កំពត៖ អ្នកប្រកបអាជីវកម្ម ពាក់ព័ន្ធនឹងវិស័យទេសចរណ៍ តាមដងព្រែកនិងមន្ត្រីជំនាញ បានបញ្ជាក់ថាៈ បញ្ហាអាកាសធាតុ និងការបើកទ្វារបង្ហូរទឹក ពីទំនប់វារីអគ្គិសនីកំចាយ មិនបានប៉ះពាល់ដល់ទេសចរដែលមកលេងកម្សាន្ត ខេត្តកំពតទេ។
ផ្ទុយទៅវិញ បរិមាណភ្ញៀវ ហាក់មានការកើនឡើង ជាងសប្តាហ៍មុនៗនារីបុគ្គលិកបម្រើការងារ នៅរមណីយដ្ឋានដូងទេរ បានប្រាប់ឱ្យដឹងថាៈ ជាងមួយសប្តាហ៍នេះ ភ្ញៀវបានមកលេងកម្សាន្ត នៅដូងទេរច្រើន ទោះបីមានភ្លៀងធ្លាក់ញឹកញយក្តី។ ឯការបង្ហូរទឹកចេញពីទំបន់វារីអគ្គិសនីកំចាយ រហូតមកដល់រសៀលថ្ងៃទី២៧ ខែកក្កដានេះ ក៏មិនបានប៉ះពាល់ ដល់បណ្តាកន្លែងកម្សាន្ត ក្បែរដងព្រែកដែរ។
អ្នកបម្រើការងារដដែល បានបន្តថាៈ ម្ចាស់រមណីយដ្ឋាន បានប្រាប់ដល់ភ្ញៀវ កុំឱ្យមានការព្រួបារម្ភ ព្រោះអាជ្ញាធរ និងមន្ត្រីជំនាញពាក់ព័ន្ធ ពិសេសបុគ្គលិកបម្រើការតាមតំបន់កម្សាន្ត តែងយកចិត្តទុកដាក់ខ្ពស់ លើកិច្ចការពារសុវត្ថិភាព។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានបញ្ជាក់ថាៈ ប៉ុន្មានថ្ងៃកន្លងមកនេះ នៅទូទាំងខេត្តកំពត មានភ្លៀងធ្លាក់ច្រើន ពោលគឺ តាំងពីមុនថ្ងៃបោះឆ្នោតម្ល៉េះ ប៉ុន្តែសកម្មភាពទេសចរណ៍ មានភាពល្អប្រសើរ។
លោកប្រធានមន្ទីរ បានបន្តថាៈ នាសប្តាហ៍កន្លងទៅ ទេសចរជាតិ និងបរទេស មានប្រមាណជាង ៣ ម៉ឺននាក់ ខណៈដែលសប្តាហ៍មុនៗ ភ្ញៀវមានត្រឹមតែជាង ២ ម៉ឺននាក់ប៉ុណ្ណោះ។ ដូច្នេះកត្តាអាកាសធាតុ ពុំបានធ្វើឱ្យប៉ះពាល់ ដល់វិស័យទេសចរណ៍នៅខេត្តកំពតទេ។
លោក សយ ស៊ីណុល បានបញ្ជាក់ទៀតថាៈ ចំពោះការបើកទឹកបង្ហូរចេញពីទំនប់វារីអគ្គិសនីកំចាយ គឺជារឿងធម្មតា និងតែងកើតមានរៀងរាល់ឆ្នាំ ក្នុងរដូវវស្សា។ ការបើកបង្ហូរទឹកឆ្នាំនេះ មានទំហំតិចតួច មិនប៉ះពាល់ដល់ប្រជាពលរដ្ឋ និងអ្នកផ្តល់សេវាទេសចរណ៍
នៅតាមដងព្រែកកំពតទេ។
សូមរំលឹកថា កាលពីព្រឹកថ្ងៃទី២៦ ខែកក្កដាឆ្នាំ២០២៣អ្នកបច្ចេកទេសរបស់ក្រុមហ៊ុនស៊ីណូហាយ បានបើកទ្វារទឹក ១ ក្នុងចំណោមទ្វារទាំង ៥ ដោយលើកកម្ពស់ ២ ម៉ែត្រពីបាតទំនប់ ខណ:ទឹកឡើងដល់កម្រិត ១៤៨,២៦ ម៉ែត្រ ជាមួយនឹងលម្ហូរចូលមានចំណុះ ៤៣៧,៤៣ ម៉ែត្រត្រីគុណ ក្នុង១វិនាទី។ រហូតមកដល់ម៉ោង ៣ េសៀលថ្ងៃទី២៧ខែកក្កដានេះ ក្រុមការងារបានទម្លាក់ទ្វារទឹកចុះ នៅត្រឹមកម្ពស់ ០,៥០ ម៉ែត្រ ពីបាតទំនប់ដោយកម្រិតទឹកបានធ្លាក់ចុះនៅត្រឹម ១៤៨,២០ ម៉ែត្រ៕
