កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម បានថ្លែងថា សំណង់អគាររដ្ឋបាលថ្មី របស់សាលាខេត្តនេះ បានដំណើរការសាងសង់សម្រេចបានចំនួន ៧០ ភាគរយ គឺនឹងអាចស្ថាបនា ហើយរួចរាល់ ១០០ ភាគរយ នៅក្នុងរង្វង់ខែមេសា ឆ្នាំ២០២៤ ខាងមុខនេះ។
លោកអភិបាលខេត្តកំពង់ចាម បានថ្លែងឱ្យដឹងបែបនេះ នៅក្នុងពេលលោក បានដឹកនាំក្រុមការងារបច្ចេកទេស អញ្ជើញចុះ ពិនិត្យវឌ្ឍនភាព ការដំណើរការសាងសង់អគាររដ្ឋបាលថ្មី នៃរដ្ឋបាលសាលាខេត្តកំពង់ចាម នៅព្រឹកថ្ងៃទី ៧ វិច្ឆិកា នេះ។
លោក ប្រាក់ ទិត្យ នាយកទីចាត់ការផែនការ វិនិយោគសាលាខេត្តកំពង់ចាម ដែលបានអមដំណើរលោក អ៊ុន ចាន់ដា ជាអភិបាលខេត្ត ចុះពិនិត្យវឌ្ឍនភាពការស្ថាបនាអគារ ខាងលើ បានឱ្យដឹងថា សំណង់អគាររដ្ឋបាលថ្មី របស់សាលា ខេត្តកំពង់ចាម ដែលនៅសល់ចំនួន ៣០ ភាគរយទៀតនេះ មានទទឹង ២៤ ម៉ែត្រ បណ្តោយ ៥៣,២៥ ម៉ែត្រ កម្ពស់ បី ជាន់ និងមានចំនួន ៣.៥០០ ម៉ែត្រការ៉េ។
លោកបានបន្តថា អគារមួយខ្នងនេះ បានចាប់ផ្តើមសាងសង់ តាំងពីឆ្នាំ ២០១៦ ទៅជំហានឆ្នាំនីមួយៗ ហើយការងារដែល នៅសល់នោះ ជាការងារតូចតាចទេ ប៉ុន្តែជាការរចនាក្បូរក្បាច់ច្រើន មិនអាចធ្វើលឿនបាន នៅតាមបន្ទប់ ឬកន្លែងសំខាន់ៗ នៃអគារ៕
