កំពង់ឆ្នាំង ៖ នាថ្ងៃសុក្រ ០៣ ខែ ភទ្របទ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី២០ ខែកញ្ញា ឆ្នាំ២០២៤ របាំងស្បៃមុង លូស្បៃមុង របាំងផ្ចិតព្រែក លប ដែលជាបទល្មើសនេសាទខុសច្បាប់ ត្រូវបានកម្លាំងសមត្ថកិច្ចជលផល ក្រោមការណែនាំរបស់លោក លី ឡា នាយខណ្ឌរដ្ឋបាលជលផលកំពង់ឆ្នាំង បង្ក្រាបបាន និងបំផ្លាញចោល លើសពីនេះ ត្រីប្រមាណ ៧០ គីឡូក្រាម ត្រូវព្រលែងចូលទៅធម្មជាតិវិញ ។
សេចក្តីរាយការណ៍អោយដឹងថា ក្រុមការងារខណ្ឌរដ្ឋបាល ជលផលខត្តកំពង់ឆ្នាំង ដែលមាន សមត្ថកិច្ចផ្នែករដ្ឋបាលជលផលកំពង់សាទ រួមសង្កាត់រដ្ឋបាលជលផលកំពង់ត្រឡាច សង្កាត់រដ្ឋបាលជលផលជលគិរី សហការជាមួយសហគមន៍នេសាទភូមិព្រែកគន្លង, សហគមន៍នេសាទកំពង់ត្រឡាចក្រោម, សហគមន៍នេសាទភូមិព្រែកឆ្តោរ និង សហគមន៍នេសាទភូមិកៀនតាម៉ាដឹកនាំដោយ លោក នួន ឬទ្ធី នាយផ្នែករដ្ឋបាលជលផលកំពង់ប្រាសាទ នៃខណ្ឌរដ្ឋបាលផលកំពង់ឆ្នាំង ។ កម្លាំងចម្រុះចូលរួមសរុប ១៩ នាក់ ប្រើប្រាស់មធ្យោបាយកាណូត ៤ គ្រឿង បានចុះប្រតិបត្តិការប្រទះ ឃើញការធ្វើនេសាទដោយឧបករណ៍ លូរួមផ្សំរបាំងស្បៃមុង ស្ថិតក្នុងដែនសាទ ចំណុចបឹងក្អែកពង ភូមិក្អែកពង, ចំណុចមេទឹកបាក់មែក ភូមិ ស្ទឹងស្ងួត, ចំណុចមេទឹកស្វាខម ភូមិអំពិលទឹក, ចំណុចមេទឹកស្ដីទ្រេត ភូមិ ស្តីបន្លេច ឃុំអំពិលទឹក ស្រុកកំពង់ត្រឡាច និងសហការជាមួយគណៈបញ្ជាការឯកភាពស្រុកជលគិរី បានចុះប្រតិបត្តិការប្រទះឃើញការធ្វើនេសាទដោយប្រើឧបករណ៍របាំងស្បៃមុង និងរបាំងផ្ចិតព្រែក នៅចំនុចដីក្រហម និងព្រែកគោស្លាប់ ក្នុងភូមិបត់ត្រង់ និងភូមិកំពង់បាស្រូវ ឃុំកោះថ្កូវនិង ឃុំជលសា ស្រុកជលគិរី ខេត្តកំពង់ឆ្នាំង។
ក្នុងប្រតិបត្តិការនេះ សមត្ថកិច្ចបានរឹបអូសនូវវត្ថុតាងបំផ្លាញ ដោយចោលនៅហ្នឹងកន្លែង រួមមាន ៖
១-របាំងស្បៃមុង០២ករណី ស្មើនឹង ២៤កន្លែង ប្រវែង៥៥០ម លូស្បៃមុង ចំនូន២៤គ្រឿង បង្គោល ចំនួន២៨០ដើម ត្រីចំរុះ ចំនួន ៧០គក្រ។
២-របាំងផ្ចិតព្រែក០១ករណី ស្មើនឹង០២ កន្លែង ប្រវែង៥០ម លបចំនូន០៤គ្រឿង បង្គោល ចំនួន ២០ដើម ចាក់លែងត្រីចំរុះ ចំនួន ៣០គក្រ ទៅក្នុងធម្មជាតិវិញ ។
ក្រោមការដឹកនាំនិងចង្អុលបង្ហាញរបស់លោក លី ឡា នាយខណ្ឌរដ្ឋបាលជលផលកំពង់ឆ្នាំង កម្លាំងមន្ត្រីជំនាញរបស់លោក សហការជាមួយគណៈបញ្ជាការឯកភាពរដ្ឋបាលខេត្ត ស្រុក បានបន្តចុះបង្ក្រាបសកម្មភាពបទល្មើសនេសាទ និងការប្រើឧបករណ៍នេសាទខុសច្បាប់ ក្នុងរដូវបិទនេសាទនេះ ជាបន្តបន្ទាប់ និងមិនបន្ធូរដៃឡើយ ៕
