(ភ្នំពេញ) ÷នៅទីស្តីការក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃព្រហស្បតិ៍ ៨រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១០ ខែកញ្ញា ឆ្នាំ២០២០ ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យក្មួយៗនិស្សិតដែលទទួលបានអាហារូបករណ៍ពីរដ្ឋាភិបាលអូស្ត្រាលីចូលជួបសម្តែងការគួរសម និងស្នើសំការណែនាំ មុនចេញដំណើរទៅបន្តការ សិក្សានៅប្រទេសអូស្ត្រាលីក្នុងពេលឆាប់ៗខាងមុខ។
សម្រាប់ឆ្នាំ២០២០-២០២១ មាននិស្សិតចំនួន ២៧នាក់ (អូស្ត្រាលី ១៨ ណូវ៉ែលហ្សេឡង់ ០៩) ត្រូវបានរដ្ឋាភិបាលអូស្ត្រាលី និងណូវ៉ែលហ្សេឡង់ ធ្វើការជ្រើសរើសផ្តល់អាហារូបករណ៍ឲ្យទៅបន្តការសិក្សារៀនសូត្រថ្នាក់អនុបណ្ឌិតទៅតាមមុខជំនាញ និងមហាវិទ្យាល័យផ្សេងៗគ្នានៅប្រទេសទាំងពីរ ហើយពួកគេនឹងចេញដំណើរក្នុងពេលឆាប់ៗខាងមុខនេះ។ និស្សិតទាំង ២៧នាក់នេះត្រូវបានជ្រើសរើសពីវិស័យឯកជន អង្គការក្រៅរដ្ឋាភិបាល និងមន្ត្រីដែលបម្រើការក្នុងក្រសួង និងស្ថាប័នរដ្ឋ។
មានមតិសំណេះដំណាលនាពេលនេះ ឯកឧត្តមរដ្ឋមន្ត្រីបានចូលរួមអបអរសាទរចំពោះជ័យលាភីដែលក្មួយៗទទួលបាន និងបានវាយតម្លៃខ្ពស់ចំពោះសមត្ថភាពរបស់ក្មួយៗដែលបានបង្ហាញឲ្យឃើញអំពីការយកចិត្តទុកដាក់ខិតខំតស៊ូរៀនសូត្រទាំងចំណេះដឹង ចំណេះធ្វើ និងបទពិសោធន៍ ដ៏មានតម្លៃដែលអាចនិយាយបានថាជាធនធានសម័យថ្មីប្រកបដោយសក្តានុពលក្នុងការកសាង និងអភិវឌ្ឍប្រទេស សមស្របតាមគោនយោបាយរបស់រាជរដ្ឋាភិបាល។ ឆ្លៀតយកឱកាសនេះ ឯកឧត្តមរដ្ឋមន្ត្រីបានចែករំលែកបទពិសោធន៍ផ្ទាល់ខ្លួនរបស់ឯកឧត្តមជាបន្តបន្ទាប់ទាក់ទងនឹងការសិក្សារៀនសូត្រ ការធ្វើជាមន្ត្រីល្អ បុគ្គលល្អ ពលរដ្ឋល្អ និងជាពិសេសជាថ្នាក់ដឹកនាំល្អម្នាក់ និងជាពិសេសស្ថានភាពរបស់ប្រទេសជាតិ ក៏ដូចជាពិភពលោកដែលកំពុងជួបវិបត្តិដោយសារជំងឺឆ្លងកូវីដ-១៩ ដែលធ្វើឲ្យវិស័យមួយចំនួនជួបបញ្ហាធ្ងន់ធ្ងរ។ ឆ្លៀតយកឱកាសនេះ ឯកឧត្តមរដ្ឋមន្ត្រីបានផ្តាំផ្ញើក្មួយៗឲ្យខិតខំរៀនសូត្រ សិក្សាស្រាវជ្រាវ ចែករំលែងបទពិសោធន៍ទាំងចំណេះជំនាញ ចំណេះដឹងទូទៅ អក្សរសាស្ត្រ ប្រពៃណី វប្បធម៌។ល។ រួចនាំយកធាតុចូលដែលជាពុទ្ធិ និងបទពិសោធន៍ល្អៗ ថ្មីៗទាំងនោះមកមាតុភូមិវិញដើម្បីចូលរួមថែរក្សាការពារ កសាង និងអភិវឌ្ឍប្រទេសយើងទាំងពេលបច្ចុប្បន្ន និងអនាគត។ ត្រូវគោរពវិន័យសាលា និងច្បាប់ទម្លាប់របស់ប្រទេសគេ ចៀសវាងប្រព្រឹត្តអំពើមិនគប្បីដែលនាំឲ្យប៉ះពាល់ដល់សុវត្តិភាពផ្ទាល់ខ្លួន ការ រៀនសូត្រ និងកិត្តិយសរបស់ប្រទេសជាតិ។ ត្រូវចេះថែរក្សាសុខភាព ជួយយកអាសាគ្នាទៅវិញ ទៅមក មានទំនាក់ទំនងគ្នាល្អ និងចែករំលែកព័ត៌មានឲ្យបានជាប់ជាប្រចាំ។
ជាចុងក្រោយ ឯកឧត្តមរដ្ឋមន្ត្រីបានរំលឹកក្មួយៗឲ្យចងចាំជានិច្ចនូវគុណូបការ:ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីដែលបានធ្វើពលិកម្មគ្រប់បែបយ៉ាងដើម្បីដឹកនាំប្រទេសឆ្ពោះមកកាន់សន្តិភាព និងការអភិវឌ្ឍ ដូចដែលក្មួយៗបានឃើញនាពេលបច្ចុប្បន្ន ហើយពិតណាស់ចំណេះដឹង និងបទពិសោធន៍ដែលក្មួយៗបានប្រមូល និងយកត្រឡប់មកមាតុប្រទេសវិញក្រោយបញ្ចប់ការសិក្សាវានឹងចូលរួមកសាង និងអភិវឌ្ឍន៍ប្រទេសឲ្យមានការរីកចម្រើនទាំងសេដ្ឋកិច្ច និងសង្គមឈានឆ្ពោះទៅសម្រេចឲ្យបាននូវចក្ខុវិស័យរបស់រាជរដ្ឋាភិបាលនាឆ្នាំ២០៣០ និង ២០៥០។
