មណ្ឌលគិរី ៖ ថ្មីៗពីមន្ត្រីពាក់ព័ន្ធនៅច្រកទ្វេភាគីណាំលៀ ហៅច្រកប៉ុស្តិ៍៧ ឃុំប៊ូស្រា ស្រុកពេជ្រាដា ខេត្តមណ្ឌលគិរី បានឲ្យដឹងថា រយៈពេលនេះ ក្រុមឈ្មួញធ្វើសកម្មភាពដឹកជញ្ជូនឈើចេញទៅប្រទេសវៀតណាត តាមរថយន្តកែច្នៃនិងតាមម៉ូតូយ៉ាងពេញបន្ទុក។
ប្រភពបានឲ្យដឹងទៀតថា ក្នុងមួយយប់ៗឈ្មួញដឹកជញ្ជូនឈើចេញទៅស្រុកយួនតាមច្រកទ្វេភាគីណាំលៀ ហៅច្រកប៉ុស្តិ៍៧ មិនតិចជាង១៥រថយន្តនោះទេ ហើយមានដឹកជញ្ជូនតាមម៉ូតូរាប់សិបគ្រឿងថែមទៀត។ ក្នុងនោះមេនគរបាលអន្តោប្រវេសន៍ នៅច្រកទ្វេភាគីណាំលៀ ហៅច្រកប៉ុស្តិ៍៧ មានសិទ្ធិអំណាចធំធេងជាងគេក្នុងការបើកបារ៉ាស់ឲ្យក្រុមឈ្មួញដឹកជញ្ជូនឈើទៅស្រុកយួនយ៉ាងសុខស្រួល។
ចំណែកប្រភពពីមន្ត្រីពាក់ព័ន្ធនៅច្រកទ្វេភាគីឡាប៉ាខេ ស្រុកកែវសីមា បានឲ្យដឹងថា រយៈពេលប្រមាណ២សប្តាហ៍កន្លងទៅនេះក្រុមឈ្មួញសម្រុកដឹកជញ្ជូនឈើទៅស្រុកយួនតាមច្រកទ្វេភាគីឡាប៉ាខេ យ៉ាងពេញបន្ទុកតែម្តង ព្រោះមានការឃុបឃិតបើកដៃពីមន្ត្រីជំនាញនិងសមត្ថកិច្ចពាក់ព័ន្ធ។
ប្រភពបានឲ្យដឹងទៀតថា ចន្លោះពីថ្ងៃ១៧ដល់ថ្ងៃទី២១ ខែសីហា កន្លងទៅថ្មីៗនេះឈ្មួញច្រើននាក់សម្រុកដឹកជញ្ជូនឈើចេញទៅប្រទេសវៀតណាមតាមច្រកទ្វេភាគីឡាប៉ាខេ យ៉ាងពេញបន្ទុកជាពិសេសនៅពេលយប់។ ប្រការនេះកំពុងធ្វើឲ្យព្រៃឈើដែលនៅសេសសល់ក្នុងស្រុកកោះញែក ស្រុកកែវសីមា និងស្រុកពេជ្រាដា កំពុងប្រឈមនឹងសេចក្តីវិនាស ព្រោះមន្ត្រីអាជ្ញាធរ មន្ត្រីជំនាញនិងសមត្ថកិច្ចពាក់ព័ន្ធគិតតែរឿងផលប្រយោជន៍ផ្ទាល់ខ្លួន។
ប្រភពពីមន្ត្រីអង្គការក្រៅរដ្ឋាភិបាលបានរិះគន់ថា លោក ស្វាយ សំអ៊ាង អភិបាលខេត្តមណ្ឌលគិរី និងលោក អ៊ុំ វណ្ណសុភគ៌ នាយខណ្ឌរដ្ឋបាលព្រៃឈើខេត្តមណ្ឌលគិរី គ្មានឆន្ទៈក្នុងការបង្ក្រាបបទល្មើសព្រៃឈើនោះទេ។ ហេតុនេះហើយទើបក្រុមឈ្មួញបន្តសកម្មភាពកាប់ឈើនៅក្នុងស្រុកកែវសីមា ស្រុកកោះញែក និងស្រុកពេជ្រាដា ហើយដឹកជញ្ជូនចេញទៅស្រុកយួនតាមច្រកទ្វេភាគីណាំលៀ និងច្រកទ្វេភាគីឡាប៉ាខេ យ៉ាងរាលដាល។ ដូច្នេះហើយទើបមានសេចក្តីអំពាវនាវឲ្យថ្នាក់ដឹកនាំគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិចាត់វិធានការបង្ក្រាបបទល្មើសព្រៃឈើក្នុងខេត្តមណ្ឌលគិរី ជាបន្ទាន់៕
