(ភ្នំពេញ)៖ នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានចេញសេចក្តីណែនាំមួយឱ្យអង្គភាពក្រោមចំណុះទាំងអស់ អនុវត្តវិធានការធានាស្ថិរភាព សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម នៅអំឡុងពេលឈប់សម្រាកសងបុណ្យចូលឆ្នាំ រយៈពេល៥ថ្ងៃ ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ ខាងមុខនេះ។
តាមសេចក្តីណែនាំនេះ នាយឧត្តមសេនីយ៍ នេត សាវឿន បានធ្វើការណែនាំទៅកាន់អង្គភាពក្រោមចំណុះដូចតទៅ៖
* ទី១៖ ត្រូវយកចិត្តទុកដាក់បង្កើនការក្តាប់សភាពការណ៍ពាក់ព័ន្ធសន្តិសុខ សណ្ដាប់ធ្នាប់សង្គម ជាពិសេស សកម្មភាពភេរវកម្ម ឧក្រិដ្ឋកម្មឆ្លងដែនគ្រប់ប្រភេទ ឧបាយកល សកម្មភាពប៉ុនប៉ងបង្កចលាចលសង្គម និងសកម្មភាពល្មើសផ្សេងៗទៀត ដើម្បីចាត់វិធានការបង្ការ ទប់ស្កាត់ និងបង្ក្រាបឲ្យមានប្រសិទ្ធភាព ទាន់ពេលវេលា។
* ទី២៖ ត្រូវជំរុញការអនុវត្តគោលនយោបាយ «ភូមិ-ឃុំ មានសុវត្ថិភាព» ឲ្យបានសកម្មផុលផុស និងត្រូវយកចិត្តទុកដាក់គ្រប់គ្រងឲ្យបានហ្មត់ចត់ នូវមុខសញ្ញាគ្រប់ប្រភេទ នៅតាមសហគមន៍ ភូមិ-ឃុំ ដោយប្រើប្រាស់គ្រប់វិធានការ ដើម្បីបំបាត់ប្រសិទ្ធភាពមុន មិនទុកឲ្យមុខសញ្ញាមានឱកាស ធ្វើសកម្មភាពបង្កអសន្តិសុខ ឬគ្រោះថ្នាក់ដល់អាយុជីវិត និងអន្តរាយដល់ទ្រព្យសម្បត្តិប្រជាពលរដ្ឋ។
* ទី៣៖ ត្រូវបង្កើនវិធានការសន្តិសុខ និងសណ្ដាប់ធ្នាប់សាធារណៈឲ្យបានម៉ឺងម៉ាត់ នៅតាមបណ្ដាគោលដៅ កម្សាន្តសប្បាយរបស់ប្រជាពលរដ្ឋ ដើម្បីរក្សានូវសណ្ដាប់ធ្នាប់ឲ្យបានល្អប្រសើរ ជាពិសេសត្រូវយកចិត្តទុកដាក់ ការពារសុវត្ថិភាពដាច់ខាត ថ្វាយព្រះមហាក្សត្រ ថ្នាក់ដឹកនាំកំពូលៗ និងឥស្សរជនជាន់ខ្ពស់របស់ជាតិ ដែលយាង និងអញ្ជើញធ្វើដំណើរកម្សាន្ត និងសាកសួរសុខទុក្ខប្រជាពលរដ្ឋនាឱកាសនេះ។
ទន្ទឹមគ្នានេះ ត្រូវយកចិត្ត ទុកដាក់យាមកាម ល្បាតការពារផ្ទះសំបែង ទ្រព្យសម្បត្តិប្រជាពលរដ្ឋដែលចាកចេញទៅជួបជុំសាច់ញាតិ នៅឯស្រុកកំណើត ឬទៅកម្សាន្តនៅទីឆ្ងាយទាំងគ្រួសារ។
* ទី៤៖ ជំរុញអនុវត្តតាមខ្លឹមសារសេចក្ដីណែនាំ របស់ក្រសួងមហាផ្ទៃ និងរបស់អគ្គស្នងការដ្ឋាននគរបាលជាតិ ស្ដីពីវិធានការបន្ទាន់សម្រាប់បង្ការ និងការទប់ស្កាត់ ការរាតត្បាតជំងឺកូវីដ-១៩ ដោយណែនាំឲ្យមន្ត្រីបន្តចុះធ្វើការផ្សព្វផ្សាយ អប់រំបន្ថែមទៀតអំពីវិធានសុខាភិបាល ដល់ប្រជាពលរដ្ឋឲ្យបានយល់ជ្រួតជ្រាប និងចូលរួមបង្ការជំងឺឆ្លងដ៏កាចសាហាវនេះ ជាពិសេសនៅតាមបណ្ដារមណីយដ្ឋាន ទីប្រជុំជនទីសាធារណៈ។ ក្នុងករណីសង្ស័យមានអ្នកផ្ទុកវីរ៉ុសកូវីដ-១៩ ត្រូវរាយការណ៍ជាបន្ទាន់ ទៅអាជ្ញាធរមានសមត្ថកិច្ចដែលនៅជិតបំផុត។
