(ខេត្តកំពត)÷ ក្រុមហ៊ុនវិនិយោគមួយបានដាក់ពាក្យស្នើសុំធ្វើការអភិវឌ្ឍន៍មជ្ឈមណ្ឌលពាណិជ្ជកម្មនៅតំបន់ឆ្នេរជាប់ព្រំដែនកម្ពុជា-វៀតណាមគឺខេត្ត (កំពត-គៀងយ៉ាង) ដោយគ្រោងចំណាយថវិកាប្រមាណជិត៤៣លានដុល្លារអាមេរិក។
ទាក់ទិននឹងការវិនិយោគខាងលើ កាលពីរសៀលថ្ងៃទី១៣ ខែសីហា ឆ្នាំ២០២០ រដ្ឋបាលខេត្តកំពតបានបើកកិច្ចប្រជុំពិភាក្សាជាមួយ ក្រុមហ៊ុន(ហ្គោលខូសថ៍អ៊ីនធើណេសិនណល ឌីវេឡុបមិន ខូអិលធីឌី)ស្ដីពីគម្រោងវិនិយោគអភិវឌ្ឍន៍មជ្ឈមណ្ឌលពាណិជ្ជកម្ម នៅតំបន់ឆ្នេរភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពត។
កិច្ចប្រជុំនោះធ្វើឡើង ដើម្បីសិក្សា ពិនិត្យវាយតម្លៃ ទាំងផលប៉ះពាល់ និងទិដ្ឋភាពផ្លូវច្បាប់ផ្សេងៗ សម្រាប់សុំគោលការណ៍ទៅរាជរដ្ឋាភិបាល។ នៅក្នុងគម្រោងមជ្ឈមណ្ឌលពាណិជ្ជកម្ម មានសណ្ឋាគារកម្រិតផ្កាយ៤ អាគារផ្សារទំនើប មណ្ឌលកំសាន្ត ខុនដូ និងសេវាកម្មទេសចរណ៍ ព្រមទាំងហេដ្ឋារចនាសម្ព័ន្ធផ្លូវថ្នល់មួយចំនួននៅលើផ្ទៃដីទំហំ៤២ ហិកតា ហើយតាមផែនការមេ នៃគម្រោងវិនិយោគនេះ គ្រោងចំណាយថវិកាសរុបប្រមាណជិត ៤៣លានដុល្លារអាមេរិក។
មានប្រសាសន៍នៅក្នុងកិច្ចប្រជុំនោះ លោក ជាវ តាយ អភិបាលខេត្តកំពត បានបញ្ជាក់ថាគោលនយោបាយរបស់រាជរដ្ឋាភិបាល ក្រោមការដឹកនាំដោយសម្ដេចតេជោហ៊ុន សែន គឺតែងតែបានជំរុញ និងចាត់ទុកគម្រោងវិនិយោគ ក្នុងវិស័យឯកជន គឺជាដៃគូមិនអាចខ្វះបានក្នុងដំណើរការអភិវឌ្ឍសេដ្ឋកិច្ចជាតិ និងដើម្បីកំណើនការងារ សំដៅលើកកម្ពស់ជីវភាព និងកាត់បន្ថយភាពក្រីក្ររបស់ប្រជាពលរដ្ឋ។ ដូច្នេះរាល់គម្រោងនានាទាំងវិស័យរដ្ឋ និងវិស័យឯកជន រដ្ឋបាលខេត្តកំពត តែងតែបានចូលរួមគាំទ្រ និងសូមស្វាគមន៍ទទួលសំណើ ក្នុងកិច្ចសហការជាមួយដៃគូជានិច្ច ពោលឲ្យតែការវិនិយោគណា បម្រើដល់សេដ្ឋកិច្ចជាតិ កំណើនការងារ និងពិសេសធ្វើឲ្យជីវភាពរស់នៅរបស់ប្រជាពលរដ្ឋចប់តំបន់ព្រំដែនបានល្អប្រសើរឡើងប្រកបដោយចីរភាព និរន្តរភាព។
លោកបានបញ្ជាក់ទៀតថា កិច្ចប្រជុំពេលនេះ គឺគ្រាន់តែជាការពិនិត្យពិភាក្សា ចូលរួមមតិយោបល់ពីមន្ទីរ អង្គភាពស្ថាប័នជំនាញ និងអាជ្ញាធរពាក់ព័ន្ធ លើគម្រោងដែលបានដាក់បង្ហាញក្នុងជំហរជាក់លាក់នៅក្នុងប្លង់គោលមេ របស់ក្រុមហ៊ុនវិនិយោគតែប៉ុណ្ណោះ ហើយជំហានបន្ទាប់ លោកនឹងចាត់បញ្ជូនក្រុមការងារឱ្យចុះពិនិត្យសិក្សាវាយតម្លៃលើផលប៉ះពាល់ ដល់ទីតាំងជាក់ស្ដែង ការងារបច្ចេកទេស ទិដ្ឋភាពផ្លូវច្បាប់ និងកសាងឯកសារពាក់ព័ន្ធដទៃទៀត រួចទើបគោរពបញ្ជូនសំណើរសុំគោលការណ៍ពីក្រុមប្រឹក្សាអភិវឌ្ឍន៍កម្ពុជា (CDC)និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីពិនិត្យ និងសម្រេចលើគម្រោងស្នើសុំនេះ៕ សេង ណារិទ្ធ
