នាយករដ្ឋមន្ត្រីនៃព្រះរាជាណាចក្រកម្ពុជា សម្តេចមហាបវរធិបតី ហ៊ុន ម៉ាណែត បានថ្លែងថា ស្ត្រីបច្ចុប្បន្នកាន់តែមានសមត្ថភាពខ្ពស់ និងបានដើរតួនាទីយ៉ាងសំខាន់នៅ គ្រប់វិស័យទាំងអស់នៅកម្ពុជា ដើម្បីជំរុញការអភិវឌ្ឍប្រទេសជាតិឱ្យកាន់តែរីកចម្រើន។
សម្តេចមហាបវរធិបតី ហ៊ុន ម៉ាណែត ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រ ជូននិស្សិតនៃវិទ្យាស្ថានវ៉ាន់ដា នៅមជ្ឈមណ្ឌលសន្និបាតនិងពិព័រណ៍កោះពេជ្រ នៅព្រឹកថ្ងៃទី១១ ខែមីនា ឆ្នាំ២០២៥នេះ បានសម្តែងមោទនភាពចំពោះភាពរីកចម្រើនរបស់ស្រ្តីលើវិស័យអប់រំ បន្ទាប់ពីការទទួលសញ្ញាបត្រនាពេលនេះ គឺមានរហូតដល់ជាង ៨០ ភាគរយ។
សម្តេចមហាបវរធិបតី បានបញ្ជាក់ថា បច្ចុប្បន្ននេះ នៅប្រទេសកម្ពុជា ភាពជាអ្នកដឹកនាំរបស់ស្រ្តី គឺមានការកើនឡើងខ្ពស់ ទាំងរដ្ឋ និងឯកជន ដោយសារមានការប្រែប្រួលឥរិយាបថសង្គម និងមានការលើកកម្ពស់សិទ្ធិស្រ្ដីពីរាជរដ្ឋាភិបាលកម្ពុជា។
សម្តេចធិបតី បានបញ្ជាក់ទៀតថា កាលពីមុនស្ត្រីគ្មានលទ្ធភាពក្នុងការសិក្សា ត្រូវបានបោះបង់ការសិក្សា ច្រើននៅថ្នាក់មូលដ្ឋាន ដោយសារសង្គមគិតថាកូនស្រីជាស្រ្ដីមេផ្ទះ ប៉ុន្តែស្ត្រីក្នុងពេលបច្ចុប្បន្ននេះ មានឱកាសរៀនសូត្របានច្រើនទាំងថ្នាក់វិទ្យាល័យ និងសាកលវិទ្យាល័យក៏មានច្រើន។ ជាពិសេសស្រ្ដីមានតួនាទីជាអ្នកដឹកនាំក្នុងស្ថាប័នជាតិ កងកម្លាំងប្រដាប់អាវុធ នេះបង្ហាញអំពីឱកាស សមត្ថភាពនៅក្នុងការដឹកនាំ ដើម្បីឆ្លុះបញ្ចាំងពីការឲ្យតម្លៃសិទ្ធិស្មើគ្នារវាងបុរស និងស្ត្រីរបស់សង្គមជាតិ៕
