ឧត្តរមានជ័យ ៖ អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) លោក ហេង រតនា បានសម្តែងនូវការដឹងគុណយ៉ាងជ្រាលជ្រៅ និងវាយតម្លៃខ្ពស់ចំពោះកិច្ចសហការយ៉ាងជិតស្និទ្ធពីសំណាក់រដ្ឋបាលខេត្តឧត្តរមានជ័យ ក្នុងបេសកកម្មមនុស្សធម៌ ដើម្បីសុវត្ថិភាពប្រជាពលរដ្ឋ ។
លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានប្រកាសនាព្រឹកថ្ងៃទី១៥ ខែមករានេះថា ៖ សូមអរគុណឯ.ឧ អភិបាលនៃគណៈអភិបាលខេត្តឧត្តរមានជ័យ និងថ្នាក់ដឹកនាំខេត្ត ក៏ដូចជា អាជ្ញាធរមូលដ្ឋានគ្រប់ឋានានុក្រម ដែលតែងតែផ្តល់ការសហការ និងគាំទ្រកម្លាំងជំនាញអង្គភាពCMAC ក្នុងកិច្ចប្រតិបត្តិការបោសសម្អាតគ្រាប់មីន និងសំណល់យុទ្ធភណ្ឌសង្គ្រាម ជាពិសេសកិច្ចប្រតិបត្តិការបោសសម្អាតសំណល់យុទ្ធភណ្ឌពីសង្គ្រាមឈ្លានពានសៀម ផ្តល់សុខសុវត្ថិភាព និងការអភិវឌ្ឍសេដ្ឋកិច្ចសង្គមជូនប្រជាពលរដ្ឋក្នុងមូលដ្ឋានខេត្តឧត្តរមានជ័យ ។
សូមបញ្ជាក់ថា លោកអគ្គនាយកសង្ឃឹមយ៉ាងមុតមាំថា ស្មារតីនៃកិច្ចសហការរវាងអង្គភាពស៊ីម៉ាក់ និងរដ្ឋបាលខេត្តឧត្តរមានជ័យ នឹងបន្តពង្រឹងឱ្យកាន់តែរឹងមាំបន្ថែមទៀត ដើម្បីសម្រេចឱ្យបាននូវគោលដៅ «កម្ពុជាគ្មានមីន» និងនាំមកនូវភាពញញឹមប្រកបដោយសុវត្ថិភាពជូនដល់ប្រជាពលរដ្ឋគ្រប់រូបនៅក្នុងខេត្តជាប់ព្រំដែនមួយនេះ ៕
