(ព្រះវិហារ)៖ មានប្រសាសន៍ប្រាប់បណ្តាញសារព័ត៌មាន ឯកឧត្តម ប្រាក់ សុវណ្ណ បានថ្លែងប្រាប់ឱ្យដឹងនារសៀលថ្ងៃទី០១ ខែកញ្ញា ឆ្នាំ២០២០ នេះថា ដោយអនុវត្តន៍តាមការណែនាំរបស់ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី ក៏ដូចជាបទបញ្ជាសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនោះ អាជ្ញាធរខេត្តព្រះវិហារតែងតែបានដាក់បទបញ្ជាដល់អាជ្ញាធរក្រុង ស្រុក និងសមត្ថកិច្ចពាក់ព័ន្ធផ្សេងៗក្នុងខេត្ត ត្រូវខិតខំបង្ក្រាបបទល្មើសផ្សេងៗឱ្យមានប្រសិទ្ធភាពក្នុងដែនសមត្ថកិច្ចរបស់ខ្លួន។
ឯកឧត្តម ប្រាក់ សុវណ្ណ អភិបាលខេត្តព្រះវិហារ និងជាប្រធានគណៈបញ្ជាការឯកភាពរដ្ឋបាលខេត្ត បានដាក់បញ្ជាដល់អាជ្ញាធរដែនដីក្រុង ស្រុក ឃុំ សង្កាត់ ក៏ដូចជាសមត្ថកិច្ចជំនាញពាក់ព័ន្ធផ្សេងៗ ត្រូវយកចិត្តទុកដាក់ខិតខំបង្ក្រាបបទល្មើសគ្រប់ប្រភេទ ពិសេសបទល្មើសឆ្លងដែនខុសច្បាប់ឱ្យមានប្រសិទ្ធភាពខ្ពស់។
ឯកឧត្តម អភិបាលខេត្តបានថ្លែងបញ្ជាក់ថា មួយរយៈនេះបទល្មើសផ្សេងៗក្នុងខេត្តព្រះវិហារហាក់មានការថមថយគួរឱ្យកត់សម្គាល់ ក្នុងនោះមានបទល្មើសគ្រឿងញៀន ល្បែងស៊ីសង ក៏ដូចជាបទល្មើសដឹកជញ្ជូនធនធានធម្មជាតិផងដែរ តែបទល្មើសខ្លះទៀតក៏នៅតែកើតមានដដែល ដែលករណីនេះលោកបានដាស់តឿនដល់មន្ត្រីអនុវត្តន៍ត្រូវខិតខំបន្ថែមទៀត ដោយឈរលើស្មារតីទទួលខុសត្រូវខ្ពស់ចំពោះមុខងារ និងតួនាទីរបស់ខ្លួន។
ជាមួយគ្នានោះ ឯកឧត្តម ប្រាក់ សុវណ្ណ ក៏បានលើកឡើងចំពោះការនាំសត្វចូលពីប្រទេសឡាវ មកស្តុកទុកនៅឃុំកំពង់ស្រឡៅ ស្រុកឆែប សម្រាប់ធ្វើការបែងចែកដឹកជញ្ជូនលក់ទៅកាន់ទីផ្សាក្នុងស្រុកដែលព័ត៌មានបានចុះផ្សាយប៉ុន្មានថ្ងៃមុននោះ គឺលោកបានដាក់បទបញ្ជាដល់អាជ្ញាធរស្រុកឆែបឱ្យធ្វើកិច្ចការនេះហើយ លោកថាក្នុងនាមថ្នាក់ដឹកនាំខេត្ត លោកមិនអនុញ្ញាតឱ្យមានការនាំចូលទំនិញឆ្លងដែនខុសច្បាប់ចូលមកចែកចាយក្នុងស្រុកជាដាច់ខាត ដូច្នេះអាជ្ញាធរក្រុង ស្រុក និងសមត្ថកិច្ចពាក់ព័ន្ធត្រូវពិនិត្យឱ្យបានច្បាស់លាស់ និងបង្ក្រាបឱ្យបាន៕
