ប្រភពថ្មីៗពីមន្ត្រីនៅច្រកបឹងត្រកួន ស្រុកថ្មពួក ខេត្តបន្ទាយមានជ័យ បានបង្ហើបឲ្យដឹងថា រហូតមកដល់ពេលនេះលោក ញឹក ប៊ុនលេខ ប្រធានការិយាល័យគយច្រកបឹងត្រកួន នៅតែឃុបឃិតឲ្យឈ្មួញធំៗនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុកដដែល ដើម្បីជាថ្នូរនឹងផលប្រយោជន៍ផ្ទាល់ខ្លួន។
ប្រភពបានឲ្យដឹងទៀតថា ដោយសារមានការឃុបឃិតបើកដៃពីមេគយធំៗក្នុងខេត្តបន្ទាយមានជ័យ មួយចំនួន ទើបលោក ញឹក ប៊ុនលេខ ប្រធានការិយាល័យគយច្រកបឹងត្រកួន ហ៊ានធ្វើអ្វីៗតាមអំពើចិត្ត។
រីឯលោកបណ្ឌិត គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានរក្សាភាពស្ងៀមស្ងាត់ហើយបណ្តោយឲ្យលោក ញឹក ប៊ុនលេខ ប្រធានការិយាល័យគយច្រកបឹងត្រកួន និងបក្ខពួកឃុបឃិតគ្នាប្រព្រឹត្តអំពើពុករលួយយ៉ាងពេញទំហឹងតែម្តង ដោយមិនខ្វល់ពីការរិះគន់អ្វីទាំងអស់។
ប្រភពព័ត៌មានអោយដឹង ប្រធានការិយាល័យគយច្រកបឹងត្រកួន បានឲ្យដឹងថា ការដែលលោក ញឹក ប៊ុនលេខ ឈរជើងយ៉ាងរឹងមាំក្នុងតួនាទីជាមេគយច្រកទ្វារតំបន់បឹងត្រកួន គឺដោយសារមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។
ប្រភពបានឲ្យដឹងទៀតថា ឈ្មួញធំៗដែលរកស៊ីនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់តាមច្រកបឹងត្រកួន គឺជាប្រភពចំណូលរបស់លោក ញឹក ប៊ុនលេខ ហើយក៏មានការបែងចែកផលប្រយោជន៍ដល់មន្ត្រីធំៗមួយចំនួនផងដែរ ទើបអ្វីៗអាចប្រព្រឹត្តទៅដោយរលូន។
ទន្ទឹមនឹងនេះ ក្រុមឈ្មួញអាជីវករតូចតាចដែលរកស៊ីនាំចូលទំនិញតាមច្រកទ្វារតំបន់បឹងត្រកួនត្រូវបានលោក ញឹក ប៊ុនលេខ ព្រមទាំងបក្ខពួកគាបយកលុយស្រេចតែអំពើចិត្តដោយពុំមានការយោគយល់ឡើយ។
សមត្ថកិច្ចពាក់ព័ន្ធនៅច្រកបឹងត្រកួនបានឲ្យដឹងថា មួយរយៈចុងក្រោយនេះលោក ញឹក ប៊ុនលេខ ប្រធានការិយាល័យគយច្រកបឹងត្រកួន ប្រើតួនាទីនិងអំណាចប្រព្រឹត្តអំពើពុករលួយកាន់តែខ្លាំង ព្រោះអាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។
បញ្ហានេះគឺជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ មិនគួរបណ្តែតបណ្តោយតទៅទៀតទេ ព្រោះប្រភពខ្លះបានបង្ហើបឲ្យដឹងថា ទំនិញដែលឈ្មួញធំៗនាំចូលតាមច្រកបឹងត្រកួន បង់ពន្ធត្រឹម៣៥ទៅ៤០ភាគរយប៉ុណ្ណោះ។ ក្រៅពីនេះ គឺឈ្មួញឃុបឃិតបែងចែកផលប្រយោជន៍ជាមួយលោក ញឹក ប៊ុនលេខ ប្រធានការិយាល័យគយច្រកបឹងត្រកួន យ៉ាងរលូនហើយលោក ញឹក ប៊ុនលេខ តែងយកឈ្មោះមេគយធំៗមកប្រព្រឹត្តអំពើពុករលួយយ៉ាងពេញបន្ទុក៕
