(ពោធិ៍សាត់)៖ រដ្ឋបាលខេត្តពោធិ៍សាត់ នាថ្ងៃទី២១ ខែមេសា ឆ្នាំ២០២៣នេះ បានចេញសេចក្តីជូនដំណឹង ស្តីពីការពន្យារពេលនៃការទទួលពាក្យប្រឡងជ្រើសរើសក្របខ័ណ្ឌមន្ត្រីរដ្ឋបាលជាន់ខ្ពស់ ចូលបម្រើការងារនៅរដ្ឋបាលក្រុងពោធិ៍សាត់ សម្រាប់ឆ្នាំ២០២៣។
ក្នុងសេចក្តីជូនដំណឹងនោះ គឺយោងតាម៖
-សេចក្តីជូនដំណឹងលេខ ១៧៩៩/២៣ សជណ.ខពស ចុះថ្ងៃទី២១ ខែមីនា ឆ្នាំ២០២៣ របស់រដ្ឋបាល ខេត្តពោធិ៍សាត់។
-យោងតាមការចាំបាច់របស់គណៈកម្មការរៀបចំការប្រឡងខេត្តពោធិ៍សាត់។
គណៈកម្មការរៀបចំការប្រឡងខេត្តពោធិ៍សាត់ សូមជូនដំណឹងផងដែរដល់បេក្ខជនទាំងពីរភេទ ឱ្យបានជ្រាបថា៖ ការទទួលពាក្យសុំចុះឈ្មោះចូលរួមក្នុងការប្រឡងជ្រើសរើសបេក្ខជនឲ្យចូលបម្រើការងារស្ថិតក្នុងក្របខ័ណ្ឌ មន្ត្រីរដ្ឋបាលជាន់ខ្ពស់ នៅរដ្ឋបាលក្រុងពោធិ៍សាត់ ចំនួន០២ នាក់ ដូចមានផ្សព្វផ្សាយក្នុងសេចក្តីជូនដំណឹងក្នុង យោងខាងលើ នឹងត្រូវពន្យាររហូតដល់ថ្ងៃទី០៥ ខែឧសភា ឆ្នាំ២០២៣ ជាកាលបរិច្ឆេទចុងក្រោយ នៃការទទួលពាក្យប្រឡង។
ទន្ទឹមនេះ ដើម្បីធានាឲ្យការប្រឡងជ្រើសរើសខាងលើប្រព្រឹត្តទៅដោយរលូន ព្រមទាំងផ្តល់ឱកាសដល់បេក្ខជនបានចូលរួមក្នុងការប្រឡងបន្ថែមទៀត បេក្ខជនដែលមានសញ្ញាបត្រចាប់ពីកម្រិតបរិញ្ញាបត្រឡើងទៅ លើជំនាញពាក់ព័ន្ធផ្សេងៗរួមមាន៖ គ្រប់គ្រង សេដ្ឋកិច្ច រដ្ឋបាលសាធារណៈ និងជំនាញផ្សេងៗ ត្រូវបានអនុញ្ញាតឲ្យចូលរួម ក្នុងការប្រឡងជ្រើសរើសនេះ។
បេក្ខជនដែលមានចំណាប់អារម្មណ៍ក្នុងការប្រឡងជ្រើសរើសនេះ អាចមកទទួលពាក្យ ប្រឡង និងដាក់ពាក្យប្រឡង នៅទីចាត់ការគ្រប់គ្រងធនធានមនុស្ស នៃរដ្ឋបាលខេត្តពោធិ៍សាត់ នៅរៀងរាល់ ម៉ោងធ្វើការ។
សម្រាប់ព័ត៌មានលំអិតផ្សេងៗទៀត ពាក់ព័ន្ធលក្ខខណ្ឌនៃការជ្រើសរើស សំណុំឯកសារត្រូវភ្ជាប់ និងវិញ្ញសាប្រឡង ដូចមានរៀបរាប់ក្នុងសេចក្តីជូនដំណឹងស្តីពីការប្រឡងជ្រើសរើសរបស់រដ្ឋបាលខេត្តពោធិ៍សាត់ ដែលបានផ្សព្វផ្សាយ នាពេលកន្លងមក ឬអាចអញ្ជើញទាក់ទងផ្ទាល់នៅទីកន្លែងទទួលពាក្យសុំចុះឈ្មោះប្រឡង ដូចរៀបរាប់ខាងលើនៅរៀង រាល់ម៉ោងធ្វើការ៕
