អាជ្ញាធរខេត្តបន្ទាយមានជ័យ នឹងចូលរួមទទួលស្វាគមន៍ នាយករដ្ឋមន្រ្តីថៃ ដែលនឹងបំពេញទស្សនកិច្ច ជម្រុញសេដ្ឋកិច្ចនៅព្រំដែនអន្តរជាតិ ខ្លងលឹក-ប៉ោយប៉ែត

បន្ទាយមានជ័យ៖មន្ត្រីរដ្ឋបាលខេត្តបន្ទាយមានជ័យ បានប្រាប់ក្រុមអ្នកកាសែតនៅថ្ងៃទី ២៤ ខែវិច្ឆិកា ឆ្នាំ២០២៣ លោក អ៊ុំ រាត្រី អភិបាល ខេត្តបន្ទាយមានជ័យ និងមន្ត្រីពាក់ព័ន្ធ នឹងចូលរួមទទួលស្វាគមន៍ លោក សេ្រតដ្ឋា ថាវីស៊ីន (HE Srettha Thavisin) នាយករដ្ឋមន្រ្ត​និងជារដ្ឋមន្ត្រីក្រសួងហិរញ្ញ វត្ថុថៃ ដែលនឹងបំពេញទស្សនកិច្ច ជម្រុញសេដ្ឋកិច្ច ពាណិជ្ជកម្ម វិនិយោគ នៅព្រំដែន អន្តរជាតិ ខ្លងលឹក-ប៉ោយប៉ែត នាថ្ងៃទី ២៥ ខែវិច្ឆិកា ឆ្នាំ២០២៣ ស្អែកនេះ ។

បើតាមមន្ត្រីរដ្ឋបាលខេត្តបន្ទាយមានជ័យ បានបញ្ជាក់ថា លោក អ៊ុំ រាត្រី អភិបាលខេត្ត បន្ទាយមានជ័យ និងមន្ត្រីពាក់ព័ន្ធ នឹងអញ្ជើញទៅចូលរួមកម្មវិធីទទួលស្វាគមន៍ លោកនាយករដ្ឋមន្ត្រីថៃនេះ គឺ ជាការឆ្លើយតបតាមការអញ្ជើញជាផ្លូវការរបស់ លោក បរិនញ្ញា ពោធិសាត អភិបាលខេត្តស្រះកែវ ប្រទេសថៃ នាពេលថ្មីៗនេះ ។

សូមបញ្ជាក់ថា លោក សេ្រតដ្ឋា ថាវីស៊ីន (HE Srettha Thavisin) នាយករដ្ឋ មន្រ្តី-រដ្ឋមន្ត្រីក្រសួងហិរញ្ញវត្ថុ នៃព្រះរាជាណាចក្រថៃ និងប្រតិភូ នឹងមកបំពេញទស្សនកិច្ច ជម្រុញការអភិវឌ្ឍន៍សេដ្ឋកិច្ច ពាណិជ្ជកម្ម វិនិយោគ នៅច្រកព្រំដែនថៃ កម្ពុជា និងតំបន់សេដ្ឋកិច្ចពិសេសសំខាន់ៗ ក្នុងភូមិសាស្ត្រខេត្តស្រះកែវ ប្រទេសថៃ ដែលទល់មុខខេត្តបន្ទាយមានជ័យ នាថ្ងៃទី ២៥ ខែវិច្ឆិកា ឆ្នាំ២០២៣ ស្អែកនេះ ៕