(ព្រះវិហារ)៖ សង្វៀនបញ្ជល់មាន់និងអាប៉ោង លំដាប់VIP ដ៏ធំ១កន្លែង នៅក្នុងចម្ការស្វាយចន្ទី ចន្លោះគីឡូម៉ែត្រ លេខ៥៥-៥៦ ស្ថិតនៅភូមិអូរពោរ ឃុំរមណីយ ស្រុករវៀង ខេត្តព្រះវិហារ កំពុងបើកដំណើរការ អាជីវកម្ម លេងល្បែងស៊ីសងខុសច្បាប់ យ៉ាងពេញបន្ទុក.!។ ខណៈសមត្ថកិច្ចមូលដ្ឋាន រក្សាភាពស្ងៀមស្ងាត់ ហាក់បីដូចជា ស្រវាំងភ្នែក ងាប់ត្រចៀកស្ដូក មើលមិនឃើញ ស្ដាប់មិនឮ នូវរាល់សកម្មភាពទាំងនេះ!។ បង្កជាលក្ខណៈងាយស្រួល និងមានសុវត្ថិភាព ដល់ក្រុមអ្នកញៀនល្បែង ក៏ដូចជាម្ចាស់ទីតាំងផ្ទាល់.!។
ករណីនេះ អាជ្ញាធរនិងជំនាញ រុញឱ្យអ្នកកាសែត ចុះទៅបង្ក្រាបល្បែងជាមុនសិន ទើបសមត្ថកិច្ច សហការតាមក្រោយ..!។
ជាក់ស្ដែងៈ នៅវេលាថ្ងៃត្រង់ក្នុងថ្ងៃទី០២.០៧.២០២២ គេឃើញក្រុមអ្នកញៀនល្បែង មកពីភូមិ-ឃុំ ដែលនៅក្បែរ និងមកពីតាមបណ្ដាស្រុកផ្សេងៗ បានធ្វើដំណើរប្រសេកប្រសាច តាមដងផ្លូវ ខ្លះជិៈម៉ូតូឌុបគ្នា ស្ពាយកន្ត្រកមាន់ជល់ ខ្លះទៀតជិៈរថយន្តសេរីទំនើបៗ ដឹកមនុស្សរួមនិងកន្ត្រកមាន់ជល់មកជាមួយ.! ដើម្បីមកប្រមូលផ្ដុំគ្នា យ៉ាងច្រើនណែនណាន់តាន់តាប់ នៅទីតាំង”សង្វៀនបញ្ជល់មាន់និងអាប៉ោង”ក្នុងចម្ការស្វាយចន្ទី ចន្លោះគីឡូម៉ែត្រ លេខ៥៥-៥៦ ស្ថិតនៅភូមិអូរពោរ ឃុំរមណីយ ស្រុករវៀង យ៉ាងអនាធិបតេយ្យបំផុត! ព្រោះចំ(ថ្ងៃអាទិត្យ)ដែលជាថ្ងៃគូណាត់ពិសេស ភ្នាល់ចាក់លុយធំៗ..!។
ប្រភពព័ត៌មានឲ្យដឹងថាៈ”សង្វៀនបញ្ជល់មាន់និងអាប៉ោង”លំដាប់VIPខាងលើ.! បានចាប់ផ្ដើម បើកដំណើរការ ជាយូរមកហើយ ដោយក្នុង១សប្ដាហ៍លេង០៤ថ្ងៃ.!។ ក្នុងនោះ ពួកគេបើកលេងចល័ត ចំនួន២ទីតាំងក្បែរគ្នា ក្នុងមូលដ្ឋាន ភូមិអូរពោរ ឃុំរមណីយ ស្រុករវៀង ដដែលទេ..!។
ទីតាំងទី១ ៖ ត្រង់ចំណុចក្នុងចម្ការស្វាយចន្ទី គីឡូម៉ែត្រ លេខ៥៥-៥៦ ស្ថិតនៅភូមិ-ឃុំខាងលើ..!។
ទីតាំងទី ២ ៖ ក្នុងចម្ការស្វាយចន្ទី.ខាងលិចផ្លូវចន្លោះគីឡូម៉ែត្រលេខ៥១-៥២ ស្ថិតនៅភូមិ-ឃុំខាងលើ..!។
យ៉ាងណាក្ដី នៅរសៀលថ្ងៃទី០២.០៧.២០២៣ គេសង្កេតឃើញក្រុមអ្នកញៀនល្បែងដែលឈ្នះ បានហ៊ោរកញ្ច្រៀវ សប្បាយយ៉ាងទ្រហឹងអឺងកង ខណៈអ្នកចាញ់មុខក្រៀមក្រំ ប្រឈមឈ្លោះប្រពន្ធកូន នឹងជំពាក់បំណុលគេ..! ។
