(ខេត្តកែប)៖ កាលពីថ្ងៃទី២៧ ខែសីហា ឆ្នាំ២០២០ លោក សោម ពិសិដ្ឋ អភិបាលនៃគណៈភិបាលខេត្តកែប មានប្រសាសន៍ក្នុងឱកាស ជួប សំណេះសំណាលជាមួយកងកម្លាំងប្រដាប់អាវុធ បុគ្គលិកសុខាភិបាល និងក្រុមអនាម័យខេត្ត ក្រោយសម្រាកទទួលភ្ញៀវទេសចរណ៍មកកំសាន្តខេត្តកែប នាចុងសប្តាហ៍នេះ ថាត្រឹមរយៈពេលប្រាំថ្ងៃនៃឱកាសឈប់សម្រាកសងពិធីបុណ្យចូលឆ្នាំខ្មែរ ខេត្តកែបបានទទួលភ្ញៀវទេសចរណ៍ដែលមកសម្រាកលំហែកំសាន្ត ចំនួន ១៤៦៣៨៣នាក់ ក្នុងនោះ ភ្ញៀវជាតិ សរុប១៤៥៨៥៦នាក់ និងភ្ញៀវអន្តរជាតិ ៥២៧នាក់។
លោកបានបន្ថែមថា ខេត្តកែបបានត្រៀម លក្ខណៈជាស្រេចក្នុងការទទួលភ្ញៀវទេចណ៍ដែលសម្រុកមកសម្រាកកម្សាន្តបន្ថូរអារម្មណ៍ នៅលើទឹក ដីទេសចរណ៍ធម្មជាតិតំបន់សមុទ្រដ៏តូច្រឡំមួយនេះ ។ ក្នុងនោះរដ្ឋបាលខេត្ត បានដាក់ពង្រាយកងកម្លាំង និងភ្នាក់ងារសុខាភិបាល នៅគ្រប់ទីតាំងតំបន់ទេសចរណ៍សំខាន់ៗ ដើម្បីចាំរន្តរាគមន៍ ជួយសម្រួល ចរាចរណ៍ ការពារសន្តិសុខសណ្តាប់ធ្នាប់ ក៏ដូចចាំជួយសង្គ្រោះបន្ទាន់ក្នុងករណីបធានស័កណាមួយ។
ជាមួយគ្នានេះ ការប្រមូលទុកដាក់សំរាមម ការសម្អាត អនាម័យ ត្រូវបានចាក់ចែង និងដឹកជញ្ជូនទាន់ ពេលវេលា ដើម្បីរក្សាសោភ័ណភាពឱ្យបានស្អាតគ្រប់ពេលវេលា និងបានរៀបចំឱ្យមានការិយាល័យ និងលេខទូរស័ព្ទបន្ទាន់ (hot line) ចាំទទួលដោះស្រាយបញ្ហាផ្សេងៗជូនភ្ញៀវផងដែរ។
លោកអភិបាលខេត្តបានថ្លែងការកោតសរសើរ ចំពោះកិច្ចខិតប្រឹងប្រែង និងសហការគ្នាបានយ៉ាងល្អប្រសើរទាំងកម្លាំងប្រដាប់អាវុធ មន្ត្រីសុខាភិបាល ក្រុមអនាម័យ ក្រុមយុវជនគ្រប់ប្រភេទ និងមន្ត្រីរាជការខេត្តកែបទាំងអស់ ក្នុងការជួយសម្រួលរៀបចំសណ្តាប់ធ្នាប់ រក្សាសន្តិសុខរបៀបរៀបរយ ការបង្ការទប់ស្កាត់បទល្មើសផ្សេងៗពីជនឈ្លៀតឱកាសមួយចំនួន និងចូលរួមអប់រំផ្សព្វផ្សាយដល់បងប្អូន ភ្ញៀវទេចរណ៍ពីវិធានការរក្សាអនាម័យ និងវិធានការផ្សេងទៀតរបស់ក្រសួងសុខាភិបាល ក្នុងការទប់ស្កាត់ការឆ្លងរាលដាលនៃជំងឺកូវីត១៩ ។ ទាំងអស់នេះបង្ហាញឱ្យឃើញពីស្មារតីយកចិត្តទុកដាក់ រួមគ្នា ក្នុងការឈានទៅសម្រេចគោលដៅប្រកបដោយជោគជ័យ ក្នុងការទទួលភ្ញៀវទេសចរណ៍រយៈ ពេល៥ថ្ងៃកន្លងមកនេះ។
ទោះជាយ៉ាងណា លោកអភិបាលខេត្តក៏បានសូមអភ័យទោស ចំពោះបងប្អូនភ្ញៀវទេសចរមួយចំនួន លើករណី ការឡើងថ្លៃសេវាខ្ពស់ជាដើម ពីសំណាក់ អាជីវករឈ្លៀសឱ្យកាសមួយចំនួនតូច ដែលធ្វើឱ្យប៉ះពាល់ដល់សតិអារម្មណ៍របស់បងប្អូន។
ឆ្លៀតក្នុងឱកាសនោះ លោកអភិបាលខេត្តបានណែនាំដល់កងកម្លាំង និងមន្ត្រីរាជការទាំងឱ្យបន្តនូវ ស្មារតីសាមគ្គីភាពនេះបន្តទៀត សំដៅបម្រើសេចក្តីត្រូវការបងប្អូនប្រជាពលរដ្ឋ ក៏ដូចជាភ្ញៀវទេសចរណ៍ ឱ្យកាន់តែល្អប្រសើថែមទៀត ។ និងរួមគ្នាអភិវឌ្ឍខេត្តកែប ឱ្យក្លាយជាគោលដៅទេសចរធម្មជាតិ ប្រណីតកម្រិតខ្ពស់ តាមចក្ខុវិស័យរបស់ប្រមុខរាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
សូមបញ្ជាក់ថា ក្នុងពិធីសំណេះសំណាល់នោះ លោកអភិបាលខេត្ត បានផ្តល់ជូនដល់ កងកម្លាំងប្រដាប់អាវុធ បុគ្គលិកសុខាភិបាល និងក្រុមអនាម័យ សរុបទាំងអស់ ៣៦៦នាក់ មានភេសជ្ជៈ និងថវិការម្នាក់២ម៉ឺនរៀលផងដែរ៕ សេង ណារិទ្ធ
