(ខេត្តកំពត)÷ ក្រោយពេលមន្ត្រីជំនាញ និងអាជ្ញាធរមានសមត្ថកិច្ចបានចុះធ្វើការអង្កេត វាយតម្លៃគ្រួសារពលរដ្ឋក្រីក្រ ក្នុងស្ថានភាពប្រយុទ្ធប្រឆាំងជំងឺឆ្លងកូវីដ១៩រួចមក ពលរដ្ឋក្រីក្រនៅឃុំស្វាយទងខាងត្បូង ស្រុកកំពង់ត្រាច ខេត្តកំពត ចំនួន៦២គ្រួសារបន្ថែមទៀត ទទួលបានប័ណ្ណសមធម៌ពីរាជរដ្ឋាភិបាល នៅថ្ងៃទី២៤ ខែកក្កដា ឆ្នាំ២០២០។ ពិធីប្រគល់ប័ណ្ណសមធម៌នេះ ក្រោមវត្តមាន លោក ជាវ តាយអភិបាលខេត្តកំពត។ ដោយបានផ្តល់ជូនគ្រួសារប្រជាពលរដ្ឋ ចំនួន៦២គ្រួសារ រស់នៅក្នុងឃុំស្វាយទងខាងត្បូង ស្រុកកំពង់ត្រាចខេត្តកំពត។
ក្នុងឱកាសនោះ លោកអភិបាលខេត្ត បានមានលើកឡើងថា ក្រោមការដឹកនាំដ៏ឈ្លាសវៃពីសំណាក់ សម្តេចអគ្គមហាសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចតែងបានយកចិត្តទុកដាក់លើវិស័យសង្គមកិច្ច និងសេវាគាំពារសង្គម ជាពិសេសដំណាក់កាលនៃការប្រយុទ្ធប្រឆាំងជំងឺឆ្លងកូវីដ-១៩ រីករាលដាលជាសកល ធ្វើឲ្យប៉ះពាល់ដល់វិស័យជាច្រើន ជាពិសេសវិស័យទេសចរណ៍ និងសេវាកម្មផ្សេងៗ នាំឲ្យមានការបាត់បង់ការងារធ្វើមួយចំនួន។ ដូច្នេះដើម្បីជួយស្រោចស្រង់ជីវភាពពលរដ្ឋ សម្តេចបានបញ្ចេញនូវសាច់ប្រាក់ផ្តល់ជូនប្រជាពលរដ្ឋតាមរយៈការកំណត់អត្តសញ្ញាកម្មគ្រួសារក្រីក្រ។
ជាមួយនេះ លោកអភិបាលខេត្តបានផ្តាំផ្ញើបងប្អូនគ្រួសារទាំងអស់ដែលមកទទួលយកប័ណ្ណសមធម៌នាពេលនេះ សូមរក្សាទុកប័ណ្ណសមធម៌នេះឲ្យបានល្អ ព្រោះថាប័ណ្ណនេះមិនត្រឹមតែអាចយកមកប្រើប្រាស់សម្រាប់បើកប្រាក់ប្រចាំខែប៉ុណ្ណោះទេ ប័ណ្ណនេះក៏អាចយកទៅប្រើប្រាស់តាមការចាំបាច់ផ្សេងៗដូចជា ការពិនិត្យ និងព្យាបាលសុខភាពនៅតាមមណ្ឌលសុខភាព ឬមន្ទីរពេទ្យដោយមិនគិតថ្លៃផងដែរ។
សូមជម្រាបថា បើតាមការលើកឡើងរបស់ប្រធានមន្ទីរផែនការខេត្តកំពត លោកមឿង គង្គា បានបញ្ជាក់ថា តាមការចុះអង្កេតស្ដីពីអត្តសញ្ញាណកម្មគ្រួសារក្រីក្រជុំទី១១ របស់មន្ត្រីជំនាញ ក្នុងកំឡុងពេលនៃស្ថានភាពប្រយុទ្ធប្រឆាំងជំងឺកូវីដ១៩ នៅក្នុងក្រុង ស្រុកទាំង៨ នៃខេត្តកំពត បានរកឃើញពលរដ្ឋក្រីក្រ សរុបប្រមាណ ២៣.២១៥គ្រួសារ ក្នុងនោះ(ក្រ១) ចំនួន១០.៧១៣គ្រួសារ, (ក្រ២) ចំនួន ១២.៥០២គ្រួសារ។ ដោយឡែកឃុំស្វាយទងខាងត្បូង នៅក្នុងដំណាក់កាលកូវីដ-១៩ នេះ ក្រុមការងារកំណត់បាននូវគ្រួសារក្រីក្រពិតប្រាកដចំនួន ១១០គ្រួសារ ក្នុងនោះ (ក្រ១) ចំនួន២៨គ្រួសារ (ក្រ២)ចំនួន៨២គ្រួសារ ហើយអាជ្ញាធរឃុំបានចែកប័ណ្ណជូនប្រជាពលរដ្ឋកន្លងមកបានចំនួន ៤៨គ្រួសារ និងបន្តចែកជូនចំនួន៦២គ្រួសារបន្ថែមទៀតក្នុងពេលនេះ ដែល(ក្រ១) ចំនួន ៧គ្រួសារ និង(ក្រ២) ចំនួន ៥៥គ្រួសារ៕ សេង ណារិទ្ធ
