(កំពង់ឆ្នាំង)៖ លោក ពេជ្រ កែវមុន្នី អភិបាលរងខេត្តកំពង់ឆ្នាំង នៅព្រឹកថ្ងៃទី១៦ ខែកុម្ភៈ ឆ្នាំ២០១៤នេះ បានទទួលបទបញ្ជាពីលោក ស៊ុន សុវណ្ណារិទ្ធិ អភិបាលខេត្ត ដឹកនាំក្រុមចម្រុះចុះពិនិត្យ និងធ្វើការរុះរើទីតាំងបទល្មើសនេសាទការដាក់សម្រាស់ជាលក្ខណៈ ទ្រង់ទ្រាយធំមួយកន្លែង ស្ថិតនៅចំណុចបឹងធំ ក្នុងភូមិកំពង់បាស្រូវ ឃុំជលសា ស្រុកជលគីរី។
បន្ទាប់ពីបានពិនិត្យជាក់ស្ដែងនូវការប្រើឧបករណ៍នេសាទខុសច្បាប់ដែលក្រុមជនល្មើស បានកាប់ដើមឈើព្រៃលិចទឹកយកមកដាក់ជាសម្រាស់ និងហ៊ុំព័ទ្ធសាច់អួនក្រឡាញឹក និងសាច់ស្បៃមុងហ៊ុំព័ទ្ធជុំវិញ ដែលមានទំហំប្រមាណ៣ហិកតា ជាប់នឹងឡូអភិរក្សពូជត្រីនៅចំណុចខាងលើនេះ លោកអភិបាលរងខេត្ត ក៏បានបញ្ជាឲ្យមន្ត្រីជំនាញរដ្ឋបាលជលផល និងសហគមន៍នេសាទធ្វើការរុះរើដោយដកបង្គោលរបាំង និងរើសម្រាស់យកមកគរដុតបំផ្លាញចោលនៅទីនោះតែម្តង។
តំណាងសហគមន៍ព្រែកឆ្តោ ដែលបានដឹកនាំកម្លាំងចុះរុះរើបង្គោលរបាំង និងសម្រាស់មែកឈើពីក្នុងទឹកយកមកគរដុតបំផ្លាញចោលនៅលើគោកនៅចំណុចបឹងធំ ក្នុងភូមិកំពង់បាស្រូវ ឃុំជលសា ស្រុកជលគីរី ខាងលើនេះ បានឲ្យដឹងថា សម្រាស់ទាំងអស់នេះបើប្រើកម្លាំងតែជាង១០នាក់ដូចថ្ងៃនេះ ត្រូវប្រើរយៈពេលយ៉ាងតិច៣ថ្ងៃទើបរួច ព្រោះមែកឈើខ្លះក៏មានបន្លាពិបាកក្នុងការអូសទាញ និងលើកដាក់លើទូកមួយជាន់ទៀតទើបរុញមកដល់លើគោកដើម្បីទម្លាក់គរដុតចោល។
លោក នួន រិទ្ធី នាយរងផ្នែករដ្ឋបាលជលផលស្ដីទីកំពង់ប្រាសាទ បានប្រាប់អ្នកសារព័ត៌មានថា បើតាមបទបញ្ជារបស់លោកអភិបាលរងខេត្ត ដែលបានអញ្ជើញចុះមកដល់ទីតាំងផ្ទាល់ លោកបានបញ្ជាយ៉ាងម៉ឹងម៉ាត់ ដោយត្រូវតែរើសម្រាស់ និងដកបង្គោលរបាំងទាំងអស់នេះ យកទៅគរដុតបំផ្លាញចោលនៅលើគោកឲ្យអស់ ជៀសវាងក្រុមជនរកស៊ីខុសច្បាប់ យកសម្រាស់មែកឈើទាំងនេះ ទៅទម្លាក់ចូលក្នុងទឹកដើម្បីចាប់ត្រីវិញ។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ប៉ុន្មានថ្ងៃមុននេះលោកបានបញ្ជាក់ប្រាប់ឲ្យដឹងថា