(ខេត្តកែប)÷ នៅចុងសប្តាហ៍ចុងខែសីហា ឆ្នាំ២០២០ លោក សោម ពិសិដ្ឋ អភិបាលខេត្តកែប បានដឹកនាំមន្ត្រីជំនាញចុះត្រួតពិនិត្យគុណភាពទំនិញ នៅតំបន់ផ្សាក្តាម ដោយពិនិត្យឃើញបង្គារ ចំនួនជិត១០០គីឡូក្រាម ដែលមានចាក់បញ្ជូលសារធាតុចាហួយ និងប្រើប្រាស់សារធាតុគីមីហាមឃាត់ នៅមាននៅផ្សាក្តាម និងបានដកហូតយកទៅផុតបំផ្លាញចោលផងដែរ ។
ចំពោះករណីត្រួតពិនិត្យឃើញមានបង្គាចាក់សារជាតិចាហ៊ួយនេះ រដ្ឋបាលខេត្ត បាន និងកំពុងចាត់វិធានការ ដើម្បីការអនុវត្តច្បាប់ ដោយបានអនុវត្តន៍តាមអនុសាសន៍របស់រាជរដ្ឋាភិបាលក្នុងការធានាគុណភាពម្ហូបអារហារ និងទំនិញផ្សេងៗ តាមរយៈការការស្រាវជ្រាវ ស៊ើបអង្កេត និងត្រួតពិនិត្យយ៉ាងហ្មត់ចត់ ដោយសហការជាមួយមន្ទីរអង្គភាពជំនាញ ប្រមូលផ្ដុំព័ត៌មាន ដើម្បីកំណត់អំពីមុខសញ្ញា និងទីតាំង ដើម្បីធ្វើការបង្ក្រាប ដោយមិនបណ្តោយទុកឲ្យមុខសញ្ញា ដែលជាឈ្មួញឆ្លៀតឱកាស ធ្វើសកម្មភាពបន្លំនាំយកទំនិញអន់គុណភាព មកចរាចលក់ក្នុងទីផ្សារខេត្តកែបបានឡើយ។
ក្នុងឱកាសនោះផងដែរ លោកអភិបាលខេត្ត បានសំណូមពរដល់អង្គភាព និងស្ថាប័នជំនាញពាក់ព័ន្ធទាំងអស់ បន្តចូលរួមសហការឲ្យកាន់តែមានប្រសិទ្ធភាពខ្ពស់បន្ថែមទៀត និងបានអំពាវនាវដល់ប្រជាពលរដ្ឋ ឲ្យមានការប្រុងប្រយ័ត្ន ចំពោះផលិតផលក្លែងក្លាយ និងចូលរួមសហការ ផ្តល់ព័ត៌មានជូនសមត្តកិច្ច ក្នុងករណីពិនិត្យសង្ស័យឃើញថា មានទីតាំងលក់ផលិតផលផ្សេងៗ ដែលខុសច្បាប់ ដើម្បីចូលរួមទប់ស្កាត់ ននិងការពារសុខមាលភាពជូនប្រជាពលរដ្ឋ៕ សេង ណារិទ្ធ
