ខេត្តកំពង់ធំ ៖ មានករណីប៉ុនប៉ុងឃាតកម្មមួយកើតឡើងនៅភូមិកោះ ឃុំទ្រា ស្រុកស្ទោង ខេត្តកំពង់ធំ កាលពីរំលងអាធ្រាតថ្ងៃទី២០ ខែតុលា ឆ្នាំ២០២៤បណ្តាលឲ្យស្ត្រីម្នាក់ឈ្មោះ ឃឿន ណាវី អាយុ១៩ឆ្នាំ រងរបួសធ្ងន់ ត្រូវបានបញ្ជូនទៅព្យាបាលមន្ទីរពេទ្យ ខេត្តសៀមរាប ក្រោយអតីតប្តីរបស់ខ្លួនបានចូលទៅចាក់ និងកាប់ ព្រោះតែភ្លើងប្រចណ្ឌ។
សមត្ថកិច្ចមូលដ្ឋាន បានឲ្យដឹងថា ជនបង្កឈ្មោះ គង់ សារ៉ុម អាយុ២៦ឆ្នាំ នៅភូមិដូនល្អ ឃុំសំព្រោជ ស្រុកស្ទោង ខេត្តកំពង់ធំ មូលហេតុជនសង្ស័យថាខ្លួនបានផឹកស្រាបៀរ មានគ្នា៤នាក់ លុះដល់ម៉ោងប្រហែល១២យប់ ខ្លួនបានខ្ចីម៉ូតូមិត្ដភក្កិ០១គ្រឿង និងដំបងទីប ប្រវែងកន្លះម៉ែត្រ ជិះពីភូមិដូនល្អ ឃុំសំព្រោជ ស្រុកស្ទោង ទៅឈប់មុខផ្ទះជនរងគ្រោះ ភូមិឃុំខាងលើ។
ជនសង្ស័យបានវាយបុកទំលុះទ្វារឈើខាងក្រោយផ្ទះ ហើយបានយកកាំបិតចិតបន្លែ របស់ជនរងគ្រោះទុកនៅចង្ក្រានបាយ និងដំបងទីបចូលទៅកាប់ និងចាក់លើជនរងគ្រោះ ត្រូវចំក្បាល០៣កន្លែង និងដៃសងខាង។
មុនពេលកើតហេតុ ជនសង្ស័យបានទូរស័ព្ទទៅជនរងគ្រោះ សួរសុំយកឯកសារសំបុត្របញ្ជាក់កំណើតកូន តែជនរងគ្រោះប្រាប់ថា មិនឱ្យទេ រួចជនសង្ស័យប្រាប់ជនរងគ្រោះថា ចឹងចាំទៅសាលាឃុំ ស្របពេលនោះជនសង្ស័យ បានសួរជនរងគ្រោះបន្តទៀតថា រាល់ថ្ងៃ នៅណាជនរងគ្រោះឆ្លើយថា នៅភ្នំពេញ ជនសង្ស័យនិយាយថា បើទៅភ្នំពេញមានតែទៅជួបប្រុស។ ភ្លាមនោះជនរងគ្រោះបិទទូរស័ព្ទ បិទលេខជនសង្ស័យមិនឱ្យខលចូលតែម្តង ទើបជនសង្ស័យមកដល់ផ្ទះជនរងគ្រោះ ហើយធ្វើសកម្មភាពកាប់នឹងចាក់តែម្តង ។
ជនសង្ស័យត្រូវបានកម្លាំងសមត្ថកិច្ចនគរបាលស្រុកស្ទោង ឃាត់ខ្លួន និងកសាងសំណុំរឿងអនុវត្តតាមនីតិវិធី៕
