ក្រុម RARA (RCAF ADFA and RMC-D Alumni) គឺជាក្រុមអតីតសិក្ខាកាមនាយទាហានកងយោធពលខេមរភូមិន្ទ ដែលបានបញ្ចប់ការសិក្សានៅបណ្ឌិត្យសភាយោធាអូស្ត្រាលី និងមហាវិទ្យាល័យភូមិន្ទយោធាអូស្ត្រាលី-ដាន់ឌ្រូន ដែលមានលោកវរសេនីយ៍ឯក សៀ ទីន នាយសេនាធិការ កងរាជអាវុធហត្ថរាជធានីភ្នំពេញ ជាប្រធានក្រុម បានបង្កើតឡើងនៅថ្ងៃទី ១១ ខែមករា ឆ្នាំ២០២៣ ក្រោមការផ្តួចផ្តើមដោយនាយទាហានរបស់កងយោធពលខេមរភូមិន្ទចំនួន ០៧នាក់ ដែលជាអតីតសិក្ខាកាមបានបញ្ចប់ការសិក្សាពីឆ្នាំ ២០០៩ រហូតដល់ឆ្នាំ ២០២២ ក្នុងនោះរួមមាន៖ លោក សៀ ទីន, លោក ផន ឫទ្ធីសក្កិ, លោក ឈន បូរី, លោក សួន វិទូ, លោក ប៊ុន ចាន់វិចិត, លោក ផន ដាវីដ និង លោក ចន្ថា សុធារិទ្ធិ។ មកដល់បច្ចុប្បន្នក្រុមនេះ មានសមាជិកចំនួន ១២នាក់។
នៅថ្ងៃអង្គារ ទី១៦ ខែមករា ឆ្នាំ២០២៤ ក្រុម RARA បានប្រារព្ធពិធីជួបជុំលៀងសាយភោជន៍ ដើម្បីអបអរសាទរខួប ១ឆ្នាំ នៃការបង្កើតក្រុមខ្លួន ក្រោមអធិបតីភាព ឯកឧត្តម ឧត្តមសេនីយ៍ឯក សួន សំណាង អគ្គនាយករង អគ្គនាយកដ្ឋាននយោបាយ និងកិច្ចការបរទេស នៃក្រសួងការពារជាតិ រួមនឹងគណៈធិបតីអញ្ជើញចូលរួមជាច្រើនរូបផ្សេងទៀត។
ថ្លែងក្នុងពិធីលាងសាយភោជន៍នោះផងដែរ លោកវរសេនីយ៍ឯក សៀ ទីន បានលើកឡើងថា ការបង្កើតក្រុម RARA នេះឡើង គឺក្នុងគោលបំណងដើម្បីផ្សាភ្ជាប់ទំនាក់ទំនងឱ្យកាន់តែជិតស្និទ្ធ រវាងអតីតសិក្ខាកាមដែលបានបញ្ឈប់ការសិក្សានៅបណ្ឌិតសភាយោធាអូស្រាលី និងមហាវិទ្យាល័យយោធាអូស្ត្រាលី ដាន់ឌ្រូន ក្រោមចក្ខុវិស័យ បង្កើតក្រុមអ្នកដឹកនាំដែលគួរឱ្យគោរព មានការប្រាស្រ័យទាក់ទងល្អ និងមានភាពផ្សាភ្ជាប់គ្នារវាងក្រុមអតីតសិក្ខាកាមយោធាទាំងឡាយដែលបញ្ចប់ ការសិក្សាពីក្រៅប្រទេស។
បន្ថែមពីនេះទៀតក្រុម RARA ក៏បានដាក់ចេញនូវគុណតម្លៃរបស់ខ្លួនមួយចំនួន ដូចជា៖
– កិត្តិយស៖ ជឿជាក់លើសច្ចធម៌ និងធ្វើអ្វីដែលត្រឹមត្រូវសំរាប់ខ្លួនឯង និងអ្នកជុំវិញខ្លួន។
– ការគោរព៖ មានការគោរពចំពោះអ្នកដទៃ ដូចទៅនឹងអ្វីដែលយើងចង់ទទួលបានពីគេ។ ត្រូវមាន ការគិតពិចារណា គោរពគំនិតនិងយោបល់អ្នកដទៃ។
– អាជីពភាវូបនីយកម្ម៖ អនុវត្តខ្លួនប្រកបដោយការទទួលខុសត្រូវ សុចរិតភាព គណនេយ្យភាព និង ឧត្តមភាព។
– មិត្តភាព៖ ត្រូវតស៊ូជាមួយគ្នា និងជួយគ្នាទៅវិញទៅមក មិនថាស្ថានភាពលំបាកយ៉ាងណា។
– វីរិយភាព៖ ការខិតខំប្រឹងប្រែងឥតឈប់ឈរ និងម៉ឹងម៉ាត់ ដើម្បីសម្រេចនូវអ្វីដែលកំពុងអនុវត្ត។
– សោមនស្ស៖ ខិតខំធ្វើការ និងបំពេញភារកិច្ចរៀងៗខ្លួន ប៉ុន្ដែមិនត្រូវភ្លេចការកំសាន្តសប្បាយ រីករាយម្តងម្កាលឡើយ។
គុណតំលៃខាងលើនេះ គឺជាកត្តាដែល កំណត់អត្តសញ្ញាណរបស់ក្រុម RARA ជាក្រុមអតីតសិក្ខាកាមដែលផ្ដោតសំខាន់លើអាជីពភាវូបនីយកម្មយោធាទៅតាមសម័យកាល និងមានបាវចនា គឺ “ឈានទៅមុខជានិច្ច”។
យោងទៅតាមចក្ខុវិស័យ និងគុណតំលៃខាងលើ ក្រុមRARA ក៏បានបង្កើតគោលដៅចំនួន ០៤ ធំៗគឺ៖
ទី១៖ ជំរុញការលើកកម្ពស់អាជីពភាវូបនីយកម្មយោធា និង មោទនៈភាពទៅលើក្រុមរបស់ខ្លួន។
ទី២៖ ធ្វើជាគំរូដល់មជ្ឍដ្ឋានជុំវិញ និងលើកកម្ពស់គំនិតឆ្នៃប្រឌិត
ទី៣៖ ចូលរួមចំណែកក្នុងកិច្ចការនានារបស់សង្គម និង អង្គភាពដែលពាក់ព័ន្ធ
ទី៤៖ ជំរុញក្នុងការងារណែនាំ និងអភិវឌ្ឍអាជីពភាវូបនីយកម្មរបស់សមាជិកក្រុម។
ជាចុងក្រោយ ក្នុងនាមនាយទាហានរបស់កងយោធពលខេមរភូមិន្ទ ក្រុមRARAទាំងមូល ប្តេជ្ញានឹងយកចំណេះជំនាញ ដែលខ្លួនបានសិក្សានៅសាលាបណ្ឌិត្យសភាយោធាអូស្ត្រាលី និងមហាវិទ្យាល័យភូមិន្ទយោធាអូស្ត្រាលី-ដាន់ឌ្រូន មកប្រើជាប្រយោជន៍ ក្នុងការចូលរួមបម្រើ ជាតិ សាសនា ព្រះមហាក្សត្រ និងត្រៀមខ្លួនជានិច្ចក្នុងការបំពេញភារកិច្ចលើវិស័យយោធា ប្រកបដោយស្មារតី លះបង់ និងស្មោះត្រង់ ជារៀងដរាប៕
