(ខេត្តកំពត)៖ អ្នកបើកបររថយន្តខ្នាតធំម្នាក់បានស្លាប់បាត់បង់ជីវិត បន្ទាប់ពីសមត្ថកិច្ចបញ្ជូនទៅសង្គ្រោះនៅឯមន្ទីរពេទ្យ ហើយករណីគ្រោះថ្នាក់បង្កខ្លួនឯងនេះ សមត្ថកិច្ចអះអាងថា ផ្តើមឡើងដោយសារអ្នកបើកបរងងុយដេក ទើបរថយន្តជ្រុលទៅបុកសំយ៉ាបផ្ទះលក់គ្រឿងទេសក្បែរចិញ្ចើមផ្លូវបែបនេះ។
ហេតុការណ៍ខាងលើបានកើតឡើងនៅវេលាម៉ោងជាង៥ទៀបភ្លឺ ថ្ងៃទី១០ ខែកញ្ញា ឆ្នាំ២០២០ ត្រង់ចំណុចខាងលិចសាលាឃុំកំពង់ត្រាចខាងលិច ប្រហែល៣០ម៉ែត្រ ស្ថិតក្នុងភូមិដើមចារ ឃុំកំពង់ត្រាចខាងលិច ស្រុកកំពង់ត្រាច ខេត្តកំពត លើដងផ្លូវជាតិលេខ៣៣។
ពាក់ព័ន្ធនឹងគ្រោះថ្នាក់បង្កដោយខ្លួនឯងបណ្តាលឲ្យតែកុងស្លាប់ខាងលើ នគរបាលចរាចរណ៍ស្រុកបានឲ្យដឹងថា មុនពេលកើតហេតុរថយន្តម៉ាកសណ្តោងដឹកទំនិញធុនធ្ងន់បានដឹកធ្យូងថ្មធ្វើដំណើរពីលិចទៅកើត លុះមកដល់ចំណុចគ្រោះថ្នាក់ស្រាប់តែរថយន្តនោះ បានរេចង្កូតទៅបុករះដើមឈើតូចៗនៅផ្នែកខាងស្តាំដៃ រួចបន្តទៅបុករះសំយ៉ាបតូបលក់គ្រឿងទេស រួចក្រឡាប់ខ្លួនឯងទាំងកម្រោល បណ្តាលឲ្យអ្នកបើកបររងរបួសធ្ងន់ ហើយជនរងគ្រោះបានស្លាប់ក្រោយពីបញ្ជូនទៅសង្គ្រោះនៅក្នុងមន្ទីរពេទ្យ។ប្រភពដដែលបានប្រាប់ទៀតថា អ្នកបើកបរដែលស្លាប់ក្នុងហេតុការណ៍គ្រោះថ្នាក់នេះ ឈ្មោះ អ៊ូច រ៉ាវីភេទប្រុស អាយុ៣៥ឆ្នាំ មានទីលំនៅភូមិកណ្តាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
បច្ចុប្បន្នសពជនរងគ្រោះត្រូវបានក្រុមគ្រួសារកំពុងចាត់ចែងធ្វើបុណ្យតាមប្រពៃណី។ ដោយឡែករថយន្តត្រូវបានសមត្ថកិច្ចហៅឡានស្ទូចដើម្បីអូសយកទៅរក្សាទុកនៅក្នុងអធិការនគរបាលស្រុកសម្រាប់ដោះស្រាយតាមច្បាប់ចរាចរណ៍៕ សេង ណារិទ្ធ