ការធ្វើនេសាទដោយកាប់មែកឈើព្រៃលិចទឹក មកដាក់ធ្វើជាសម្រាស់ និងមានបោះរបាំងស្បៃមុងព័ទ្ធជុំវិញដោយមានបរិមាណទំហំធំ ហើយដាក់ជាប់នឹងឡូត៍អភិរក្សទៀតផងនោះ ច្បាប់មិនអនុញ្ញាតឲ្យឡើយ ករណីនេះលោកនឹងបញ្ជាឲ្យមន្ត្រីជំនាញចុះរុះរើបំផ្លាញចោលឲ្យអស់ ហើយវែកមុខរកជនល្មើសដែលពាក់ព័ន្ធក្នុងករណីនេះ ដើម្បីយកមកផ្ដន្ទាទោសទៅតាមច្បាប់ ដោយមិនលើកលែងឡើយ។
ដោយឡែកនៅព្រឹកថ្ងៃទី១៦ ខែកុម្ភៈ ឆ្នាំ២០២៤នេះផងដែរ លោកក៏បានចុះទៅដល់ទីតាំងបទល្មើសខាងលើនេះជាមួយនឹងលោក ពេជ្រ កែវមុន្នី អភិបាលរងខេត្តកំពង់ឆ្នាំង ដោយជាក់ស្ដែង ហើយលោកអភិបាលរង ក៏បានបញ្ជាឲ្យមន្ត្រីជំនាញ និងសហគមន៍នេសាទធ្វើការរុះរើឲ្យអស់ ដោយសម្រាស់មែកឈើត្រូវយកឡើងមកលើគោកដើម្បីគរដុតបំផ្លាញចោល រីឯសម្រាស់មួយចំនួនដែលនៅជាប់ឡូត៍អភិរក្ស ត្រូវដឹកយកទៅទម្លាក់នៅក្នុងឡូដើម្បីទុកជាជម្រកត្រី។
សូមបញ្ជាក់ថា ចំពោះបទល្មើសការកាប់មែកឈើព្រៃលិចទឹក យកមកដាក់ធ្វើជាសម្រាស់ និងយកស្បៃមុងមកហ៊ុំព័ទ្ធសម្រាស់ដើម្បីចាប់ត្រី ដែលមានទំហំរហូតទៅដល់រាប់ហិកតា ហើយត្រូវបានគេដាក់ជាប់នឹងឡូត៍អភិរក្សពូជត្រី ស្ថិតនៅចំណុចបឹងធំ ក្នុងភូមិកំពង់បាស្រូវ ឃុំជលសា ស្រុកជលគីរី ខេត្តកំពង់ឆ្នាំង ត្រូវបានកម្លាំងជំនាញរដ្ឋបាលជលផលចុះរុះរើកាលពីថ្ងៃទី១២ ខែកុម្ភៈ ឆ្នាំ២០២៤កន្លងទៅម្ដងរួចមកហើយនោះ។
លុះនៅព្រឹកថ្ងៃទី១៣ ខែកុម្ភៈឧបករណ៍ល្មើសច្បាប់ខាងលើនេះ ត្រូវបានក្រុមជនខិលខូចដែលជាម្ចាស់សម្រាស់ បានលាតរបាំងស្បៃមុង និងរើសម្រាស់ដើម្បីបម្រុងចាប់ត្រីជាធម្មតាឡើងវិញផងដែរ។ តែត្រូវប្រជាពលរដ្ឋក្នុងមូលដ្ឋានរាយការណ៍ជូនថ្នាក់ដឹកនាំ ទើបមានបទបញ្ជាពីលោកអភិបាលខេត្ត ដែលបានបញ្ជាដោយផ្ទាល់មកលោកអភិបាលរងខេត្ត ពេជ្រ កែវមុន្នី ឲ្យដឹកនាំក្រុមចម្រុះចុះរុះរើបង្គោលរបាំង និងសម្រាស់មែកឈើយកមកដុតបំផ្លាញចោលឲ្យអស់ដោយមិនឲ្យសេះសល់នោះឡើយ៕
