ភ្នំពេញ៖ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ជូនដំណឹងស្តីពី ការជួលដាយត្រី ដាយត្រីលេញ និង ដាយបង្កង តាមការព្រមព្រៀង សម្រាប់ឱ្យធ្វើអាជីវកម្ម ក្នុងរដូវនេសាទ ឆ្នាំ២០២៣-២០២៤ និងឆ្នាំ២០២៤-២០២៥ ដែលមាននៅខេត្តព្រៃវែង ខេត្តកណ្តាល និងរាជធានីភ្នំពេញ បន្ទាប់ពីគ្មានអ្នកដេញថ្លៃ លើកទី១ និងលើកទី២ រួចមក។
ក្នុងសេចក្តីជូនដំណឹង ដែលចុះហត្ថលេខាដោយលោក ពុំ សុថា ប្រតិភូរាជរដ្ឋាភិបាល ទទួលបន្ទុកជា ប្រធានរដ្ឋបាលជលផល កាលពីថ្ងៃទី៣០ ខែសីហា ឆ្នាំ២០២៣ បានសរសេរថាៈ រដ្ឋបាលជលផល នឹងទទួលពាក្យសុំជួលដាយត្រី នៅរាជធានីភ្នំពេញ ខេត្តកណ្តាល និងដាយត្រីលេញ ដាយបង្កង នៅខេត្តព្រៃវែង តាមការព្រមព្រៀម សម្រាប់ឱ្យធ្វើអាជីវកម្ម ក្នុងរដូវនេសាទ ឆ្នាំ២០២៣-២០២៤ និងឆ្នាំ២០២៤-២០២៥ ចាប់ពីថ្ងៃជូនដំណឹង (៣០សីហា) រហូតដល់ថ្ងៃទី១៥ ខែកញ្ញា ឆ្នាំ២០២៣ នៅរដ្ឋបាលជលផល ថ្នាក់កណ្តាល ដែលមានគន្លងដាយត្រី ដាយត្រីលេញ និងដាយបង្កង។
នៅក្នុងសេចក្តីជូនដំណឹង បានសរសេរទៀតថាៈ ពលរដ្ឋគ្រប់រូប មានសិទ្ធិជួលដាយត្រី នៅភ្នំរាជធានីពេញ ខេត្តកណ្តាល ដាយត្រីលេញ និង ដាយបង្កង នៅខេត្តព្រៃវែង ដោយត្រូវដាក់ពាក្យសុំជួល ធ្វើអាជីវកម្មដាយត្រី ដាយត្រីលេញ និងដាយបង្កង នៅរដ្ឋបាលជលផល ថ្នាក់កណ្តាល។
ចំពោះមន្ត្រីរាជការ មិនអនុញ្ញាតឱ្យដាក់ពាក្យសុំជួលដាយត្រី ដាយត្រីលេញ និងដាយបង្កងឡើយ។ ទន្ទឹមនេះ រូបវន្តបុគ្គល ឬនិតិបុគ្គល ធ្លាប់ដែលដេញថ្លៃបាន ប៉ុន្តែមិនគោរពកិច្ចសន្យាជំពាក់ថ្លៃឈ្នួលគន្លងដាយ ឬបំណុលផ្សេងៗ ក៏មិនអនុញ្ញាតឱ្យដាក់ពាក្យជួលបានដែរ។
ថ្លៃឈ្នួលដាយត្រី ដាយត្រីលេញ ឬដាយបង្កង ដែលអតិថិជន ជួលបានតាមការព្រម ព្រៀង គឺជាថ្លៃឈ្នួលសុទ្ធសាធ សម្រាប់ធ្វើអាជីវកម្ម ពីររដូវនេសាទ គឺរដូវទី១ និងរដូវទី២ ហើយត្រូវបង់ថ្លៃឈ្នួលនេសាទ មួយរដូវម្តងៗ នៃថ្លៃឈ្នួលដែលបានជួល។
ដាយត្រី ដែលត្រូវដាក់ឱ្យជួល នៅរាជធានីភ្នំពេញ មានចំនួន ១២ គន្លង នៅខេត្តកណ្តាល មានចំនួន ២១ គន្លង ដាយត្រីលេញ ចំនួន ៣គន្លង និងដាយបង្កង ចំនួន ៨គន្លង។
រដ្ឋបាលជលផល ប្រកាសដាក់ឱ្យជួលដាយត្រី ដាយត្រីលេញ និងដាយបង្កងខាងលើ បន្ទាប់ពីគ្មានអ្នកដេញថ្លៃ លើកទី១ និងលើកទី២ រួចមក។ មូលហេតុដែលគ្មាន អ្ននដេញថ្លៃដាយត្រី ដាយត្រីលេញ និងដាយបង្កង ត្រូវបានគេនិយាយឱ្យដឹងថា ដោយសារស្ថានភាពទឹកទន្លេ ឆ្នាំនេះ ជន់ឡើងយឺតពេល និងមានកម្ពស់ទាបពេក ដែលមកដល់ថ្ងៃទី១ ខែកញ្ញា ទឹកទន្លេសាប នៅស្ថានីយជលសាស្ត្រក្រគរ កំពង់លួង ទឹកទើបឡើងបានត្រឹមកម្ពស់ ៤,៣២ ម៉ែត្រប៉ុណ្ណោះ៕