* ទី៥៖ ទប់ស្កាត់ និងបង្ក្រាបឲ្យបានទាន់ពេល នូវរាល់សកម្មភាពដូចជា៖ សកម្មភាពក្មេងទំនើង អំពើហិង្សា ការលេងល្បែងស៊ីសងគ្រប់ប្រភេទ ការប្រើប្រាស់អាវុធ គ្រឿងផ្ទុះគ្រាប់រំសេវដែលនាំឲ្យគ្រោះថ្នាក់ បង្កការភ័យខ្លាចដល់ប្រជាពលរដ្ឋ និងនាំឲ្យជះឥទ្ធិពលមិនល្អដល់កិត្តិយស សេចក្ដីថ្លៃថ្នូររបស់សង្គមជាតិ។
* ទី៦៖ ជំរុញរឹតបណ្ដឹងការអនុវត្តច្បាប់ចរាចរណ៍ផ្លូវគោក និងផ្សព្វផ្សាយអនុក្រឹត្យលេខ ៣៩អនក្រ.បក ចុះថ្ងៃទី១៧ ខែមីនា ឆ្នាំ២០២០របស់រាជរដ្ឋាភិបាល ស្ដីពីការកែសម្រួលការពិន័យអន្តរការណ៍ ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក និងមានផែនការជាមុនក្នុងការរៀបចំសណ្ដាប់ធ្នាប់ សម្រួលចរាចរណ៍ តាមបណ្ដាផ្លូវជាតិ ទីប្រជុំជនពិសេសច្រកចេញ-ចូលរាជធានី ទីរួមខេត្ត ក៏ដូចជាគោលដៅផ្សេងៗ ដើម្បីកាត់បន្ថយបាននូវការកកស្ទះ និងគ្រោះថ្នាក់ ដែលអាចកើតឡើងជាយថាហេតុ។
* ទី៧៖ ត្រូវយកចិត្តទុកដាក់អប់រំប្រជាពលរដ្ឋ ឲ្យមានស្មារតីប្រុងប្រយ័ត្ន ចំពោះគ្រោះអគ្គិភ័យ គ្រោះមហន្តរាយនានា ដោយត្រូវរៀបចំកម្លាំង និងមធ្យោបាយ ត្រៀមបម្រុងប្រចាំការ ២៤/២៤ម៉ោង ដើម្បីសហការជួយ សង្គ្រោះ នៅពេលដែលអគ្គិភ័យ ឬគ្រោះធម្មជាតិកើតមានឡើង។
* ទី៨៖ ត្រូវពង្រឹងបន្ថែមការងារប្រចាំបញ្ហាគ្រប់ថ្នាក់ និងត្រៀមកម្លាំងសម្រាប់ចេញអន្តរាគមន៍ គ្រប់កាលៈទេសៈដោយត្រូវសហការជាមួយ បណ្ដាញព័ត៌មានសំខាន់ៗ ដើម្បីផ្តល់ព័ត៌មានទាន់ហេតុការណ៍ ដូចជាការកកស្ទះចរាចរណ៍ ធ្វើឲ្យប្រជាជនបានដឹងជាមុន ដើម្បីបង្វែរទិសចរាចរណ៍។ ជាមួយគ្នានេះ គ្រប់នាយកដ្ឋាន អង្គភាព ត្រូវចាត់តាំងឲ្យមានវេនប្រចាំការ ដោយត្រូវរៀបចំមន្ត្រីក្រោមឱវាទ ប្រចាំការប្តូរវេនគ្នា ដើម្បីឲ្យមន្ត្រី មានឱកាសបានឈប់សម្រាកបានគ្រប់ៗគ្នា។
* ទី៩៖ ត្រូវបូកសរុបសភាពការណ៍ និងលទ្ធផល នៃការអនុវត្តវិធានការការពារសុវត្ថិភាព សន្តិសុខ ក្នុងឱកាសឈប់សម្រាកនេះរាយការណ៍មក អគ្គស្នងការដ្ឋាននគរបាលជាតិ ឲ្យបានត្រឹមរសៀលនាថ្ងៃទី២៣ ខែសីហា ឆ្នាំ២០២០ជាកំណត់ (របាយការណ៍ត្រូវគិតចាប់ពីថ្ងៃទី១៥ ដល់ថ្ងៃទី២៣ ខែសីហា ឆ្នាំ២០២០)៕
ខាងក្រោមនេះជាសេចក្តីណែនាំរបស់នាយឧត្តមសេនីយ៍ នេត សាវឿន៖
