(ខេត្តកំពត)៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានស្នើដល់ប្រជាកសិករ ទូទាំងប្រទេស សូមព្យាយាមប្រែក្លាយ អន្តរកាលនៃវិបត្តិកូវីដ១៩ ឲ្យទៅជាឱកាសក្នុងការពង្រីក និងពង្រឹងសមត្ថភាពចិញ្ចឹមសត្វត្រី កង្កែប និងកន្ធាយដើម្បីបង្កើនប្រាក់ចំណូល និងធានាដល់និរន្តរភាព និងសន្តិសុខស្បៀងអាហារអំឡុងពេលកូវីដ១៩ និងឈានដល់ការផ្គត់ផ្គង់ឲ្យទីផ្សារនាំចេញ។
មានប្រសាសន៍ ក្នុងពិធីជួបសំណេះសំណាល សាកសួរសុខទុក្ខ និងនាំយកកូនត្រីអណ្តែង កូនកង្កែប និងសម្ភារ:ចិញ្ចឹម ដូចជាតង់ និងចំណី មកចែកជូនកសិករចំនួន៥១គ្រួសារនៅភូមិត្រពាំងត្នោត ឃុំដំបូកខ្ពស់ ស្រុកអង្គរជ័យ ខេត្តកំពត កាលពីថ្ងៃទី០៨ ខែសីហា ឆ្នាំ២០២០ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលរូមដំណើរដោយ លោក ជាយ តាយ អភិបាលខេត្តកំពតផងនោះ បានលើកឡើងប្រាប់ប្រជាកសិករថា វិស័យវារីវប្បកម្មត្រូវបានទទួលការលើកទឹកចិត្ត និងជួយឧបត្ថម្ភថវិកាដ៏ខ្ពង់ខ្ពស់ពីសម្តេចតេជោចំនួន ២០០០លានរៀល ក្នុងឆន្ទ:ចូលរួមបង្កើតការងារ ពង្រឹង និងពង្រីកសកម្មភាពចិញ្ចឹមត្រី និងកង្កែប ជាលក្ខណ:គ្រួសារ ដើម្បីបង្កើនចំណូលធានាសន្តិសុខស្បៀងក្នុងគ្រួសារ ស្របពេលដែលសេដ្ឋកិច្ចជាតិ និងវិស័យមួយចំនួនទៀតកំពុងប្រឈមនឹងវិបត្តិជំងឺឆ្លងកូវីដ-១៩។
លោករដ្ឋមន្ត្រីបានបន្តថា ម្តេចតេជោហ៊ុន សែន បានខិតខំប្រឹង ប្រែងយកអស់កម្លាំងកាយចិត្ត ប្រាជ្ញាស្មារតី គិតគូពីបញ្ហាជីវភាពរបស់ប្រជាពលរដ្ឋ ដោយបានដាក់ចេញនូវវិធានការបាច់សំខាន់ៗមួយចំនួន ចំពោះមុខដើម្បីចូលរួមថែរក្សាការពារ និងទ្រទ្រង់សេដ្ឋកិច្ចគ្រួសារ ឲ្យមានចីរភាព និងនិរន្តរភាព រក្សាសុវត្ថិភាពស្បៀងក្នុងគ្រួសារតាមរយ:ការបង្កើនផលិតភាពផលិតកម្មកសិកម្ម ប្រែក្លាយវិបត្តិ ទៅជាឱកាសដើម្បីពង្រីក និងពង្រឹងសមត្ថភាពចិញ្ចឹមតាមគ្រប់រូបភាព ដោយត្រូវសហការជាមួយមន្ទីរកសិកម្ម រុក្ខាប្រមាញ់និងនេសាទ និងខណ្ឌរដ្ឋបាលជលផល។ ដូច្នេះប្រជាកសិករ ត្រូវចូលរួមទាំងអស់គ្នា ក្នុងការងារវារីវប្បកម្ម ព្រោះវាងាយស្រួល ហើយទទួលបានប្រាក់ចំណូលខ្ពស់ ជាងការដាំដុះបន្លែដំណាំ ជាពិសេសដំណាំស្រូវតែម្តង។
ក្នុងការជំរុញនេះ រដ្ឋមន្ត្រីក្រសួងកសិកម្ម និងលោកអភិបាលខេត្តកំពត សង្ឃឹមថា កសិករដែលទទួលពូជយកទៅចិញ្ចឹម ត្រូវមើលថែទាំឲ្យបានល្អ និងផ្លាស់ប្តូរផ្នត់គំនិតដើម្បីប្រែក្លាយ ពីអ្នកចិញ្ចឹមសម្រាប់តែសន្តិខុសស្បៀងក្នុងគ្រួសារ ទៅជាអ្នកផលិតសម្រាប់ការផ្គត់ផ្គង់ឲ្យទីផ្សារ ដើម្បីទទួលបានចំណូល និងបង្កើនកម្រិតជីវភាពក្នុងស្ថានភាពនៃជំងឺឆ្លងកូវីដ-១៩នេះ។
ទន្ទឹមគ្នានោះ រដ្ឋមន្ត្រីក្រសួងកសិកម្ម បានណែនាំដល់មន្ត្រីជំនាញរដ្ឋបាលជលផល ឲ្យបន្តចុះជួយផ្សព្វផ្សាយ បណ្តុះបណ្តាលបន្ថែម លើការងារបច្ចេកទេសចិញ្ចឹម បង្កាត់ ភ្ញាស់កូន វិធីលាយផ្សំចំណី និងការថែទាំ និងបំផុសការចិញ្ចឹមកន្ធាយផងដែរ និងត្រូវបង្កើនសកម្មភាពចុះចែកកូនត្រី កូនកង្កែប និងតង់ចិញ្ចឹម ដល់គ្រួសារដែលចង់ពង្រីកអាជីវកម្មបន្ថែម និងអ្នកដែលចង់ចាប់ផ្តើមចិញ្ចឹម ហើយត្រូវយកចិត្តទុកដាក់គិតគូទៅលើរចនាសម្ព័ន្ធគាំទ្រសំខាន់ៗ ដូចជាប្រភពទឹកស្អាត ប្រព័ន្ធបញ្ចេញបញ្ចូលទឹក និងអគ្គិសនី។
សូមជម្រាបថា តាមរបាយការណ៍ប្រធានមន្ទីរកសិកម្ម រក្ខាប្រមាញ់ និងនេសាទ លោក ចាន់ រិទ្ធិ បានលើកឡើងថា កសិករម្នាក់ ឈ្មោះលោកស្រី សែត ធី បានចាប់ផ្តើមអាជីពចិញ្ចឹមត្រីតាំងពីឆ្នាំ២០០៦ លើផ្ទៃដី ២ហិចតា។ ដោយទទួលបានការបណ្តុះបណ្តាលបច្ចេកទេសចិញ្ចឹមពីមន្ទីរ និងរដ្ឋបាលជលផល លោកស្រីបានពង្រីកមុខរបរជាបណ្តើរៗ រហូតមកទល់បច្ចុប្បន្នមានស្រះចិញ្ចឹម ១៥ ស្រះ ស្រះមេពូជ ៣ មានលទ្ធភាពផលិតកូនត្រីគ្រប់ប្រភេទបានចំនួន ១លានកូន និងត្រីសាច់បានជាង ៤តោនក្នុងមួយឆ្នាំ គិតជាមធ្យមបានចំណូល ៩០លានរៀលក្នុងមួយឆ្នាំ ដកថ្លៃដើមរួច នៅសល់ជាង៥០លានរៀលក្នុងមួយឆ្នាំ៕ សេង ណារិទ្ធ
