឃឿន, ឈ្មួញឈ្មោះ ឆាត, ឈ្មួញឈ្មោះ បញ្ញា និងឈ្មួញឈ្មោះ ធី ដឹកជញ្ជូនឈើយ៉ាងរលូន។
ប្រភពពីសមត្ថកិច្ចពាក់ព័ន្ធនៅក្នុងខេត្តព្រះវិហារបានឲ្យដឹងថាលើផ្លូវជាតិលេខ៦២ ពីខេត្តព្រះវិហារចូលទៅខេត្តកំពង់ធំ មានស្នាក់ការត្រួតពពិនិត្យរបស់មន្ត្រីជំនាញនិងសមត្ថកិច្ចពាក់ព័ន្ធជាច្រើនស្ថាប័ន ជាពិសេសមន្ត្រីរដ្ឋបាលព្រៃឈើនៅស្នាក់ការផ្នែករដ្ឋបាលព្រៃឈើរវៀង ។ ប៉ុន្តែមន្ត្រីជំនាញនិងសមត្ថកិច្ចពាក់ព័ន្ធមិនបានចាត់វិធានការបង្ក្រាបក្រុមឈ្មួញដឹកជញ្ជូនឈើខុសច្បាប់នោះទេហើយឈ្មួញឈ្មោះ ឃឿន,ឈ្មួញឈ្មោះ ឆាត, ឈ្មួញឈ្មោះ បញ្ញា និងឈ្មួញឈ្មោះ ធីកំពុងបង្កើនសកម្មភាពដឹកជញ្ជូនឈើពីខេត្តព្រះវិហារ ចូលខេត្តកំពង់ធំ យ៉ាងគំហុកតែម្តង។ភាពវិជ្ជមាននឹងភាពមិនប្រក្រតីជាច្រើនពាក់ព័ន្ធនឹងជំនួញឈើដែលកំពុងល្បី កក្រើកដល់ប្រជាពលរដ្ឋនិងមន្ត្រីរាជការទូទាំងខេត្តកំពង់ធំនិងខេត្តព្រះវិហារមានការរិះគន់យ៉ាងចាស់ដៃ ចំពោះសមត្ថកិច្ចនិងអាផ្ញាធរដែលលើកទឹកចិត្តនិងបើកដៃឱ្យមេឈ្មួញជាច្រើននាក់ដែលកេណ្ឌកម្លាំងចូលទៅកាប់បំផ្លាញព្រៃឡង់និងព្រៃឈើនៅតំបន់ហាមឃាត់ផ្សេងៗជាច្រើនទៀតក្នុង ខេត្តកំពង់ធំ និងខេត្តព្រះវិហារនោះ ។ តើករណីនេះជាភាពកម្សោយរបស់អភិបាលខេត្តសាម៉ីទាំងពីរឬជាការបើកភ្លើងខៀវដើម្បីទទួលបាននូវលាភសក្ការៈ ?
ប្រជាពលរដ្ឋអ្នករកស៊ីជាលក្ខណៈគ្រួសារបន្តិចបន្តិចស្នើសុំមកអង្គភាពយើងធ្វើការផ្សព្វផ្សាយរិះគន់ក្នុងន័យស្ថាបនា ក៏ដូចជាសារមួយផ្ញើទៅកាន់ថ្នាក់ដឹកនាំដើម្បីធ្វើការត្រួតពិនិត្យនិងចាត់វិធានការបង្ក្រាបប្រកបដោយប្រសិទ្ធភាពខ្ពស់។ពាក់ព័ន្ធព័ត៌មានខាងលើនេះគិតត្រឹមម៉ោងផ្សាយនេះអង្គភាពសារព័ត៌មាននៅមិនទាន់ទទួលបានសុំការបំភ្លឺពីអ្នកពាក់ព័ន្ធបាននៅឡើយទេ ៕
