(ខេត្តកំពត)៖ ស្ថិតក្នុងស្ថានភាព ធាតុអាកាសអាប់អួរ ហើយភ្លៀងនៅតែបន្តធ្លាក់ជាប់គ្នារយៈពេល៣ ថ្ងៃគឺចាប់ពីថ្ងៃទី៣១ខែកក្កដា ដល់ថ្ងៃទី ២ខែសីហាឆ្នាំ២០២០ លោក ជាវ តាយ អភិបាលកំពត បានអញ្ជើញចុះពិនិត្យស្ថានភាពទឹក នៅតាមដងព្រែក កំពង់បាយក្រុងកំពត រហូតដល់ព្រែកទឹកឈូ ឆ្លងកាត់ក្នុងឃុំម៉ាក់ប្រាង្គនិងឃុំកំពង់គ្រែង ក្នុងស្រុកទឹកឈូ ខេត្តកំពត នៅរសៀលថ្ងៃទី០២ ខែសីហា ឆ្នាំ២០២០។ ក្នុងដំណើរចុះពិនិត្យ ក៏មានការរួមដំណើរដោយអភិបាលរងខេត្ត ថ្នាក់ដឹកនាំមន្ទីរអង្គភាពពាក់ព័ន្ធ និងអភិបាលស្រុកទឹកឈូក្រុងកំពត និងកងកម្លាំងនគរបាលខេត្តនគរបាលការពារព្រំដែនទឹកវីរៈសេនាតូចលេខ២៤១ ផងដែរ។
លោក ជាវ តាយ អភិបាលខេត្តកំពត បានលើកឡើងថា បើតាមការពិនិត្យវាយតម្លៃស្ថានភាពទឹកតាមដងព្រែក នៅពេលនេះ គឺនៅមិនទាន់មានការព្រួយបារម្ភចំពោះផលប៉ះពាល់ នៃការលិចលង់ ដល់លំនៅដ្ឋានផ្ទះសំបែង ស្រែចំការរបស់ប្រជាពលរដ្ឋនៅឡើយ។ ប៉ុន្តែបើភ្លៀងនៅតែបន្តធ្លាក់ គឺយើងមិនត្រូវមានការធ្វេសប្រហែសឡើយ ដូច្នេះសូមឱ្យអាជ្ញាធរមូលដ្ឋាន និងកងកម្លាំងសមត្ថកិច្ច គ្រប់ថ្នាក់ គ្រប់ផ្នែកត្រូវប្រុងប្រយ័ត្ន បន្តតាមដានចំពោះបាតុភូត ឬធាតុអាកាសដែលអាចបង្កឱ្យមានជំនន់ទឹកភ្លៀង ធ្វើឲ្យប្រជាពលរដ្ឋជួបការលំបាកឬរងគ្រោះដោយប្រការផ្សេងៗ។ ជាពិសេសត្រូវត្រៀមលក្ខណៈ គ្រប់មធ្យោបាយ ដើម្បីជួយអន្តរាគមន៍ឬជំលៀសប្រជាពលរដ្ឋទៅកាន់ទីទួលសុវត្ថិភាព ក្នុងករណីមានហេតុការណ៍ទឹកជំននន់កើតឡើង។ ទន្ទឹមនឹងនោះក៏សូមឲ្យអាជ្ញាធរមូលដ្ឋានរាយការណ៍មករដ្ឋបាលខេត្តជាបន្ទាន់ ដោយមិនត្រូវទុកឲ្យប្រជាពលរដ្ឋណាម្នាក់រងគ្រោះដោយជំនាន់ទឹកភ្លៀងនេះហើយគ្មានការអន្តរាគមន៍ពីអាជ្ញាធរនិងកងកម្លាំងសមត្ថកិច្ចយើងបានឡើយ។
ជាមួយនេះ លោកអភិបាលខេត្តក៏បានស្នើដល់ប្រជាពលរដ្ឋដែលរស់នៅតាមបណ្តោយព្រែកទាំងអស់ រួមទាំងម្ចាស់បឹងហ្គាឡូ រមណីយដ្ឋាននានា ស្ថិតនៅជាប់ទីតាំងដងព្រែក ត្រូវមានការប្រុងប្រយ័ត្នខ្ពស់ ដូចប្រព័ន្ធភ្លើងអគ្គិសនីប្រើប្រាស់ និងរបស់របរសំខាន់ៗជាដើមត្រូវត្រៀមលក្ខណៈបង្ការមុនពេលមានទឹកជំនន់មកដល់៕ សេង ណារិទ្ធ
