ភ្នំពេញ៖ នាចុងខែវិច្ឆិកានេះ ក្នុងពិធីបុណ្យឯករាជ្យជាតិ ថ្ងៃ៩វិច្ឆិកា និងព្រះរាជពិធីបុណ្យអុំទូក អគ្គនាយកដ្ឋានពន្ធនាគារ បានស្នើសុំបន្ធូរបន្ថយ និងលើកលែងទោសដល់ទណ្ឌិតសរុប ចំនួន៩០២នាក់។ គណៈកម្មការ នឹងប្រជុំពិនិត្យ វាយតម្លៃលើការស្នើសុំបន្ធូរបន្ថយ និងលើកលែងទោសដល់ទណ្ឌិតទាំងនេះ នៅព្រឹកថ្ងៃទី៧វិច្ឆិកា។
នៅព្រឹកថ្ងៃទី៧ ខែវិច្ឆិកា ឆ្នាំ២០២៣ ស្អែកនេះ នាទីស្តីការក្រសួងយុត្តិធម៌ នឹងមានរៀបចំកិច្ចប្រជុំពិនិត្យរបស់គណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស ដើម្បីពិនិត្យលើសំណើរសុំបន្ធូរបន្ថយទោស និងលើកលែងទោសសម្រាប់ឱកាសនៃពិធីបុណ្យឯករាជ្យជាតិ ០៩ ខែវិច្ឆិកា និងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ខាងមុខនេះ។
លោក គឹម សន្តិភាព រដ្ឋលេខាធិការក្រសួងយុត្តិធម៌ ទទួលបន្ទុកខាងពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោសទណ្ឌិត បានឱ្យដឹងថា គណៈកម្មការជាតិ បានទទួលសំណើរពីគណៈកម្មការរាជធានី-ខេត្ត (ពន្ធនាគាររាជធានី-ខេត្ត ចំនួន ២៣) និងពីគណៈកម្មការក្រសួងមហាផ្ទៃ (មណ្ឌលអប់រំកែប្រែទាំង០៤) ស្នើសុំបន្ធូរបន្ថយទោស និងលើកលែងទោសដល់ទណ្ឌិតនៃពិធីបុណ្យទាំងពីរនេះ សរុបចំនួន ៩០២ នាក់ (ស្រី ៦១ នាក់) រួមមាន ដូចខាងក្រោម៖
១-ពិធីបុណ្យឯករាជ្យជាតិ (០៩ វិច្ឆិកា) បញ្ជីទណ្ឌិតចំនួន ៤៦៤នាក់ (ស្រី ៣៤ នាក់) រួមមាន៖ស្នើសុំបន្ធូរបន្ថយទោស ចំនួន ៤៣២ នាក់ (ស្រី ២៩ នាក់) និងស្នើសុំលើកលែងទោស ចំនួន ៣២ នាក់ (ស្រី ០៥ នាក់)។
២-ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក បញ្ជីទណ្ឌិតចំនួន ៤៣៨ នាក់ (ស្រី ២៧ នាក់) រួមមាន៖ ស្នើសុំបន្ធូរបន្ថយទោស ចំនួន ៤១៨ នាក់ ( ស្រី ២៦ នាក់) និងស្នើសុំលើកលែងទោស ចំនួន ២០ នាក់ ( ស្រី ០១ នាក់) ។
នៅក្នុងឱកាសបុណ្យអុំទូក និងពិធីបុណ្យឯករាជ្យជាតិ ឆ្នាំ២០២២ មានទណ្ឌិត ចំនួន ៣៨១នាក់ ត្រូវបានលើកលែងទោស និងបន្ធូរបន្ថយទោស។ ក្នុងនោះ មានទណ្ឌិតចំនួន ២៦៨នាក់ ត្រូវស្នើបន្ថយទោស ៣ខែ ខណៈទណ្ឌិតចំនួន ៨១នាក់ទៀត ត្រូវស្នើបន្ថយទោស ៦ខែ។ លើសពីនេះ ក៏នៅមានទណ្ឌិត ចំនួន ២៦នាក់ ត្រូវស្នើបន្ថយទោស ៩ខែ និងមានទណ្ឌិតចំនួន ០៥នាក់ បន្ថយទោស ១២ខែ ហើយមានទណ្ឌិតតែម្នាក់ប៉ុណ្ណោះ ដែលជាស្ត្រី ត្រូវបានស្នើលើកលែងទោស៕
