អាជ្ញាធរស្នងការដ្ឋាននគរបាលរាជធានីភ្នំពេញនៅព្រឹកថ្ងៃសុក្រនេះ កំពុងរៀបចំកសាងសំណុំរឿងបញ្ជូនយុវជនបរិស្ថាន ៣ នាក់ ទៅកាន់សាលាដំបូងរាជធានីភ្នំពេញ ។ យុវជនទាំង៣នាក់នេះ រួមមាន លោកថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី។
ពួកគេត្រូវបានអាជ្ញាធរស្នងការដ្ឋាននគរបាលរាជធានីភ្នំពេញចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ។
លោកសានសុខសីហាអ្នកនាំពាក្យស្នងការដ្ឋាននគរបាលរាជធានីភ្នំពេញបានអះអាងប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថាការចោទប្រកាន់យុវជនការពារបរិស្ថានទាំង៣នាក់ពីបទញង់ញុះឱ្យប្រព្រឹត្តបទឧក្រិដ្ឋជាអាទិ៍នេះគឺដោយយោងទៅតាមខ្សែវីដេអូនានារបស់ពួកគេដែលបានបង្ហោះនៅលើទំព័រហ្វេសប៊ុកមាតាធម្មជាតិកម្ពុជាឬMotherNatureCambodia ។
បើតាមលោក សាន សុខសីហា វីដេអូរបស់ពួកគេ គឺបានបង្ហាញពីចរិតលក្ខណៈញុះញង់ ។ យុវជនបរិស្ថានទាំង ៣ នាក់នេះ ត្រូវអាជ្ញាធរកម្ពុជាឃាត់ខ្លួនក្រោមរូបភាពផ្សេងៗគ្នា ។ ប៉ុន្តែធ្វើឡើងក្នុងថ្ងៃតែមួយកាលពីថ្ងៃព្រហស្បតិ៍ ។
យុវជនថុនរដ្ឋាត្រូវអាជ្ញាធរកម្ពុជាជាច្រើននាក់ចុះទៅព័ន្ធផ្ទះជួលនៅក្នុងខណ្ឌពោរធិ៍សែនជ័យដើម្បីចាប់ខ្លួនរូបគ ។ ការចាប់ខ្លួននេះ ក្រោមហេតុផលថា រូបគេបានបង្កើតបន្ទប់ផ្សព្វផ្សាយព័ត៌មាន និងធ្វើវីដេអូផ្សព្វផ្សាយដោយមិនមានច្បាប់អនុញ្ញាត ។ ក្រោយចាប់ខ្លួនផ្ទះជួលរបស់ថុន រដ្ឋា ក៏ត្រូវបានអាជ្ញាធរបិទជាបណ្តោះអាសន្នផងដែរ ។ រីឯយុវតីភួនកែវរស្មីនិងឡុងគន្ធាវិញ ត្រូវបានអាជ្ញាធរកម្ពុជាឃាត់ខ្លួន នាំយកទៅសួរនាំបន្ទាប់ពីពួកគេមានគម្រោងធ្វើដំណើរដោយថ្មើរជើងចេញពីវត្តភ្នំឆ្ពោះទៅភូមិគ្រឹះ សម្តេចនាយករដ្ឋមន្ត្រី ហ៊ុន សែន ក្បែរវិមានឯករាជ្យដោយស្លៀកពាក់ពណ៌សនៅថ្ងៃទី ៣ កញ្ញា ដើម្បីស្នើជួបសម្តេចនាយករដ្ឋមន្ត្រីផ្ទាល់ក្នុងគោលបំណងបង្ហាញអំពីក្ដីបារម្ភមួយចំនួន ជុំវិញការលុបបឹងតាមោកដូចជា បញ្ហាជន់លិចទឹកក្នុងរាជធានីភ្នំពេញពេលភ្លៀងម្ដងៗ ផលប៉ះពាល់ចំពោះបរិស្ថានការបាត់បង់ជម្រកសត្វស្លាប រួមជាមួយជីវចម្រុះក្នុងបឹងជាដើម៕
