(ខេត្តកំពត)៖ ករណីបណ្តឹងរបស់ប្រជាពលរដ្ឋ និងព្រះសង្ឃបានចោទប្រកាន់ថាកងពលតូចថ្មើរជើងលេខ៣១ ព័ទ្ធរបងយកដី សាធារណៈ របស់រដ្ឋដែលជាដីអតីតសាកលវិទ្យាល័យកំពត-តាកែវ ស្ថិតក្នុងភូមិនារាយណ៍ ឃុំនារាយណ៍ ស្រុកឈូក ខេត្តកំពត ត្រូវបានអភិបាលខេត្តកំពតសម្របសម្រួលដោះស្រាយមួយជំហាន។
ចំពោះបញ្ហាដូចខាងលើ ក្រោយពីទទួលបានពាក្យបណ្តឹងរបស់ប្រជាពលរដ្ឋ និងការបង្ហោះក្នុងបណ្តាញសង្គមរបស់វត្តព្រះរតន៌ត្រ័យ ហៅវត្តនារាយណ៍លើភ្នំ ដោយបានចោទប្រកាន់ថាកងពលតូចថ្មើរជើងលេខ៣១ ព័ទ្ធរបងយកដី សាធារណៈ របស់រដ្ឋដែលជាដីអតីតសាកលវិទ្យាល័យកំពត-តាកែវ ស្ថិតក្នុងភូមិនារាយណ៍ ឃុំនារាយណ៍ ស្រុកឈូក ខេត្តកំពត នៅដើមខែកញ្ញា ឆ្នាំ២០២០នេះ លោក ជាវ តាយ អភិបាលខេត្តកំពត បានដឹកនាំកិច្ចប្រជុំពិនិត្យ និងស្វែងយល់ រកដំណោះស្រាយករណីបណ្ដឹងប្រជាពលរដ្ឋចោទយោធាកងពលលេខ៣១ ព័ទ្ធរបង មិនឱ្យចេញចូលក្នុងទីតាំងដីអតីតសាកលវិទ្យាល័យភូមិន្ទកំពត-តាកែវ។
តាមការបំភ្លឺរបស់មេបញ្ជាការកងពលតូចថ្មើរជើងលេខ៣១ អាជ្ញាធរស្រុក ឃុំ និងមន្ត្រីជំនាញពាក់ព័ន្ធ អំពីសកម្មភាពការចូលទន្ទ្រាន បំណងកាន់កាប់ដីខុសច្បាប់ក្នុងតំបន់នេះពីសំណាក់ប្រជាពលរដ្ឋ។ ចំណែកលោកឧត្តមសេនីយ៍ឯក យឿង សុខុន មេបញ្ជាការយោធាភូមិភាគទី៣ បានលើកឡើងថា ដើមចមនៃបញ្ហាការព័ទ្ធរបងនៅទីតាំងដីអតីតសាកលវិទ្យាល័យភូមិន្ទកំពត-តាកែវ ដើម្បីទប់ស្កាត់ការចូលកាន់កាប់ទន្ទ្រានពីសំណាក់ប្រជាពលរដ្ឋ ហើយការព័ទ្ធរបង គឺរក្សាទុកដីរបស់រដ្ឋតែប៉ុណ្ណោះ គ្មានចេតនា ណាមួយក្នុងការយកដីរដ្ឋនោះឡើយ។
ជាលទ្ធផលក្រុមការងារថ្នាក់ខេត្ត ស្រុកដែលដឹកនាំដោយលោកអភិបាលខេត្តផ្ទាល់បានសម្របសម្រួល ជាមួយកងពលតូចថ្មើរជើងលេខ៣១ ដោយ បានឯកភាពដកបង្គោលផ្នែកខាងកើតជាប់ស្រះទឹកប្រវែង ១០ម៉ែត្រ ដើម្បីទុកផ្លូវចេញចូលដូចមុន និងដកបង្គោលរបងផ្នែកខាងមុខស្រះទឹកប្រវែង ៤ម៉ែត្រធ្វើជាផ្លូវចូល។
ចំពោះការចូលទន្ទ្រានកាន់កាប់ដីរដ្ឋដោយខុសច្បាប់ ត្រូវបានហាមឃាត់ ណែនាំ អប់រំ ជូនដំណឹងដល់ប្រជាពលរដ្ឋ ដែលបានចូលទន្ទ្រាន ឲ្យពួកគាត់បញ្ឈប់សកម្មភាពចូលទន្ទ្រានកាន់កាប់ដីរបស់រដ្ឋនេះបន្តទៀត ហើយរដ្ឋបាលខេត្តនឹងដោះស្រាយឲ្យបានចប់សព្វគ្រប់នាពេលខាងមុខ៕ សេង ណារិទ្ធ
