(ខេត្តកំពត)៖ អភិបាលខេត្តកំពតបានលើកឡើងថា រដ្ឋបាលក្រុង ស្រុក កម្លាំងសមត្ថកិច្ចត្រូវបង្កើនការយកចិត្តទុកដាក់ ចុះពិនិត្យ ពិភាក្សា ដើម្បីរកវិធីដោះស្រាយបញ្ហា ឲ្យមានប្រសិទ្ធភាពខ្ពស់ ពិសេសត្រូវរួមសហការគ្នាបំផុសប្រជាពលរដ្ឋទូទាំងខេត្តឲ្យបន្តអនុវត្តវិធានការអនាម័យ អនុវត្តតាមបទបញ្ជា និងចំណាត់ការរបស់រាជរដ្ឋាភិបាល ក្នុងការប្រយុទ្ធប្រឆាំងនឹងកូវីដ១៩ កុំឲ្យឆ្លងដល់សហគមន៍ ពិសេសនៅក្នុងថ្ងៃឈប់សម្រាកសង ថ្ងៃបុណ្យចូលឆ្នាំថ្មីដែលបានអះខាន់កន្លងមក។
ក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តកំពត កាលពីថ្ងៃទី១៣ ខែសីហា ឆ្នាំ២០២០ លោក ជាវ តាយ អភិបាលខេត្តកំពតបានលើកឡើងថា គណៈបញ្ជាការឯកភាព គឺជាបញ្ជាការឯកភាពតែមួយ ដែលមានការចូលរួមពីមន្ទីរ អង្គភាព កងកម្លាំងសមត្ថកិច្ចពាក់ព័ន្ធទូទាំងខេត្ត។ ដូច្នេះហើយ ថ្នាក់ដឹកនាំជុំវិញខេត្ត ត្រូវរួបរួមគ្នាពិនិត្យ ពិភាក្សារាល់បញ្ហា ដែលកើតឡើងនៅក្នុងភូមិសាស្ត្រខេត្តគ្រប់គ្រង និងត្រូវធ្វើសេចក្តីរាយការណ៍ ពីបញ្ហាប្រឈម ដើម្បីរកវិធីដោះស្រាយតាមគ្រប់មធ្យោបាយ សំដៅធ្វើឲ្យល្អប្រសើរ និងមានប្រសិទ្ធភាពខ្ពស់ ជូនដល់ប្រជាពលរដ្ឋ។
លោកអភិបាលខេត្តបានបន្តថា គណៈបញ្ជាការឯកភាពរដ្ឋបាលគ្រប់ថ្នាក់ ទាំងថ្នាក់ខេត្ត ក្រុង ស្រុក ត្រូវបង្កើនការយកចិត្តទុកដាក់សង្កេត ពិនិត្យ និងវាយតម្លៃ រាល់បញ្ហា និងរាល់សកម្មភាព ឬហេតុការណ៍ដែលកើតនៅក្នុងបណ្ដាក្រុង ស្រុក គណៈបញ្ជាការឯកភាពក្រុង ស្រុក ត្រូវមានវិធានការ និងធ្វើសកម្មភាពដោះស្រាយដោយផ្ទាល់ ប៉ុន្តែក្នុងករណីការដោះស្រាយហើយ ពុំទទួលបានលទ្ធផល ត្រូវរាយការណ៍មកខេត្ត ដើម្បីសហការគ្នាអនុវត្តធ្វើយ៉ាងណា ដោះស្រាយឲ្យមានប្រសិទ្ធភាពខ្ពស់។
លោកមអភិបាលខេត្តបានស្នើឲ្យបង្កើនការយកចិត្តទុកដាក់ អនុវត្តឲ្យបានកាន់តែប្រសើរថែមទៀត ពិសេស សុខសុវត្ថិភាព និងសណ្តាប់ធ្នាប់សាធារណៈនៅថ្ងៃឈប់សម្រាកសង ថ្ងៃបុណ្យចូលឆ្នាំខ្មែរចាប់ពីថ្ងៃទី១៥ ដល់ថ្ងៃទី ២៣ខែសីហា ឆ្នាំ២០២០នេះ ហើយអាជ្ញាធរក្រុងស្រុក និងសមត្ថកិច្ចជំនាញពាក់ព័ន្ធ ត្រូវរួមសហការគ្នាឲ្យបានល្អ ទប់ស្កាត់រាល់បទល្មើសផ្សេងៗ ដែលជនល្មើសតែងឆ្លៀតឱកាសក្នុងពេលថ្ងៃឈប់សម្រាក។ បន្តផ្សព្វផ្សាយអប់រំណែនាំ ឲ្យបានទូលំទូលាយ ដល់ប្រជាពលរដ្ឋ ដើម្បីឲ្យពលរដ្ឋបន្តអនុវត្តតាមចំណាត់ការរបស់រាជរដ្ឋាភិបាល ក៏ដូចក្រសួងមហាផ្ទៃ ពិសេសវិធានការបង្ការទប់ស្កាត់ជំងឺកូវីដ១៩ ឲ្យកាន់តែប្រសើរ ចៀសផុតពីការចម្លងទៅក្នុងសហគមន៍ ឬមូលដ្ឋាននៅក្នុងឱកាសឈប់សម្រាកពីការងារនោះ៕
សេង ណារិទ្ធ
