ភ្នំពេញ៖ឧកញ៉ា ហុី គឹមហុង ម្ចាស់ក្រុមហ៊ុនពិភពដីមាស រួមទាំងកូនចៅ ៥នាក់ ផ្សេងទៀត គេរាយការណ៍ថា ត្រូវបានដោះលែងចេញពីពន្ធនាគារឲ្យនៅក្រៅឃុំ កាលពីព្រឹកថ្ងៃទី ០២ ខែវិច្ឆិកា ឆ្នាំ២០២៣ នេះស្របពេលដែលប្រជាពលរដ្ឋមិនទាន់បានទទួលសំណងនិងយុត្តិធម៌នៅឡើយក្នុងបញ្ហាទំនាស់ដីធ្លី។ ប្រជាពលរដ្ឋដែលមានបញ្ហាជាមួយក្រុមហ៊ុនខាងលើនេះមិនទាន់បានដឹងអំពីករណីដែលបញ្ញាធរមានសមត្ថកិច្ចដោះលែងឧកញ៉ាដែលពាក់ព័ន្ធនឹងបញ្ហាដីធ្លីនេះនៅឡើយទេ។
ប្រភពឲ្យដឹងថា ការដោះលែងឧកញ៉ា ហុី គឹមហុង និងសហការីឲ្យនៅក្រៅឃុំ នៅពេលនេះគឺយោងតាមសេចក្ដីសម្រេចរបស់ចៅក្រមស៊ើបសួរ សាលាឧទ្ធរណ៍កាលពីថ្ងៃទី០១ ខែវិច្ឆិកា ឆ្នាំ២០២៣។ យ៉ាងណាក៏ដោយ ការសម្រេចនេះមិនទាន់មានប្រតិកម្មយ៉ាងណានៅឡើយពីភាគីម្ខាងទៀត ដែលភាគច្រើនគឺជាប្រជាពលរដ្ឋក្រីក្រមានទំនាស់ដីធ្លីជាមួយក្រុមលោក ហ៊ី គឹមហុង។ បើសិនជា ប្រជាពលរដ្ឋក្នុងភាគីទំនាស់បានដឹងអំពីការដោះលែងនេះ តើមានប្រតិកម្មក្នុងកម្រិតណា? ស្របពេលដែលពួកគាត់ គឺជាជនរងគ្រោះមិនទាន់ទទួលបានយុត្តិធម៌ និងដំណោះស្រាយយ៉ាងណាបន្ទាប់ពីចាប់ខ្លួនឧកញ៉ា ហុី គឹមហុង នោះមក?
គួររំលឹកថា លោក ហ៊ី គឹមហុង ម្ចាស់ក្រុមហ៊ុនពិភពដីមាស ត្រូវបានសមត្ថកិច្ចឃាត់ខ្លួននៅនឹងទីស្នាក់ការក្រុមហ៊ុនពិភពដីមាស ស្ថិតនៅភូមិត្រពាំងថ្ងាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ កាលពីល្ងាចថ្ងៃទី៧ ខែសីហា ឆ្នាំ២០២៣ ក្រោយពីមានការប្រទូសសរាយផ្ទុះអាវុធគំរាមគ្នារវាងសមត្ថកិច្ច និងកងអង្គរក្សរបស់អ្នករកសុីដីធ្លីនេះ ។ ក្រោយចាប់ខ្លួន តុលាការបានចោទប្រកាន់ពីបទរំលោភសេចក្តីទុកចិត្ត និងឆបោកពលរដ្ឋរាប់រយគ្រួសារ និងត្រូវឃុំខ្លួនបណ្ដោះអាសន្នចំនួន ៦នាក់ ចំណែកមនុស្សប្រុសស្រី ៨នាក់ ផ្សេងទៀតត្រូវដោះលែងអោយមានសេរីភាពវិញ។ មុនការចាប់ខ្លួនឧកញ៉ារូបនេះ ដោយសារអ្នកពាក់ព័ន្ធរួមនឹងអ្នកការពារជាច្រើននាក់ បានប្រើប្រាស់កាំភ្លើងច្រូងច្រាង និងវាយលើសមត្ថកិច្ចថែមទៀត។
ពលរដ្ឋរាប់រយគ្រួសារដាក់ពាក្យប្តឹងក្រុមហ៊ុនពិភពដីមាសទៅកាន់ស្នងការដ្ឋាននគរបាលខេត្តកំពត ដើម្បីសំណូមពរឱ្យជួយពន្លឿនក្នុងការរកដំណោះស្រាយបញ្ចប់វិវាទជាមួយក្រុមហ៊ុនមួយនេះ។ ពលរដ្ឋបញ្ជាក់ថា មកដល់ពេលនេះក្រុមហ៊ុនគ្មានដំណោះ ស្រាយសមស្របណាមួយសម្រាប់ពួកគាត់នោះឡើយ ខណៈបុគ្គលិកធនាគារកាន់តែបង្ខំទារលុយដោយនាំគ្នាមកដល់ផ្ទះពួកគាត់ស្ទើររាល់ថ្ងៃ ដោយអ្នកខ្លះមិនហ៊ាននៅផ្ទះទេ ព្រោះបុគ្គលិកធនាគារតាមទា និងខ្លះប្រើពាក្យសម្តីពិបាកស្តាប់ណាស់។ ក្រុមហ៊ុនពិភពដីមាស ខកខានផ្តល់លុយជាច្រើនខែមកហើយទៅឱ្យពលរដ្ឋតាមកិច្ចសន្យា។ បើតាមរបាយការណ៍ ស្នងការដ្ឋាននគរបាលខេត្តកំពត បានទទួលពាក្យបណ្តឹងពីប្រជាពលរដ្ឋដែលពាក់ព័ន្ធនឹងក្រុមហ៊ុនពិភពដីមាស ចំនួន ៦៧៨បណ្តឹង ក្នុងទំហំទឹកប្រាក់ប្រមាណ ១២.៦៤៧.៣៥០ដុល្លារ (ដប់ពីរលានប្រាំមួយរយសែសិបប្រាំពីរពាន់បីរយហា សិបដុល្លា)៕
