(ខេត្តកំពត)៖ នៅព្រឹកថ្ងៃទី២១ ខែកញ្ញាឆ្នាំ២០២០ រដ្ឋបាលខេត្តកំពត បានបើកកិច្ចប្រជុំគណៈបញ្ជាការឯកភាពរដ្ឋបាលខេត្តប្រចាំខែសីហា ឆ្នាំ២០២០ លើកទី២៩ ក្រោមអធិបតីភាព លោក ជាវ តាយ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត។
កិច្ចប្រជុំផ្តោតសំខាន់ លើការពិនិត្យពិភាក្សា ស្ដីពីការអនុវត្តច្បាប់ចរាចរណ៍ផ្លូវគោក បញ្ហាគ្រឿងញៀន ការអនុវត្តគោលនយោបាយភូមិឃុំមានសុវត្ថិភាព និងបញ្ហាសន្តិសុខសណ្ដាប់ធ្នាប់ ស្ថានភាពទេសចរណ៍នៅក្នុងខេត្តកំពតអំឡុងពេលភ្ជុំបិណ្ឌរួមនិងបញ្ហាប្រឈមសំណូមពរតម្រូវការនៅមូលដ្ឋានដើម្បីធ្វើយ៉ាងណារួមគ្នាដោះស្រាយនិងអនុវត្តឱ្យមានប្រសិទ្ធភាព តម្លាភាព។
មានប្រសាសន៍ក្នុងកិច្ចប្រជុំ លោក ជាវ តាយ អភិបាលខេត្ត បានកោតសរសើរ វាយតម្លៃខ្ពស់ចំពោះលទ្ធផលការងារ ដែលមន្ទីរអង្គ ភាព កងកម្លាំងសមត្ថកិច្ច និងអាជ្ញាធរ ក្រុង ស្រុក បានសហការអនុវត្តសម្រេចលទ្ធផលការងារបានល្អប្រសើរក្នុងរយៈពេល ជាង៨ខែឆ្នាំ២០២០នេះគួរឲ្យកត់សម្គាល់សម្រាប់រដ្ឋបាលខេត្តកំពត។ ក្នុងនោះរក្សាការពារ ធានាបាននូវសន្តិសុខសណ្ដាប់ធ្នាប់សង្គម ដោះស្រាយបាន រាល់បញ្ហាប្រឈម សំណូមពរ តម្រូវការ ជូនប្រជាពលរដ្ឋ ជួបការលំបាក ដោយគ្រោះធម្មជាតិឬបញ្ហាផ្សេងៗនៅមូលដ្ឋានបានទាន់ពេលវេលា។ ពិសេសក្នុងឱកាសភ្ជុំបិណ្ឌឈប់សម្រាករយៈពេល៥ថ្ងៃនេះ ខេត្តកំពតទទួលបានភ្ញៀវទេសចរជាង៨ម៉ឺននាក់ បានជាប់ជាចំណាត់ថ្នាក់លេខ៣ទូទាំងប្រទេសតាមការវាយតម្លៃរបស់ក្រសួងទេសចរណ៍។
លោកអភិបាលខេត្តបានបញ្ជាក់ថា លទ្ធផលទាំងនេះផ្ដើមចេញពីកិច្ចខិតខំរបស់ កងកម្លាំងមានសមត្ថកិច្ចគ្រប់ជាន់ថ្នាក់ ជំនាញពាក់ព័ន្ធនិងអាជ្ញាធរក្រុង ស្រុកបានរួមសហការគ្នា អនុវត្តផែនការ ការងាររដ្ឋបាលខេត្តបានល្អ ដោយពុំមានបាតុភាពអសកម្ម ឬបទល្មើសនិងបញ្ហាធំដុំឡើយ ថែមទាំងរក្សាបាននូវសន្តិសុខសណ្ដាប់ធ្នាប់ តាមដងផ្លូវសាធារណៈ តាមមូលដ្ឋាន ពិសេសការអនុវត្តវិធានការបង្ការទប់ស្កាត់ជំងឺកូវីដ១៩ តាមការអំពាវនាវរបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាលប្រកបដោយប្រសិទ្ធភាពពុំមានការឆ្លងនៅក្នុងសហគមន៍ឡើយ។
ក្នុងឱកាសនោះពាក់ព័ន្ធនឹងការកាត់ឆ្វៀលដី ក្នុងតំបន់ការពារធម្មជាតិជូនប្រជាពលរដ្ឋដែលបានកាន់កាប់អាស្រ័យផលជាក់ស្ដែងយូរឆ្នាំកន្លងមក ដែលផែនការនេះអនុវត្តតាមប្រសាសន៍ណែនាំដ៏ខ្ពង់ខ្ពស់របស់សម្ដេចតេជោហ៊ុន សែនប្រមុខរាជរដ្ឋាភិបាល។ ជាមួយនេះ លោក ជាវ តាយ អភិបាលខេត្ត ក៏បានក្រើនរំលឹក ដល់មន្ត្រីនៃមន្ទីរអង្គភាពនិងអាជ្ញាធរទ្រង់ស្រុកពាក់ព័ន្ធ ត្រូវមានការយកចិត្តទុកដាក់ទទួលខុសត្រូវខ្ពស់ចំពោះការងារនេះប្រកបដោយតម្លាភាពប្រសិទ្ធភាព។ ហើយបើមានមន្ត្រីណា មានការអនុវត្តផ្ទុយពីការណែនាំរបស់ប្រមុខរាជរដ្ឋាភិបាល ដែលធ្វើឱ្យលេចចេញជាបាតុភាពអសកម្ម សូមប្រញាប់ដកខ្លួនចេញនិងអនុវត្តឲ្យមានការប្រុងប្រយ័ត្ន ហើយអាជ្ញាធរក៏មិនត្រូវចុះហត្ថលេខា បញ្ជាក់លើឯកសារពាក់ព័ន្ធនឹងការកាត់ឆ្វៀលដីដោយពុំមានការវាយតម្លៃ ឬមានតម្លាភាពជាក់លាក់ចំពោះការសុំកាន់កាប់ដី នៅក្នុងតំបន់ការពារធម្មជាតិនេះឡើយ៕ សេង ណារិទ្ធ
