បាត់ដំបង៖ស្របពេលអាកាសធាតុប្រែប្រូល ធ្លាក់ខ្យល់ចុះត្រជាក់បន្តិច គេសង្កេតឃើញថា រយៈពេលជិតមួយសប្ដាហ៍កន្លងមកនេះ ស្ថានភាពត្រីក្នុងដងស្ទឹងសង្កែ ហាក់មានសន្ទុះចុះខ្លាំង នាំឲ្យមានបទល្មើសនេសាទ (អ៊ុយ) យ៉ាងច្រើនស្អែកស្កះ បានកើតមានឡើងពាសពេញតាមដងស្ទឹងសង្កែ នៅប៉ែកខាងក្រោម «ទំនប់ស្គាក់ទឹកសាលាតាអន» ស្ថិតក្នុងស្រុកឯកភ្នំ ដោយគេមិនឃើញមន្ត្រីជំនាញ ឬ អាជ្ញាធរមានវិធានការចុះទប់ស្កាត់ឡើយ។
ស្ថានភាពត្រីនៅតាមសងស្ទឹងសង្កែ ជិតមួយសប្ដាហ៏កន្លងមកនេះមានសន្ទុះចុះខ្លាំង ហើយគេ ក៏ចាប់ផ្ដើមប្រទះឃើញ បទល្មើសនេសាទ ស្រាប់តែកើតឡើងយ៉ាងព្រោងព្រាតពាសពេញដងស្ទឹងផងដែរ នៅប៉ែកខាងក្រោម «ទំនប់ស្គាក់ទឹកសាលាតាអន»។
តាមប្រភពបានឲ្យដឹងថា បទល្មើសនេសាទដែលកំពុងកើតឡើងស្អេកស្កះពេញស្ទឹងនៅពេលនេះ ភាគច្រើន «អ៊ុយ» ដាក់យកត្រីល្អិតៗ និងការប្រើសំណាញ់ហ៊ុមព័ទ្ធសំរាស់ឈើយកត្រី។
តាមការសួរនាំ និងសង្កេតមើលជាក់ស្ដែង អ្នកប្រព្រឹត្តបទល្មើសនេសាទទាំងនេះ ភាគច្រើនមិនមែនពលរដ្ឋនៅក្នុងមូលដ្ឋានទេ គឺ ពួកគេមកពីភូមិ-ឃុំ-ស្រុកផ្សេងៗគ្នា។
តាមប្រភពព័ត៌មានបានប្រាប់ថា ត្រីដែលជាប់ក្នុង «អ៊ុយ» សុទ្ធតែជាប្រភេទកូនត្រីតូចៗ ដែលគេប្រមូលបានរាប់រយគីឡូក្រាម សម្រាប់ «អ៊ុយ» មួយកន្លែង ក្នុងមួយថ្ងៃ។ ចំណែកក្រុមអ្នកនេសាទត្រីនៅទីនោះ ហាក់ព្យាយាមលាក់លៀមក្នុងការផ្ដល់ចម្លើយនៅពេលសួរនាំ។ ដោយពួកគេបានប្រាប់ដោយស្ទាក់ស្ទើរថា «ពួកគេមិនមែនជាអ្នកភូមិនៅទីនោះទេ។
ប្រជាពលរដ្ឋខ្លះពួកគាត់បានដាក់ «អ៊ុយ» ចាប់ត្រីផង រាយមងផង និងបង់សំណាញ់ផង ព្រោះពេលនេះ ត្រីចុះខ្លាំងប្រហែលជិតមួយសប្ដាហ៍មកហើយ»។ នៅពេលសួរនាំថា «ការប្រើប្រាស់ឧបករណ៍ «អ៊ុយ» ដាក់ព្រោងព្រាតពេញដងស្ទឹងបែបនេះ តើមានអាជ្ញាធរ ឬមន្ត្រីជលផលចុះសួរនាំ ឬក៏ហាមឃាត់ ឬ មួយយកលុយខ្លះដែរទេ?»។ ពេលនោះពួកគេហាក់រារែកបន្តិច តែបានបង្ហើបថា «មានគេចុះមកសួរនាំដែរ។ ហើយមានអ្នកខ្លះក៏បង់លុយ តែអ្នកខ្លះទៀតដាក់មងបង់សំណាញ់តិចតួចមិនបានឲ្យទេ»។
ប្រជាពលរដ្ឋ ក៏ដូចជាមន្ត្រីមូលដ្ឋាន បានលើកឡើងថា អាជ្ញាធរក្ដី មន្ត្រីជលផលក្ដី គួរតែមានចំណាត់ការខ្លះចំពោះអ្នកបង្កើតបទល្មើសនេសាទខាងលើនេះ ជាពិសេសការប្រើប្រាស «អ៊ុយ» ធំៗ ដាក់ពង្រាយពាសពេញស្ទឹងសង្កែ។
ប្រជាពលរដ្ឋ ពួកគេនិយាយថា គ្រាន់តែ «អ៊ុយ» មួយកន្លែង ក្នុងមួយថ្ងៃ ចាប់យកកូនត្រីគ្រប់ប្រភេទរាប់រយគីឡូក្រាម។ ចុះទម្រាំ «អ៊ុយ» រាប់សិបកន្លែងបែបនេះ តើត្រូវចាប់យកកូនត្រីប៉ុន្មានតោនក្នុងមួយថ្ងៃ? ដូច្នេះអាជ្ញាធរ ឬមន្ត្រីជំនាញ គួរណាមានសកម្មភាពទប់ស្កាត់ខ្លះផង បើយល់ថា ការប្រើប្រាសឧបករណ៍ប្រភេទ «អ៊ុយ» នេះ ជាឧបករណ៍នេសាទខុសច្បាប់ មិនគួរសម្ងំស្ងៀមឈឹងបែបនេះទេ។
ករណីខាងលើនេះ នៅរសៀលថ្ងៃទី ២៧ ខែវិច្ឆិកា ឆ្នាំ២០២៣ អង្គភាពគេហទំព័រ «ស៊ី អេច ខេ ញូវ | CHK News» មិនអាចទំនាក់ទំនង សុំការបំភ្លឺពីលោក ជួង សុភា នាយខណ្ឌរដ្ឋបាលជលផលខេត្តបាត់ដំបង បាននោះទេ ជុំវិញរឿងបទល្មើសនេសាទ នៅតាមដងស្ទឹងសង្កែនេះ៕
