ភ្នំពេញ៖ រដ្ឋមន្រ្តីក្រសួងធនធានទឹក និងឧតុនិយម នៅព្រឹកថ្ងៃទី ២៤ ខែវិច្ឆិកា ឆ្នាំ២០២៣ បានជួបពិភាក្សាការងារ ជាមួយរដ្ឋមន្រ្តីក្រសួងធនធានធម្មជាតិ និងបរិស្ថានឡាវ ។
ក្រុងសៀមរាប៖ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា នៃព្រះរាជាណាចក្រកម្ពុជា ថ្ងៃសុក្រ ១២កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៤ ខែវិច្ឆិកា ឆ្នាំ២០២៣ បានអញ្ជើញជួបពិភាក្សាទ្វេភាគីជាមួយលោកជំទាវ ប៊ូនខាំ វរៈជិត រដ្ឋមន្រ្តីក្រសួង ធនធានធម្មជាតិ និងបរិស្ថានឡាវ ដោយមានការចូលរួមពីឯកឧត្តម លោកជំទាវ ដែលជាថ្នាក់ដឹកនាំជាន់ខ្ពស់នៃភាគីទាំងពីរ រួមជាមួយមន្ត្រីជំនាញពាក់ព័ន្ធផងដែរ។
ជាកិច្ចស្វាគមន៍ ឯកឧត្តមរដ្ឋមន្ត្រី បានសម្តែងនូវសេចក្តីសោមនស្សរីករាយ និងថ្លែងអំណរគុណជូនចំពោះលោកជំទាវ និងគណៈប្រតិភូក្រសួងធនធានធម្មជាតិ និងបរិស្ថានឡាវ ដែលបានអញ្ជើញមកចូលរួមក្នុងកិច្ចប្រជុំក្រុមប្រឹក្សាគណៈកម្មការទន្លេមេគង្គ លើកទី៣០ និងកិច្ចប្រជុំពិគ្រោះយោបល់ជាមួយប្រទេសដៃគូអភិវឌ្ឍន៍លើកទី២៨ នៅកម្ពុជា។ ឯកឧត្តមរដ្ឋមន្ត្រីបានវាយតម្លៃខ្ពស់ចំពោះការគាំទ្រ និងកិច្ចសហប្រតិបត្តិការយ៉ាងពេញលេញរបស់ភាគីឡាវ ក្នុងអាណត្តិកម្ពុជាធ្វើជាប្រធានក្រុមប្រឹក្សាគណៈកម្មការទន្លេមេគង្គក្នុងឆ្នាំ២០២៣នេះ ដោយសម្រេចបានជោគជ័យ និងនាំមកនូវសមិទ្ធផលធំៗ បន្ថែមទៀតសម្រាប់គណៈកម្មការទន្លេមេគង្គ។
ថ្លែងក្នុងឱកាសនោះ ឯកឧត្តមរដ្ឋមន្ត្រីបានលើកឡើងថា ឡាវ និងកម្ពុជា ជាបងប្អូន និងជាប្រទេសជិតខាងល្អនឹងគ្នាតាំងពីយូរមកហើយ។ ប្រទេសទាំងពីរ ស្ថិតក្នុងអាងទន្លេមេគង្គរួមគ្នា ដោយធ្វើការរួមគ្នា និងធ្វើកិច្ចសហការជាមួយប្រទេសផ្សេងទៀតនៅតាមដងទន្លេ ក្នុងក្របខណ្ឌគណៈកម្មការទន្លេមេគង្គ ដើម្បីអភិវឌ្ឍប្រកបដោយចីរភាព ក្នុងតំបន់មេគង្គ។ ជាមួយគ្នានោះ ឯកឧត្តមរដ្ឋមន្ត្រីក៏បានលើកឡើងផងដែរ ពីបញ្ហាប្រឈមដែលបាននិងកំពុងតែកើតមានឡើងនៅក្នុងអាងទន្លេមេគង្គ ដូចជា កំណើនប្រជាជន កំណើននៃការអភិវឌ្ឍ កំណើននៃតម្រូវការទឹក ស្បៀង និងថាមពល និងការប្រែប្រួលអាកាសធាតុ ដែលទាមទារឱ្យប្រទេសជាសមាជិកបង្កើនកិច្ចខិតខំប្រឹងប្រែងរួមគ្នា និងកិច្ចសហប្រតិបត្តិការល្អ ថែមទៀត។
ឯកឧត្តមរដ្ឋមន្ត្រី បានថ្លែងនូវការសាទរចំពោះភាគីឡាវដែលបានរៀបចំកិច្ចប្រជុំកំពូលគណៈកម្មការទន្លេមេគង្គលើកទី៤ បានដោយជោគជ័យ កាលពីខែមេសា ឆ្នាំ២០២៣ កន្លងទៅនេះ និងបានចេញសេចក្តីថ្លែងការណ៍ក្រុងវៀងចន្ទ ដោយបានដាក់ចេញនូវទិសដៅជាយុទ្ធសាស្ត្រសម្រាប់បណ្តាប្រទេសក្នុងអាងរួមគ្នាដោះស្រាយបញ្ហាប្រឈមដែលទន្លេមេគង្គជួបប្រទះ និងរួមគ្នាធ្វើឱ្យអាងទន្លេមេគង្គមានសន្តិសុខទឹក និងមានចីរភាព ព្រមទាំងផ្តល់ផលប្រយោជន៍ជានិរន្តរ៍សម្រាប់បណ្តាប្រទេស និងប្រជាជនក្នុងអាងទន្លេ រួមទាំងប្រទេសឡាវ និងកម្ពុជា។
ក្នុងជំនួបនេះដែរ ឯកឧត្តមរដ្ឋមន្ត្រីបានបញ្ជាក់ពីជំហររបស់កម្ពុជា ដើម្បីបន្តធ្វើការជាមួយប្រទេសឡាវ និងប្រទេសជាសមាជិកគណៈកម្មការទន្លេមេគង្គផ្សេងទៀតក្នុងក្របខណ្ឌទន្លេមេគង្គតែមួយ ស្មារតីមេគង្គតែមួយ ដើម្បីធានានូវការអនុវត្តប្រកបដោយប្រសិទ្ធភាពនៃសេចក្តីថ្លែងការណ៍ក្រុងវៀងចន្ទ និងយុទ្ធសាស្រ្តអភិវឌ្ឍន៍អាងឆ្នាំ២០២១-២០៣០ របស់គណៈកម្មការទន្លេមេគង្គ ឆ្ពោះទៅសម្រេចបាននូវលទ្ធផលដែលជាបំណងប្រាថ្នារួមគ្នា។
ជំនួបពិភាក្សាទ្វេភាគីបានប្រព្រឹត្តទៅក្រោមបរិយាកាសរីករាយ ស្និទ្ធស្នាល មិត្តភាព និងមេត្រីភាព ដោយភាគីទាំងពីរបានបង្ហាញនូវសុឆន្ទៈ ដើម្បីជំរុញគម្រោងសហប្រតិបត្តិការនានា ក្នុងក្របខណ្ឌគណៈកម្មការទន្លេមេគង្គឱ្យចេញជារូបរាង និងសម្រេចបានលទ្ធផល ជាមួយការប្តេជ្ញាពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ កម្ពុជា ឡាវ ជាពិសេសរវាងក្រសួង និងក្រសួងឱ្យកាន់តែរឹងមាំ និងរីកចម្រើនថែមទៀត៕
