ក្រុមឈ្មួញ និងអាជីវករដឹកជញ្ជូនទំនិញឆ្លងកាត់ស្ថានីយជញ្ជីងថ្លឹងរថយន្តថ្នល់ទទឹង ផ្លូវជាតិលេខ៧ ស្រុកត្បូងឃ្មុំ ខេត្តត្បូងឃ្មុំ បានឲ្យដឹងថា បច្ចុប្បន្នលោក គង់ សុភាព ប្រធានស្ថានីយជញ្ជីងថ្លឹងរថយន្តថ្នល់ទទឹង នៅតែប្រែក្លាយជញ្ជីងថ្លឹងរថយន្តជាជញ្ជីងថ្លឹងលុយយ៉ាងរលូនដដែល។
ប្រភពបានបញ្ជាក់ទៀតថា ទោះបីក្រុមឈ្មួញ និងអាជីវករដឹកជញ្ជូនទំនិញផ្ទុកមិនលើសទម្ងន់ក៏ត្រូវបង់លុយតាមការកំណត់របស់លោក គង់ សុភាព និងមន្រ្តីប្រចាំស្ថានីយជញ្ជីងថ្លឹងរថយន្តដដែលមិនអាចតវ៉ាបានទេ។ ហេតុនេះហើយទើបមានការជំរុញឲ្យលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ព្រមទាំងលោក សេង ឈួន មេជញ្ជីងថ្លឹងរថយន្តទូទាំងប្រទេស ពិនិត្យទៅលើទង្វើរបស់លោក គង់ សុភាព ខ្លះផង។
តាមការបង្ហើបពីមន្រ្តីរាជការនៅក្នុងមន្ទីរសាធារណការខេត្តត្បូងឃ្មុំ បានឲ្យដឹងថា បើទោះបីកន្លងមករឿងអាស្រូវពុករលួយរបស់លោក គង់សុភាព ប្រធានស្ថានីយជញ្ជីងថ្លឹងរថយន្តថ្នល់ទទឹង ត្រូវបានបើកកកាយជាបន្តបន្ទាប់យ៉ាងណាក៏ដោយ ក៏ថ្នាក់ដឹកនាំក្រសួងសាធារណការ និងដឹកជញ្ជូនធ្វើមិនដឹងមិនឮអ្វីទាំងអស់។ ទន្ទឹមនឹងនេះលោក គី ដាណារិទ្ធ ប្រធានសាធារណការ និងដឹកជញ្ជូនខេត្តត្បូងឃ្មុំ បណ្ដោយឲ្យលោក គង់ សុភាព ប្រធានស្ថានីយជញ្ជីងថ្លឹងរថយន្តថ្នល់ទទឹង ប្រែក្លាយជញ្ជីងថ្លឹងរថយន្តទៅជាជញ្ជីងថ្លឹងលុយយ៉ាងត្រជាក់ចិត្ត។ ជាពិសេសលោក សេង ឈួន មេជញ្ជីងថ្លឹងរថយន្តទូទាំងប្រទេសគ្មានវិធានការណាមួយដើម្បីទប់ស្កាត់អំពើពុករលួយរបស់លោក គង់ សុភាព នោះទេ។
ប្រភពស្និទ្ធនឹងលោក គង់ សុភាព បានលើកឡើងថា ចាប់តាំងពីទទួលបានតំណែងជាប្រធានស្ថានីយជញ្ជីងថ្លឹងរថយន្តថ្នល់ទទឹង ផ្លូវជាតិលេខ៧ ស្រុកត្បូងឃ្មុំ ខេត្តត្បូងឃ្មុំ រហូតមកដល់ពេលនេះគឺលោក គង់ សុភាព ប្រើតួនាទីដើម្បីប្រមូលលុយយ៉ាងរំភើយ។ ការដែលអំពើពុករលួយរបស់លោក គង់ សុភាព ប្រព្រឹត្តទៅយ៉ាងរលូនគឺដោយសារមានការបើកដៃពីសំណាក់លោក គី ដាណារិទ្ធ ប្រធានមន្ទីរសាធារណការ និងដឹកជញ្ជូនខេត្តត្បូងឃ្មុំ ផងដែរ។ ដូច្នេះហើយទើបក្រុមឈ្មួញ និងអាជីវករអំពាវនាវឲ្យលោក ស៊ុន ចាន់ថុល រដ្ឋមន្រ្តីក្រសួងសាធារណការ និងលោក សេង ឈួន មេជញ្ជីងថ្លឹងរថយន្តទូទាំងប្រទេសទប់ស្កាត់អំពើពុករលួយរបស់លោក គង់ សុភាព ឲ្យបានឆាប់៕
