បន្ទាយមានជ័យ ៖ ល្បែងស៊ីមាន់ជល់ខ្នាយដែក និងល្បែងស៊ី សងខុសច្បាប់ផ្សេងទៀត កំពុងតែប្រព្រឹត្តទៅយ៉ាងរលូននៅនុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត គឺកណ្ដាលក្រុងប៉ោយប៉ែត បានកើតមានរាប់ខែឆ្នាំ ខណៈអាជ្ញាធរសមត្ថកិច្ចក្រុងប៉ោយប៉ែត បានមើលរំលង និងគ្មានការបង្ក្រាប ទោះបីប្រជាពលរដ្ឋ ឋនិងអ្នកសារព័ត៌មានរាយការណ៍ជូនជាច្រើនលើកច្រើនសារយ៉ាងណាក៏ដោយ ។
ភាពអសកម្ម ឬ ដោយសារតែមានអ្វីបាំងភ្នែក ទើបមើលមិនឃើញ បណ្ដោយអោយល្បែងស៊ីសងមាន់ជល់ ដែលប្រមូលផ្ដុំដោយក្រុមញៀនល្បែង ពពាក់ពពូនគ្នារាប់រយនាក់ជារៀងរាល់ថ្ងៃ ទីតាំងមួយកន្លែងស្ថិតនៅក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដែលម្ចាស់ឈ្មោះ បូរា កំពុងតែប្រព្រឹត្តទៅយ៉ាងរលូន ដោយគ្មានអាជ្ញាធរ ក៏ដូចជាសមត្ថកិច្ចក្រុងប៉ោយប៉ែត ធ្វើការបង្ក្រាបនោះឡើយ ឃើញតែហ្វូងក្រុមញៀនល្បែង លេងយ៉ាងអនាធិបតេយ្យ។
ក្រុមមេបនល្បែងស៊ីសងមាន់ជល់ឈ្មោះ បូរ៉ា ប្រព្រឹត្តទៅយ៉ាងរលូន មិនដឹងថា អាជ្ញាធរ និងស្ថាប័នពាក់ព័ន្ធនៅក្នុង គណៈបញ្ជាការឯកភាពក្រុងប៉ោយប៉ែត អសមត្ថភាព ឬ ក៏ពាក់ព័ន្ធ និងផលប្រយោជន៍នោះទេ បានជាមិនបង្រ្កាប់ នេះបញ្ជាក់បានថា ពីភាពខ្សោយរបស់មេៗសមត្ថកិច្ចជំនាញក្រុងប៉ោយប៉ែត។
ករណីនេះ សូមឯកឧត្តម អ៊ុំ រាត្រី អភិបាលខេត្តបន្ទាយមានជ័យ និង លោកសិទ្ធិ ឡោះ ស្នងការនគរបាលខេត្ត មេត្តាជួយមើលទីតាំងបនល្បែងមួយកន្លែងនេះផង ដើម្បីភូមិ ឃុំ មានសុវត្ថិភាព ៕