បើតាមអ្នកញៀនល្បែងបាននិយាយថាៈ”សង្វៀនបញ្ជល់មាន់និងអាប៉ោង”ខ្នាតធំត្រង់ចំណុចខាងលើ គឺលេងភ្នាល់ចាក់លុយធំៗណាស់.! ដោយមាន់ជល់១គូៗ ពួកគេភ្នាល់ចាក់លុយ ចាប់ពី១០លានរៀល ទៅ៤០.រៀលឯណោះ!។
ចំពោះអាប៉ោងវិញ ពួកគេ ភ្នាល់ចាក់លុយចាប់ពី ២លានរៀល ទៅ៤០លានរៀល ក្នុងមួយគ្របៗ!។ ជាហេតុនាំឱ្យម្ចាស់ទីតាំង អាចប្រមូលលុយពីការ”ដកតុងហាន់សាវ”បានរាប់សិបលានរៀលក្នុងមួយថ្ងៃៗ សម្រាប់យកមករត់ការ ជាមួយអាជ្ញាធរ និងសមត្ថកិច្ច ពាក់ព័ន្ធបានយ៉ាងងាយស្រួល..!។
ជុំវិញករណីនេះ លោក ព្រុំ ស៊ីថា អធិការរងស្រុករវៀង ទទួលផែនព្រហ្មទណ្ឌ បានថ្លែងប្រាប់«ដើមរាំង»នៅរសៀលថ្ងៃទី០២.០៧.២០២៣ថា លោកមិនបានដឹងទេ…! ប៉ុន្តែលោក ព្រុំ ស៊ីថា រុញឱ្យអ្នកសារព័ត៌មាន ទៅចាប់ក្រុមអ្នកលេងល្បែងខាងលើដោយខ្លួនឯង ខណៈសមត្ថកិច្ចរបស់លោក ចាំសហការតាមក្រោយ!។ បើតាមលោកអធិការរង គឺភូមិសាស្ត្រនៅទីនោះស្មុកស្មាញ ពិបាកបង្ក្រាបណាស់!។ ម្យ៉ាងវិញទៀត ចម្ងាយពីទីរួមស្រុក ទៅកន្លែងលេងល្បែងជាង៤០គីឡូម៉ែត្រឯណោះ អញ្ចឹងទម្រាំកម្លាំងទៅដល់គេរត់អស់ហើយ..!។
លោកអធិការរង បន្ថែមថាៈ អ្នកលេងល្បែង គេមានខ្សែបណ្ដាញខ្លាំងជាងរូបលោកទៀត ដោយមានអ្នកមើលផ្លូវ ពីចម្ងាយទៀតផង.!។
ចំណែកលោក ហោ ប៊ុនហួរ អភិបាលស្រុករវៀង.បានថ្លែងស្រដៀងគ្នា និងលោកអធិការរងដែរ! ដោយរុញឱ្យអ្នកសារព័ត៌មាន ចាប់ល្បែង និងសហការជាមួយសមត្ថកិច្ចក្នុងការចុះបង្ក្រាប…!។ដោយលោក ហោ ប៊ុនហួរ អះអាងថាៈ ឱ្យតែកម្លាំងចុះទៅ គឺដឹងតែបែកការណ៍រហូត អញ្ចឹងពិបាក។ លោក ហោ ប៊ុនហួរ អះអាងថា(ខ្ញុំប្ដេជ្ញាបង្ក្រាបល្បែង ក្នុងមូលដ្ឋាន)។
បើទោះបីជាលោកអភិបាលស្រុក បានប្ដេជ្ញាបែបនោះក្ដី ប៉ុន្តែធាតុពិតជាក់ស្ដែងៈ សកម្មភាពនៃការ លេងល្បែងខ្នាតធំលំដាប់ VIP ត្រង់ចំណុចខាងលើ គឺនៅតែបន្តសកម្មភាពដដែល..!។ -ឯណាទៅ ភូមិ-ឃុំ-មានសុវត្ថិភាព ដែលប្រមុខរាជរដ្ឋាភិបាល បានកំណត់និងដាក់ចេញឱ្យមន្ត្រីមូលដ្ឋានអនុវត្តនោះ..?៕
