នៅសាលាខេត្តស្វាយរៀង នាព្រឹកថ្ងៃពុធ ១៥កើត ខែភត្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២ ខែកញ្ញា ឆ្នាំ២០២០ មានរៀបចំពិធីប្រកាសចូលកាន់តំណែងប្រធានមន្ទីរកសិកម្ម រុក្ខាប្រមាញ់ និងនេសាទ ក្រោមអធិបតីភាពភាពឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម ជុំ ហាត ប្រធានក្រុមប្រឹក្សាខេត្ត ឯកឧត្តម ម៉ែន វិបុល អភិបាលនៃគណអភិបាលខេត្ត និងមានការចូលរួមពីឯកឧត្តមរដ្ឋលេខាធិការ ឯកឧត្តមប្រតិភូរាជរដ្ឋា ភិបាលទាំង៥ របស់ក្រសួងកសិកម្ម រុក្ខាប្រមាញ់ និងនេសាទ ឯកឧត្តមអភិបាលរងខេត្ត ឯកឧត្តមប្រធានសាលាដំបូង កងកម្លាំងប្រដាប់អាវុធ ប្រធាន-អនុប្រធានមន្ទីរជុំវិញខេត្ត និងមន្ត្រីរាជការក្រោមឱវាទយ៉ាងច្រើនកុះករ។
ជាបឋម លោក ថាច់ រតនា អតីតប្រធានមន្ទីរបានអានមតិស្វាគមន៍ និងរាយការណ៍ជូនជ្រាបអំពីវឌ្ឍនភាពការងារក្នុងរយៈពេលកន្លងមក សមិទ្ធផល បញ្ហាប្រឈមនានា និងការងារពាក់ព័ន្ធក្នុង រយៈពេលជាង៣០ឆ្នាំ ដែលលោកបានបំពេញការងារជាប្រធាន។
បន្ទាប់ពីលោក សុខ សុទ្ធាវុធ ប្រធានមន្ទីរថ្មីដែលទើបត្រូវបានតែងតាំងបានធ្វើការប្តេជ្ញាចិត្តរួចមក ឯកឧត្តម ម៉ែន វិបុល បានធ្វើចំណាប់អារម្មណ៍ដ៏មានអត្ថន័យអំពីការចូលរួមយ៉ាងសកម្មក្នុងការអភិវឌ្ឍមូលដ្ឋាន ការពង្រឹងអភិបាលកិច្ច និងការបង្កើនប្រសិទ្ធភាពនៃសេវាសាធារណៈ ការពង្រឹងគោលនយោបាយភូមិ-ឃុំមានសុវត្ថិភាព ការចូលរួមដោះស្រាយបញ្ហាប្រឈម ជាពិសេសក្នុងដំណាក់កាលនៃការរីករាល ដាលជំងឺផ្លូវដង្ហើមកូវីដ-១៩នេះ ទាំងអាជ្ញាធរដែនដីគ្រប់ជាន់ថ្នាក់មន្ទីរកសិកម្មខេត្តនិងប្រជាពលរដ្ឋទូទាំងខេត្តស្វាយរៀងបានចូលរួមអនុវត្តយ៉ាងសស្រាក់សស្រាំប្រកបដោយស្មារតីទទួល ខុសត្រូវខ្ពស់នូវអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីក្នុងការជំរុញបង្កើនផលិតកម្មស្បៀងមានដូចជាការដាំដំណាំគ្រប់ប្រភេទ ការចិញ្ចឹមសត្វ ការចិញ្ចឹមត្រី ចិញ្ចឹមកង្កែបជាដើម និងបានផ្តល់ឱវាទល្អ ។ ជូនលោកប្រធានថ្មីផងដែរ ។
ក្នុងនាមក្រសួង និងខ្លួនលោកផ្ទាល់ ឯកឧត្តមរដ្ឋមន្ត្រីបានសម្តែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងក្នុងស្មារតីទទួលខុសត្រូវលើតួនាទី និងភារកិច្ចដែលក្រសួង ក៏ដូចជាអាជ្ញាធរខេត្តប្រគល់ជូនលោក ថាច់ រតនា អនុវត្តកន្លងមក។ សមិទ្ធផលដែលលោក និងសហការីសម្រេចបានគឺជាមោទនភាពរបស់ថ្នាក់ដឹកនាំ មន្ត្រីគ្រប់ជាន់ថ្នាក់ សហគមន៍កសិកម្ម ភាគីពាក់ព័ន្ធ អង្គការ ដៃគូអភិវឌ្ឍ និងវិស័យឯកជន បានចូលរួមចំណែកផ្តល់កិច្ចសហការ និងចែករំលែកក្នុងបុព្វហេតុចំបងគឺការអភិវឌ្ឍវិស័យកសិកម្ម។ ភ្ជាប់ទៅនឹងសមិទ្ធផលនេះ ឯកឧត្តមរដ្ឋមន្ត្រីបានថ្លែងអំណរគុណចំពោះឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលខេត្ត និងអាជ្ញាធរពាក់ព័ន្ធដែលបានផ្តល់កិច្ចសហការផ្តល់អនុសាសន៍ល្អៗប្រកបដោយផ្លែផ្កានាពេលកន្លងមករហូតទទួលបានជោគជ័យដ៏ធំធេងសម្រាប់ប្រជាជន និងប្រទេសជាតិនាថ្ងៃនេះ។
