ភ្នំពេញ ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានគូសបញ្ជាក់ថា វិស័យធនធានទឹក នៅព្រះរាជាណាចក្រកម្ពុជាបាននិងកំពុងអភិវឌ្ឍនៅលើផ្លូវ នៃការធ្វើកំណែទម្រង់ក្នុងគោលដៅប្រែក្លាយវិស័យនេះឲ្យកាន់តែមានគុណភាព និងប្រសិទ្ធភាពគ្រប់ជ្រុងជ្រោយ ក្នុងការលើកស្ទួយជីវភាពរស់នៅរបស់កសិករប្រកប ដោយចីរភាព ។
ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងក្នុងពិធីបើកសិក្ខាសាលា ពិគ្រោះយោបល់ថ្នាក់ជាតិ លើសេចក្តីព្រាងគោលការណ៍ ណែនាំគំរូ លក្ខន្តិកៈ និងបទបញ្ជាផ្ទៃក្នុងសហគមន៍កសិករប្រើប្រាស់ទឹក (ស.ក.ប.ទ.) សេចក្តីព្រាងប្រកាស ស្តីពីការរំលាយចោល ស.ក.ប.ទ. និងនីតិវិធី នៃការដោះស្រាយវិវាទក្នុងក្របខណ្ឌ ស.ក.ប.ទ. នាព្រឹកថ្ងៃទី៦ ខែវិចិ្ឆកាឆ្នាំ២០២៣ នៅសណ្ឋាគារភ្នំពេញ ។
ឯកឧត្តមរដ្ឋមន្ត្រី បានលើកឡើងថា អនុក្រឹត្យរបស់សហគមន៍កសិករប្រើប្រាស់ទឹក (ស.ក.ប.ទ.) ត្រូវបានប្រកាសឱ្យប្រើកាលពីខែមីនា ឆ្នាំ២០១៥ ដើម្បីឱ្យអនុក្រឹត្យនេះ អនុវត្តទៅបានពេញលេញប្រកបដោយប្រសិទ្ធភាព តម្រូវឱ្យមានគោលការណ៍ណែនាំ និងប្រកាសចំនួនប្រាំទៀត ដូចជា ៖
ទី១ គោលការណ៍ណែនាំ គំរូលក្ខន្តិកៈ និងបទបញ្ជាផ្ទៃក្នុង ស.ក.ប.ទ.
ទី២ ប្រកាស ស្តីពី ការរំលាយចោល ស.ក.ប.ទ.
ទី៣ ប្រកាស ស្តីពី នីតិវិធី នៃការដោះស្រាយវិវាទក្នុងក្របខ័ណ្ឌ ស.ក.ប.ទ.
ទី៤ ប្រកាស ស្តីពី នីតិវិធីសម្រាប់ការបោះឆ្នោតជ្រើសតាំងគណៈកម្មាធិការ ប្រធាន និងអនុប្រធានក្រុមកសិករប្រើប្រាស់ទឹក
ទី៥ កិច្ចព្រមព្រៀងស្តីពីការបែងចែកការទទួលខុសត្រូវ និងការគ្រប់គ្រងប្រព័ន្ធធារាសាស្ត្រ ។
ឯកឧត្តមរដ្ឋមន្ត្រី ក៏បានគូសបញ្ជាក់ថា ៖ «វិស័យធនធានទឹកនៅព្រះរាជាណាចក្រកម្ពុជា បាននិងកំពុងអភិវឌ្ឍនៅលើផ្លូវ នៃការធ្វើកំណែទម្រង់ ក្នុងគោលដៅប្រែក្លាយវិស័យនេះ ឲ្យកាន់តែមានគុណភាព និងប្រសិទ្ធភាពគ្រប់ជ្រុងជ្រោយ ក្នុងការលើកស្ទួយជីវភាពរស់នៅរបស់កសិករប្រកបដោយចីរភាព» ។
ជាមួយគ្នានេះ ក្រសួងធនធានទឹក និងឧតុនិយម តាមរយៈនាយកដ្ឋាន ស.ក.ប.ទ. ដែលជាសេនាធិការរបស់ខ្លួនមានតួនាទីសំខាន់ លើការកំណត់គោលនយោបាយ និងយុទ្ធសាស្ត្រអភិវឌ្ឍ បន្តលើប្រព័ន្ធធារាសាស្ត្ររបស់ ស.ក.ប.ទ. ឱ្យមាននិរន្តភាព ស្របតាមកម្មវិធីនយោបាយរបស់រាជរដ្ឋាភិបាល ។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានស្នើដល់អង្គសិក្ខាសាលាឱ្យយកចិត្តទុកដាក់ស្តាប់ នូវបទបង្ហាញចែករំលែកបទពិសោធន៍នានា ព្រមទាំងចូលរួមផ្លាស់ប្តូរមតិយោបល់ បទពិសោធន៍ នៅក្នុងការគ្រប់គ្រងបញ្ហាប្រឈមក៏ដូចជាដំណោះស្រាយនានា ដើម្បីឱ្យសិក្ខាសាលានាពេលនេះ ទទួលបានជោគជ័យ ក្លាយជាគំរូសម្រាប់ការកែលម្អ និងបង្កើនប្រសិទ្ធភាព ក្នុងការគ្រប់គ្រង និងរួមចំណែកក្នុងការអភិវឌ្ឍសហគមន៍កសិករប្រើប្រាស់ទឹកនៅកម្ពុជា ។
ឯកឧត្តមរដ្ឋមន្ត្រី បានថ្លែង នូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់អនុក្រុមការងារបច្ចេកទេសគ្រប់គ្រងប្រព័ន្ធធារាសាស្ត្រ និងនាយកដ្ឋាន ស.ក.ប.ទ. ដែលបានសហការជាមួយក្រុមទីប្រឹក្សាបច្ចេកទេសកម្មវិធីការគ្រប់គ្រងធនធានទឹក និងការផ្លាស់ប្តូរ កសិកម្មនៅប្រទេសកម្ពុជា ជំហាន១ រៀបចំឱ្យមានសិក្ខាសាលា ពិគ្រោះយោបល់ថ្នាក់ជាតិនាពេលនេះ។
សូមបញ្ជាក់ថា សិក្ខាសាលានាពេលនេះ ធ្វើឡើងក្នុងគោលបំណងពិគ្រោះយោបល់ពិភាក្សា និងប្រមូលនូវធាតុចូល លើសេចក្តីព្រាងគោលការណ៍ណែនាំគំរូ លក្ខន្តិកៈ និងបទបញ្ជាផ្ទៃក្នុង ស.ក.ប.ទ. ប្រកាសស្តីពីការរំលាយចោល ស.ក.ប.ទ. និងនីតិវិធី នៃការដោះស្រាយវិវាទ ក្នុងក្របខ័ណ្ឌ ស.ក.ប.ទ. ដើម្បីធ្វើឱ្យមានភាពគ្រប់ជ្រុងជ្រោយ គ្របដណ្តប់គ្រប់ទិដ្ឋភាពជាក់ស្តែង និងបច្ចេកទេស និងមានភាពសុក្រិត ជាពិសេសធានាកិច្ចដំណើរការរបស់ ស.ក.ប.ទ. ប្រកបដោយប្រសិទ្ធភាព និងនិរន្តរភាព ៕
