ព្រឹកថ្ងៃទី ២០ ខែ មេសា ឆ្នាំ២០២៣ វេលាម៉ោង ៩:00នាទី នៅក្នុងបន្ទប់ប្រជុំវីដេអូ conference របស់រដ្ឋបាលខេត្តសៀមរាប លោកស្រី យូ សុភា អភិបាលរងខេត្ត តំណាងដល់ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានអនុញ្ញាតឱ្យលោក ខែល្លីអ័រ ចនសុន (Kelly R. Johnson គណៈប្រធានរបស់សាសនាចក្រ ប្រចាំតំបន់អាស៊ី និងក្រុមប្រតិភូអមដំណើរទាំងអស់ ចូលជួបសម្តែងការគួរសម និងពិភាក្សាការងារ ព្រមទាំងការចង្អុលបង្ហាញពីលោកស្រី អភិបាលរងខេត្ត ដើម្បីការងារទទួលបានជោគជ័យ និងប្រសិទ្ធភាពលើគម្រោងកិច្ចការងារមនុស្សធម៌នានារបស់សមាគមនិកាយសាសនាចក្រនៃព្រះយេស៊ូគ្រីសនៅលើទឹកដីខេត្តសៀមរាប។
បន្ទាប់ពីលោកស្រី អភិបាលរងខេត្តបានបង្ហាញអំពីស្ថានភាពភូមិសាស្ត្រនិងសក្តានុពលរបស់ខេត្តសៀមរាបរួចមក លោក ខេល្លីអ័រ ចងសុន បានលើកឡើងថាសាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយប្រចាំកម្ពុជាគឺជាផ្នែកមួយរបស់សាសនាទូទាំងពិភពលោក។ សាសនាចក្របានទទួលការ អនុញ្ញាតចុះបញ្ជីដំបូងនៅថ្ងៃទី២៦ ខែកុម្ភៈ ឆ្នាំ១៩៩៤ ដោយក្រសួងធម្មការនិងសាសនា។
លោកបានបន្ថែមទៀតដែលថា គោលបំណងក្នុងកិច្ចការមនុស្សធម៌របស់សាសនាចក្រ នៃព្រះយេស៊ូវគ្រីស្ទ នៃពួកបរិសុទ្ធថ្ងៃចុងក្រោយ គឺដើម្បីសម្រាលទុក្ខវេទនា និងលើកកម្ពស់ឱ្យប្រជាពលរដ្ឋចេះរិះរកវិធីខ្លួនទីពឹងខ្លួន ហើយផ្តល់ឱកាសបម្រើដល់ជនក្រីក្រ និងខ្វះខាត។
សូមបញ្ជាក់ផងដែរថា កិច្ចការមនុស្សធម៌នេះពុំគិតអំពីជាតិសាសន៍ សាសនា ឬដើមកំណើតអ្វីឡើយ។ មូលនិធិសម្រាប់កិច្ចការមនុស្សធម៌គឺជា ប្រាក់បរិច្ចាគបានមកពីសមាជិក និងមិត្តភក្ដិរបស់សាសនាចក្រទូទាំងពិភពលោក ពុំមែនបានមកពីប្រាក់ឧបត្ថម្ភ របស់រដ្ឋាភិបាលណាមួយឡើយ ហើយប្រាក់បរិច្ចាគទាំងស្រុងត្រូវបានប្រើប្រាស់ដើម្បីជួយដល់ជនក្រីក្រ និងខ្វះខាត៕
