អ្នកជំនាញថា៖ថាមពលសូឡា ថាមពលកកើតឡើងវិញពីពន្លឺព្រះអាទិត្យ ជួយកាត់បន្ថយថ្លៃចំណាយ ជំរុញទិន្នផលក្នុងវិស័យកសិកម្ម

ភ្នំពេញ៖ការប្រើប្រាស់ថាមពលកកើតឡើងវិញពីពន្លឺព្រះអាទិត្យ បាននិងកំពុងជួយរូមចំណែកកាត់បន្ថយការចំណាយ សម្រួល ដល់កសិករ ក្នុងការប្រើប្រាស់ស្រោចស្រពដំណាំផ្សេងៗ ជាពិសេសនៅតំបន់មិនទាន់មានអគ្គិសនីប្រើប្រាស់។

លោក ទី ប៊ុនលី ប្រធានបច្ចេកទេសនៃក្រុមហ៊ុនសសូជី បានឱ្យដឹងថា បច្ចុប្បន្នលោកបានផលិតជើងរេស្វ័យប្រវត្តិ ដែលអាចធ្វើឱ្យការប្រើប្រាស់ប្រព័ន្ធសូឡាក្នុងវិស័យកសិកម្មកាន់តែមានប្រសិទ្ធភាព និងអាចធានាគុណភាព ជូនអ្នក ប្រើប្រាស់បានកាន់តែយូជាងមុន ពោលគឺអាចធានាបានរហូតដល់រយៈពេល ៤ ឆ្នាំ។

បើតាមលោក ប៊ុនលី ចំពោះឧបករណ៍សម្រាប់ប្រើប្រាស់ក្នុងប្រព័ន្ធសូឡា មានដូចជា ឧបករណ៍ត្រួតពិនិត្យភ្លើង (charge controller) ឧបករណ៍លំនឹងវ៉ុលអាគុយ (battery balancer) ជើងរេស្វ័យប្រវត្តិ(sun tracker) ។ ដោយឡែកសម្រាប់អត្ថប្រយោជន៍នៃការប្រើប្រាស់ប្រព័ន្ធសូឡា ជួយកាត់បន្ថយការចំណាយលើការស្រោចស្រព ឬកាត់ បន្ថយការចំណាយលើការប្រើប្រាស់ភ្លើងអគ្គិសនី ងាយស្រួលក្នុងការប្រើប្រាស់ និងជួយបង្កើនទិន្នផលកសិកម្ម។

លើសពីនេះទៀត ក្រុមហ៊ុនបានវិនិយោគលើស្ថានីយបូមទឹកជាច្រើនកន្លែង ដើម្បីផ្គត់ផ្គង់ទឹកដល់កសិករ ដែលត្រូវការ ទឹកសម្រាប់ផ្គត់ផ្គង់លើដំណាំស្រូវ បន្លែ ដោយកសិករគ្រាន់តែចំណាយទៅលើថ្លៃសេវាកម្មទឹកតែប៉ុណ្ណោះ។

លោក ប៊ុនលី បានគូសបញ្ជាក់ថា ការបង្កើតក្រុមហ៊ុននេះ ដើម្បីផលិត និងផ្គត់ផ្គង់សម្រាប់ទីផ្សារក្នុងស្រុក កាត់បន្ថយ ការនាំចេញផលិតផលដែលគ្មានគុណភាពសម្រាប់បម្រើដល់វិស័យកសិកម្មកម្ពុជា៕