(ខេត្តកែប)÷ យើងត្រូវរួមគ្នាដាំដើមឈើឲ្យបានច្រើននៅគ្រប់ទីកន្លែងនៃតំបន់ទេសចរណ៍ ពិសេសជំរុញការធ្វើអនាម័យសម្អាតបរិស្ថាននៅតាមទីសាធារណ: ធ្វើបែបនះ ដើម្បីជួយបង្កើនភាពបៃតង សម្រាប់ធ្វើឲ្យរមណីយដ្ឋានខេត្តកែបកាន់តែមានសម្រស់ស្រស់ត្រកាល។
ការលើកឡើងបែបនេះ ជាប្រសាសន៍របស់ លោក សោម ពិសិដ្ឋ អភិបាលខេត្តកែប កាលពីថ្ងៃអាទិត្យទី៣០ ខែសីហា ឆ្នាំ២០២០ ក្នុងឱកាសដឹកនាំមន្ត្រីរាជការដាំកូនឈើចំនួន១.០០០ដើម ដោយពិធីនេះក៏មានកិច្ចសហការជាមួយសភាយុវពាណិជ្ជករអន្តរជាតិ ដែលមានឈ្មោះថា “តោះ! យើងនាំគ្នាដាំដើមឈើ ២០២០”ស្ថិតតាមបណ្តោយផ្លូវជាតិលេខ ៣៣ អា ត្រង់ចំណុចខាងត្បូងរង្វង់មូលសេះស ក្នុងទឹកដីក្រុងកែប។
លោកអភិបាលខេត្តបានបន្តទៀតថា ការដាំកូនឈេីតាមបណ្តោយផ្លូវ នៅតាមសងខាងផ្លូវរង្វង់មូលសេះសទៅឆ្នេរកែបនេះ គឺជាការចូលរួម ថែរក្សា បង្កើនភាពបៃតង ឲ្យមានភាពស្រស់ស្អាតនៅតំបន់ទេសចរណ៍ខេត្តកែប ដើម្បីជួយបង្កើនសម្រស់ក្នុងក្រុងទេសចរណ៍របស់យើងឲ្យកាន់តែមានភាពទាក់ទាញមួយកម្រឹតទៀត៕ សេង ណារិទ្ធ
