(ខេត្តកែប)៖ ក្នុងពេលដ៏ខ្លីខាងមុខនេះ រដ្ឋបាលខេត្តកែប នឹងធានាមិនមានផ្សែងបារីបំពុលបរិស្ថានដល់អ្នកទេសចរណ៍ទៀតឡើយ។
នេះជាការលើកឡើង របស់ លោកស្រី អ៊ុល ភីរុណ អភិបាលរងខេត្តកែប នៅក្នុងកិច្ចប្រជុំពិភាក្សា ស្តីពី”បរិស្ថានគ្មានផ្សែងបារី ក្នុងវិស័យទេសចរណ៍ និងចុះត្រួតពិនិត្យមូលដ្ឋានអាជីវកម្ម សេវាកម្មទេសចរណ៍”មួយចំនួនក្នុងក្រុងកែប កាលថ្ងៃទី២៧ ខែកក្កដា ឆ្នាំ២០២០ ដោយកិច្ចប្រជុំនេះ ក៏មានការអញ្ជើញចូលរួមពីលោក ហោ សារុន អនុរដ្ឋលេធិការក្រសួងទេសចរណ៍ផងដែរ។
លោកស្រី អ៊ុល ភីរុណ បានសង្កត់ធ្ងន់ទៀតថា ខេត្តកែប បានក្លាយជាគោលដៅទេសចរណ៍ សម្រាប់ភ្ញៀវជាតិ និងអន្តរជាតិ ដែលមានភាពប្រកួតប្រជែងទាំងក្នុងតំបន់ និងពិភពលោក ហើយរដ្ឋបាលខេត្ត ដោយមានមន្ទីរទេសចរណ៍ជាសេនាធិការ បានរៀបចំផែនការមេនេះ សម្រាប់ជួយខេត្តកែបឲ្យក្លាយជាគោលដៅទេសចរណ៍ធម្មជាតិស្ងប់ស្ងាត់ ប្រណិតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់ និងនៅលើពិភពលោក។
លោកស្រីបានបន្ថែមទៀតថា ដោយសារវិស័យទេសចរណ៍ ពាក់ព័ន្ធនឹងអន្តរវិស័យដូច្នេះរដ្ឋបាលខេត្តបានគិតគូរ វិស័យរៀបចំដែនដី នគរូបនីយកម្ម និងសំណង់ បរិស្ថាន គមនាគមន៍ កសិកម្ម ប្រព័ន្ធទឹកស្អាត អគ្គិសនី ការគ្រប់គ្រងសំណល់រឹង-រាវ ការបង្កើតផលិតផលទេសចរណ៍ថ្មីៗ ដែលចាំបាច់ត្រូវអនុលោមតាមសក្តានុពល និងធនធានដែលមានជាក់ស្តែង ដូចជា ធនធានធម្មជាតិ ផ្នែកសាសនា វប្បធម៌ កសិកម្ម និងវិស័យជាច្រើនទៀត ដែលមិនទាន់បានកែច្នៃ ធ្វើយ៉ាងណឲ្យស្របឯកសារបទដ្ឋានគតិយុត្ត និងឯកសារគាំទ្រដទៃទៀត សម្រាប់កំណើនវិស័យទេសចរណ៍។
សូមបញ្ជាក់ថា ក្នុងកិច្ចប្រជុំនេះ លោក ហោ សារុន អនុរដ្ឋលេខាធិការក្រសួងទេសចរណ៍ បានឲ្យដឹងថា ដើម្បីជំរុញផ្សព្វផ្សាយ ការអនុវត្តច្បាប់ស្តីពីការត្រួតពិនិត្យផលិតផលថ្នាំជក់ និងលិខិតបទដ្ឋានគតិយុត្តនានា ពិសេសសេចក្តីណែនាំ ស្តីពីបរិស្ថានគ្មានផ្សែងបារី ដល់ម្ចាស់មូលដ្ឋានអាជីវកម្ម សេវាកម្មទេសចរណ៍ទូទាំងខេត្តកែប ក្នុងគោលបំណងការពារសុខមាលភាពរបស់ប្រជាជន ការពារ និងទប់ស្កាត់ការរងនឹងផ្សែងផលិតផលថ្នាំជក់ដែលបង្កឲ្យមានហានិភ័យសុខភាព ដល់អ្នកនៅជំុវិញខ្លួន និងកាត់បន្ថយផលប៉ះពាល់ដល់សុខភាព សេដ្ឋកិច្ចសង្គម និងបរិស្ថានដែលបណ្តាលមកពីផលិតផលថ្នាំជក់។
លោកបានបញ្ជាក់ទៀតថា កម្មវិធីបរិស្ថានគ្មានផ្សែងបារី ក្នុងវិស័យទេចរណ៍នេះ ក៏មានការលើកទឹកចិត្ត និងបញ្ជាក់ពីសក្ខីភាពជាមូលដ្ឋានអាជីវកម្ម សេវាកម្មទេសចរណ៍ក្នុងខេត្ត អនុវត្តតាមច្បាប់ និងលិខិតបទដ្ឋានគតិយុត្តនានាទាក់ទងនឹងការត្រួតពិនិត្យផលិតផលថ្នាំជក់ប៉ុណ្ណោះទេ ប៉ុន្តែថែមទាំងទទួលបានការកោតសរសើរ និងទទួលស្គាល់ពីគ្រប់មជ្ឈដ្ឋានទៀតផង៕ សេង ណារិទ្ធ
