(ខេត្តកែប)៖ ស្នងការដ្ឋាននគរបាលខេត្តកែប កាលពីរសៀលថ្ងៃទី២៨ ខែសីហា ឆ្នាំ២០២០ បានរៀបចំកិច្ចប្រជុំដើម្បីត្រួតពិនិត្យ សភាពការណ៍ លទ្ធផលការងារប្រចាំខែសីហា និងលើកទិសដៅបន្តខែកញ្ញា ឆ្នាំ២០២០ ក្រោមអធិបតីភាពលោកឧត្តមសេនីយ៍ត្រី សម្បត្តិ សុធារដ្ឋ ស្នងការនគរបាលខេត្តកែប ដែលមានការអញ្ជើញចូលរួមពីលោក លោកស្រីស្នងការរងគ្រប់ផែន នាយ នាយរងការិយាល័យ អធិការ អធិការរងក្រុង ស្រុក ប្រធាន អនុប្រធានក្រុមចំរុះនគរបាលខេត្ត ចុះប្រចាំការតំបន់រមណីយដ្ឋានទាំង៥ និងប្រចាំការតាមប៉ុស្តិ៍នគរបាលរដ្ឋបាលទាំង៥ឃុំ សង្កាត់ នាយ នាយរងប៉ុស្តិ៍រដ្ឋបាល និងប្រធាន អនុប្រធានក្រុមអន្តរាគមន៍ពិសេសទាំង៣ក្រុម សរុបចំនួន៩៦នាក់។
បន្ទាប់ពីបានស្តាប់របាយការណ៍ប្រចាំខែសីហា និងលទ្ធផលការងារការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នាឱកាសឈប់សម្រាករយះពេល៥ថ្ងៃ សងថ្ងៃបុណ្យចូលឆ្នាំខ្មែរថ្មីៗកន្លងមកនេះ ដែលអានដោយលោកវរសេនីយ៍ឯក អ៊ូច កុម្ភះ នាយការិយាល័យ សរុបផែនការ គឺពុំមានសភាពការណ៍អ្វីគួរកត់សម្គាល់នោះទេ ហើយអង្គប្រជុំក៏បានស្តាប់ការចូលរួមយោបល់ពីបណ្តាសមាជិកអង្គប្រជុំផងដែរ។
មានប្រសាសន៍បូកសរុបអង្គប្រជុំលោកឧត្តមសេនីយ៍ត្រី សម្បត្តិ សុធារដ្ឋ ស្នងការនគរបាលខេត្ត ក៏បានកោតសរសើរដល់មន្ត្រីកងកម្លាំងគ្រប់អង្គភាព អំពីសមិទ្ធផលការងារដែលខំប្រឹងប្រែងអនុវត្តកន្លងមកនេះ និងបន្តផ្តល់មតិមួយចំនួនជុំវិញវិធានការ ក្នុងការពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម បន្តអនុវត្តរឹតបន្តឹងច្បាប់ចរាចរណ៍ផ្លូវគោក ត្រូវមានវិធានការបង្ការទប់ស្កាត់គ្រោះថ្នាក់ចរាចរណ៍ឱ្យថយចុះនៅកំរិតជាអតិប្បរិមា បង្ការបង្ក្រាបបទល្មើសព្រហ្មទណ្ឌ ការប្រយុទ្ធប្រឆាំងដោះស្រាយបញ្ហាគ្រឿងញៀនក្នុងមូលដ្ឋាន ត្រូវមានវិធានការ បង្ការ និងពន្លត់អគ្គិភ័យឱ្យបានទាន់ពេលវេលា ការជំរុញអនុវត្តន៍ឱ្យមានប្រសិទ្ធភាពខ្ពស់ គោលនយោបាយភូមិ ឃុំមានសុវត្ថិភាព ការគ្រប់គ្រងស្ថិតិប្រជាជន ការផ្តល់សេវាសាធារណៈជូនប្រជាពលរដ្ឋឱ្យបានឆាប់រហ័យ គ្រប់គ្រងកន្លែងម៉ាស្សា កន្លែងកំសាន្តសប្បាយ និងការគ្រប់គ្រងវត្តមានកំលាំងប្រចាំថ្ងៃ ប្រចាំវេនដើម្បីធានាសម្រេចជោគជ័យភារកិច្ចដែលថ្នាក់លើប្រគល់ជូនឱ្យបានល្អជាបន្តទៀត។
បន្ថែមពីនេះលោកស្នងការ ក៏បានសង្កត់ធ្ងន់ឱ្យមន្ត្រីដឹកនាំ និងមន្ត្រីជំនាញទាំងអស់ត្រូវខិតខំពង្រឹងវិន័យផ្ទាល់ខ្លួន ត្រូវពង្រឹងសាមគ្គីភាព ឯកភាពផ្ទៃក្នុងនៅគ្រប់ៗអង្គភាពឱ្យបានល្អជាបន្តទៀតផងដែរ៕ សេង ណារិទ្ធ