ឆ្លៀតយកឱកាសនេះ ឯកឧត្តមរដ្ឋមន្ត្រីបានធ្វើការសំណេះសំណាលជាមួយអង្គពិធីដោយផ្តោតជាសំខាន់ទៅលើស្ថានការណ៍ថ្មីៗរបស់ប្រទេសជាតិ និងសកលលោកទាំងសេដ្ឋកិច្ច នយោបាយ និងជាពិសេសស្ថានភាពចុងក្រោយបង្អស់នៃជំងឺឆ្លងកូវីដ-១៩។
ដោយឡែក វិស័យកសិកម្ម ឯកឧត្តមរដ្ឋន្ត្រីបានធ្វើការបូកសរុបដោយសង្ខេបជូនអង្គពិធីជ្រាបអំពីការវិវឌ្ឍន៍រីកចម្រើន បញ្ញាប្រឈម គោលនយោបាយ-ផែនការអភិវឌ្ឍ និងភារកិច្ចយ៉ាងសំខាន់ចុងក្រោយដែលត្រូវអនុវត្តឲ្យបានទាន់ពេល និងមានប្រសិទ្ធភាពគឺអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី ក្នុងការជំរុញចលនាបង្កបង្កើនផល ផលិតស្បៀងតាមរយ:ការដាំបន្លែ ដំណាំរួមផ្សំ ចិញ្ចឹមសត្វ ត្រី កង្កែប។ល។ ដើម្បីធានាសន្តិសុខស្បៀងក្នុងគ្រួសារ បង្កើនបរិមាណផ្គត់ផ្គង់ទីផ្សារក្នុងស្រុក ស្របពេលដែលរាជរដ្ឋាភិបាលធ្វើការកាត់បន្ថយការនាំចូល ។
ដើម្បីទទួលបាននូវពុទ្ធិថ្មី៑ និងធាតុចូលសំខាន់ៗសម្រាប់ប្រធានមន្ទីរ និងមន្ត្រីក្រោមឱវាទយកទុកជាគន្លឹះ និងជាប្រទីបក្នងការដឹកនាំ ការគ្រប់គ្រង និងអនុវត្តភារកិច្ចឲ្យទទួលបានជោគជ័យតាមអនុវិស័យនីមួយៗថែមទៀត ឯកឧត្តមរដ្ឋមន្ត្រីបានជូនជាអនុសាសន៍ដូចខាងក្រោម÷
ទី១- ត្រូវប្រកាន់ខ្ជាប់នូវក្រមសីលធម៌មន្ត្រីរាជការទាំងការគ្រប់គ្រងដឹកនាំ ការបំពេញភារកិច្ចដូចមានចែងក្នុងជំពូកទី៥ មាត្រា៣៣ ដល់មាត្រា៣៨ នៃច្បាប់ស្តីពីសហលក្ខន្តិកៈមន្ត្រីរាជការស៊ីវិល និងត្រូវគោរពតាមឋានានុក្រមការងារជាចាំបាច់តាមគោលការណ៍ “សមូហភាពដឹកនាំ បុគ្គលទទួលខុសត្រូវ”។ សិក្សារៀនសូត្របន្ថែមទាំងបច្ចេកទេស កិច្ចការរដ្ឋបាល ការដឹកនាំ និងការគ្រប់ គ្រង ដើម្បីបង្កើនប្រសិទ្ធភាពដឹកនាំក្នុងឋាន:ជាប្រធានមន្ទីរថ្មី។
ទី២- ត្រូវយកអស់ស្មារតីទទួលខុសត្រូវក្នុងការអភិវឌ្ឍវិស័យកសិកម្ម ទាំងក្នុងពេលបច្ចុប្បន្ន និងអនាគតឲ្យសមស្របតាមបរិបទនៃវិបត្តិជំងឺឆ្លងកូវីដ-១៩ កំណើនសេដ្ឋកិច្ច និងការវិវឌ្ឍន៍រីក ចម្រើនរបស់ប្រទេសជាតិ និងជាពិសេសដើម្បីឈានទៅសម្រេចគោលនយោបាយអភិវឌ្ឍវិស័យកសិកម្ម២០១៩-២០២៣ និងចក្ខុវិស័យរបស់រាជរដ្ឋាភិបាលនាឆ្នាំ២០៣០ និង២០៥០។
ទី៣- រក្សាសមិទ្ធផលល្អៗដែលបានបន្សល់ទុកដោយប្រធានមន្ទីរចាស់ និងត្រូវបន្តអនុវត្តគោល នយោបាល និងផែនការសកម្មភាពអភិវឌ្ឍសំខាន់ៗសមស្របតាមស្ថានភាពបច្ចុប្បន្ន។ ពង្រឹងសាមគ្គីភាព និងបន្តសហការផ្ទៃក្នុងឲ្យបានល្អដើម្បីទទួលបានភាគជោគជ័យជាសមូលហភាព។
ទី៤- ត្រូវពង្រឹងកិច្ចសហការជាមួយមន្ទីរពាក់ព័ន្ធជុំវិញខេត្ត ដៃគូអភិវឌ្ឍ វិស័យឯកជន អាជ្ញាធរគ្រប់លំដាប់ថ្នាក់ និងទទួលយកការណែនាំរបស់គណៈអភិបាលខេត្តក្នុងការបំពេញភារកិច្ចរបស់ខ្លួនក្នុងស្មារតីទទួលខុសត្រូវខ្ពស់។
ទី៥- ត្រូវយកចិត្តទុកដាក់ក្នុងស្មារតីទទួលខុសត្រូវខ្ពស់អនុវត្តអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន កាលពីថ្ងៃទី១៤ ខែកក្កដា នៅខេត្តព្រៃវែង និងថ្ងៃទី១៤ ខែសីហា នៅគណរដ្ឋ មន្ត្រីឲ្យមានប្រសិទ្ធភាព។
