កាលពីថ្ងៃអង្គារ ០៣ កើត ខែ ភទ្របទ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី០៥ ខែកញ្ញា ឆ្នាំ២០២៤ លោក លី ឡា នាយខណ្ឌរដ្ឋបាលជលផលកំពង់ឆ្នាំង សហការជាមួយគណៈបញ្ជាការឯកភាពរដ្ឋបាលស្រុកកំពង់លែង និងសហគមន៍នេសាទផ្លូវទូក បានចុះល្បាត និងបង្ក្រាបបានបទល្មើសនេសាទមួយចំនួន ។
ប្រតិបត្តិការនេះ ដឹកនាំដោយ លោក ប្រាក់ លាងហួរ អនុប្រធានមន្ទីរកសិកម្ម រួមទាំងកម្លាំងចូលរួម សរុប ៣៥នាក់ ប្រើប្រាស់មធ្យោបាយទូកបាឡា ០៧ គ្រឿង។
ក្រុមការងារបានចុះប្រតិបត្តិការ ចាប់ពីចំណុចផ្លូវដំរី ដល់តំបន់អភិរក្ស អតីតឡូតិ៍លេខ០១ ស្ថិតភូមិថ្នល់ឈើទាល និងភូមិស្លត ឃុំផ្លូវទូក ស្រុកកំពង់លែង ខេត្តកំពង់ឆ្នាំងប្រទះឃើញរបាំងសាច់អួន មានប្រវែង និងរបាំងស្បៃមុង ដែលខុសពីច្បាប់ស្តីពីជលផល ។ បន្ទាប់មក ក្រុមការងារបានឯកភាពគ្នាចុះកាត់តំរឹម រុះរើ និងបំផ្លាញចោលវត្ថុតាងនៅនឹងកន្លែង។
ជាលទ្ធផល ក្នុងប្រតិបត្តិនេះ ក្រុមការងារបង្ក្រាបបាននូវបទល្មើសមួយចំនួន មានដូចជា ៖
-រុះរើរបាំងសាច់អួនចំនួន០១ករណី ស្មើនឹងចំនួន៨កន្លែង ប្រវែង១២០០ម បង្គោល៧២០ ដើម លបលូ១៦មាត់ ត្រី ។
-រុះរើបំផ្លាញចោល របាំងស្បៃមុងចំនួន ០១ករណី ស្មើនឹង ៨កន្លែង ប្រវែង ៨០០ម បង្គោល៣០០ដើម
-លបលូ ៨ មាត់ និងចាក់លែងត្រីល្អិត ចំនួន៨៤០គីឡូក្រាមចូលក្នុងដែនធម្មជាតិវិញ ។
ខណ្ឌរដ្ឋបាលជលផលកំពង់ឆ្នាំងតែងចុះល្បាត ដើម្បីបង្ក្រាបរាល់សកម្មភាព បទល្មើសនេសាទនានាជាប់ជាប្រចាំ ដូចភ្លៀងរលឹម ដែលក្រុមខិលខូចតែងលួចឆ្មក់ធ្វើសកម្មភាព ៕
